Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

«Katamakgxtakgtit kxtapaxkit Dios»

 TATAKGATSIN

¿Tuku wan Biblia xlakata lakxtlawakan tamakgaxtokgat xlakatin mapakgsinanin chu lamakgxtakgkan?

¿Tuku wan Biblia xlakata lakxtlawakan tamakgaxtokgat xlakatin mapakgsinanin chu lamakgxtakgkan?

Jehová lakaskin pi tiku tamakgaxtokgkgonit namakgantaxtikgo tuku lawanikgolh akxni tamakgaxtokgkgolh. Akxni Dios kamamakgaxtokgli xapulana chixku chu puskat, wa: «Chixku [...] akxtum natatawila xpuskat, chu kaj akgtum makni nawankgo». Chu akxni xtitaxtunita lhuwa ciento kata Jesucristo na wa umakgolh tachuwin: «Wantu Dios makxtum tlawalh, ni kamapapitsilh [chatum] nchixku» (Génesis 2:24; Mateo 19:3-6). Chuna la akxilhaw, Jehová chu Jesús lakaskinkgo pi tamakgaxtokgat namakgapala putum kilhtamaku, chu xlikgalhsputat akxni chatum niy (1 Corintios 7:39). Tamakgaxtokgat xasanto chu ni kaj takgaman, ni nalakpuwanaw pi tlan lakapala nalakxtlawayaw. Jehová ni akxilhputun tiku lakxtlawa xtamakgaxtokgat xlakatin mapakgsinanin komo ni wa xlakata tuku wan Biblia (Malaquías 2:15, 16).

¿Wan Biblia tuku xlakata tlan lakxtlawakan tamakgaxtokgat? Jehová limasiyanit pi xkajni tiku laʼakgskgawi chu tiku tlawa talakgxtumit nema ni xlilat (Génesis 39:9; 2 Samuel 11:26, 27; Salmo 51:4). Wa xlakata kaj akxni wi tiku tlawa talakgxtumit nema ni xlilat masta talakaskin nalakxtlawakan tamakgaxtokgat. (Kcapítulo 9, párrafo 7, lichuwinan tuku kilhchanima talakgxtumit nema ni xlilat.) Pero Dios limakgxtakgnit tiku akgskgawika nalaksaka komo nalakxtlawa xtamakgaxtokgat o ni (Mateo 19:9). Wa xlakata, komo tiku akgskgawika nalakapastaka nalakxtlawa xtamakgaxtokgat, ni tlawama tuku Jehová ni akxilhputun. Pero nipara chatum tala xalak congregación tlan nawani chuna katlawalh. Max, tiku akgskgawika, akxni liwana naʼakgatekgsa tuku xlakata chuna tlawalh tiku tamakgaxtokga max nalakpuwan pi ni nalakxtlawa xtamakgaxtokgat, max xlakata akxilha pi lu nitlan limakgkatsi tuku tlawalh. Pero wa tiku akgskgawika nalakapastaka komo nalakxtlawa xtamakgaxtokgat o ni, chu nalitaya tuku max nakitaxtu alistalh (Gálatas 6:5).

 Nachuna, wi tuku lu nitlan lama ktamakgaxtokgat nema natlawa pi max chatum kstalanina Cristo namakgxtakga tiku tawi o nalakxtlawa xtamakgaxtokgat, maski tiku tawi ni tlawanit talakgxtumit nema ni xlilat. Akxni chuna la ktamakgaxtokgat, Biblia wan pi tiku chuna tlawa «nialh natamakgstaparay, [o] kalakgampa xchixku» o xpuskat (1 Corintios 7:11). Pero, kstalanina Cristo tiku makgxtakgnan nila natatawilapara atanu (Mateo 5:32). Kaʼakxilhwi makgapitsi tuku lu nitlan, nema tlawa pi makgapitsin lamakgxtakgkgo.

Akxni chixku ni kuentajtlawaputun xfamilia. Wilakgolh lakchixkuwin tiku ni maxkikgo tuku maklakaskinkgo xfamilia, pero ni kaj xlakata nila kamaxkikgo wata xlakata ni kamaxkiputunkgo; chu uma tlawa pi xfamilia lhuwa napatinan. ¿Tuku wan Biblia xlakata uma? «Lapi winti ni kuintaj tlaway [...], na tlakg xaliwaka wanti xala kxchik, kaj likgamananit xtakanajla, na tlakg xaliwaka nitlan xtayat, ni xawa ntini kanajlay.» (1 Timoteo 5:8.) Komo chatum chixku ni mastaputun tuku maklakaskin xfamilia, xpuskat nalakapastaka komo talakaskin namakgxtakga kxlakatin mapakgsinanin xlakata tlan nakuentajtlawa xkamanan nitu nalanikgo chu xla na nitu nalani. Pero, putum kilhtamaku akxni chatum kstalanina Cristo nalimawakakan pi ni mastaputun tuku maklakaskin xfamilia, lakgkgolotsin xalak congregación liwana naputsanankgo komo xlikana, xlakata uma tuku tlawama tlan nalimaxtukan kcongregación.

Akxni wi tiku lu lhuwa snokga o kgaxi tiku tatamakgaxtokgnit. Wilakgolh tiku lu lhuwa snokgkgo tiku tatamakgaxtokgkgonit, max nalimakgatatatlakgo chu asta max kalipekua nawilikgo xlatamat tiku tawi. Komo kstalanina Cristo chuna likatsi, lakgkgolotsin xalak congregación liwana nalakputsananikgo uma tiku lu xasitsin chu xaluku chu tlan nalimaxtukan kcongregación (Gálatas 5:19-21).

Akxni lu kalipekua nawilinikan xtakanajla. Wilakgolh lakchixkuwin chu lakpuskatin tiku nipara tsinu maxkikgo talakaskin tiku tawilakgolh nakakninanikgo Jehová, chu tiku xafuerza kamatlawikgo nalakatsalakgo akgtum limapakgsin xalak Biblia.  Akxni chuna la, max xapuskat o xachixku tiku kstalanina Cristo nalaksaka komo namakgxtakga tiku tawi xlakata tlan “pulh wa nakgalhakgaxmata Dios, ni xawa nchixkuwin” (Hechos 5:29).

Liwana kilikatsitkan pi akxni tiku tamakgaxtokgkgonit kgalhikgo umakgolh lu laklanka taʼakglhuwit ni nawaniyaw tiku akgskgawika pi tlakg tlan namakgxtakga tiku tawi o ni namakgxtakga. Maski lakgkgolotsin xalak congregación chu amakgapitsi natalan tiku tliwakga wi xtakanajlakan tlan namakgtayanankgo chu namastakgo tastakyaw xalak Biblia, xlikatsitkan pi tiku liwana katsi la wilakgolh xachixku chu xapuskat wa Jehová. Komo chatum kstalanina Cristo puskat o (chixku) kaj maliwaka taʼakglhuwit nema kgalhi kxtamakgaxtokgat xlakata tlan namakgxtakga tiku tawi, limasiya pi ni maxkima kakni tamakgaxtokgat nema malakatsukilh Dios. Nachuna, Jehová katsi tiku akgsaninama, maski max lu liwana lakkaxwilinit xlakata natasiya pi xlikana. Nachuna, «nitu anan ntamalakatsukun mpala tu ntakglhpatsekga kxlakatin; wampi wa mpaks stalanka ukxilha xlipaks nkatuwaj [...] xlakgastapu nkinkaliʼukxilhan yuma nti nkilimakamaxkitkan nkuintaj» (Hebreos 4:13). Pero, komo xlikana wi tuku lama nema lu katuwa nawili xlatamat o xtakanajla chatum puskat o chixku tiku kstalanina Cristo, max nalaksaka namakgxtakga tiku tatamakgaxtokgnit, niti nawan pi nitlan tuku tlawalh. Xlakata, «kimputumkan wa Dios nakinkalakputsananiyan» Dios (Romanos 14:10-12TNM).