Ankan kxpulakni

Ankan xlipulaktiy niku tsuku

Xtatayananin Jehová

totonaco

¿Katsiputuna tuku xaxlikana?

¿Katsiputuna tuku xaxlikana?

¿TUKU tama xaxlikana nema kilikatsitkan? Makgapitsi takgalhskinin tlakg xlakaskinka nema tlawakgoy latamanin. Max asta wix kgalhskinka akgtum kilhtamaku:

  • ¿Pi kinkapaxkiyan Dios?

  • ¿Namin kilhtamaku akxni nasputa guerra chu tapatin?

  • ¿Tuku kinkaʼakgspulayan akxni niyaw?

  • ¿Pi tlan nalatamaparakgoy tiku nikgonitta?

  • ¿La naktlaway oración xlakata Dios nakinkgaxmatniy?

  • ¿La tlan naktekgsa tapaxuwan?

¿Niku xputsa xtakgalhtin umakgolh takgalhskinin? Anankgoy akglhuwa mil libros nema wankgoy pi tlan kgalhtikgoy umakgolh takgalhskinin. Lhuwa anankgoy nema mastakgoy xatakgalhtin pero alistalh lakgpaliparakgoy tuku pulana xwankgonitta. Amakgapitsi mastaparakgoy xatakgalhtin nema tlan takgaxmata kaj akxni katsokgkan, pero ni makgas kilhtamaku titaxtuy nialhti kuenta katlawaniy chu kalakkaxwilikan xtakgalhtinkan o katlawakan atanu likgalhtawakga xlakata xlakgxokgo nawan.

Pero anan maktum libro nema limin takgalhtin nema tlan nalipawanaw chu xaxlikana. Jesucristo uma tuku wa akxni tlawanilh oración Dios: «Wa mintachuwin, talulokgtat [o xaxlikana]» (Juan 17:17). Uku lilakgapaskan uma Tachuwin, Biblia. Wantuku naʼakxilhaw uku, wa xatakgalhtin takgalhskinin nema pulana akxilhwi, kBiblia maxtukanit xatakgalhtin nema tlan nalipawanaw chu liwana takgatekgskgoy o tamakgachakgxi.

 ¿Pi kinkapaxkiyan Dios?

¿TUKU XLAKATA TAWILA UMA TAKGALHSKININ? Lamaw kkakilhtamaku niku nitlan likatsikgokan chu nitlawakgokan tuku xalakatitum. Lhuwa takanajla masiyakgoy pi xtalakaskin Dios chuna la patinamaw.

WANTUKU MASIYA BIBLIA. Dios nikxni tlawa tuku nitlan. Job 34:10 wan: «¡Makgat katawilanilh xaxlikana Dios xlakata natlaway tuku nitlan, chu makgat katawilanilh tiku kgalhi Xliputum Litliwakga xlakata natlaway tuku ni xalakatitum!». Xlakata Dios xapaxkina lu lilakgatit tuku lakapastaknit natlawa xlakata latamanin, wa xlakata, Jesús masiyalh pi akxni natlawayaw oración naskinaw: «kinTlatikan tiku wilapi kʼakgapun [...]. Kamilh milimapakgsin wa nkatatlawalh ntu mintalakaskin xtachuna la kʼakgapun nachuna kawa kkatiyatni» (Mateo 6:9, 10). Xlikana, Dios kinkapaxkiyan wa xlakata tlawalh tuku lu tuwa makgkatsilh xlakata nakgantaxtuy xtalakaskin (Juan 3:16).

Na kaʼakxilhti Génesis 1:26-28; Santiago 1:13, chu 1 Pedro 5:6, 7.

¿Namin kilhtamaku akxni nasputa guerra chu tapatin?

¿TUKU XLAKATA TAWILA UMA TAKGALHSKININ? Guerra chuntiya lhuwa kamakgnima latamanin. Chu kimputumkan wi tuku lipatinanaw.

WANTUKU MASIYA BIBLIA. Dios wanit pi nialh katianalh takglhuwit unu kKatiyatni. Akxni wa namapakgsinan xTamapakgsin xalak akgapun, latamanin nialh «katikatsikgolh natlawakgoy guerra» chu asta «namastalankikgo xʼespadakan chu nalitlawakgoy arado» (Isaías 2:4). Nikajwatiya tama, Dios namalakgsputuy tuku ni xaʼakgstitum chu tapatin. Biblia wan tuku natlawa Dios xlakata latamanin: «Na paks naxakanikgo Dios xlakgpixtajatkan: na nialh katianalh linin; chu na nialh katianalh ntalipuwan, ni mpala wa ntatasa, chu na ni mpala wa ntakatsanajwat; xampi wa xlipaks nkatuwa, wa ntu xʼanan xakgasiyaj, [na namasputukan tuku nixaʼakgstitum chu tapatin] paks lakgsputli» (Apocalipsis 21:3, 4).

Na kaʼakxilhti Salmo 37:10, 11; 46:9, chu Miqueas 4:1-4.

¿Tuku kinkaʼakgspulayan akxni niyaw?

¿TUKU XLAKATA TAWILA UMA TAKGALHSKININ? ¿Lhuwa takanajla masiyakgoy pi wi tuku kgalhiyaw nema latamajku maski ninitawa. Makgapitsi wankgoy pi tiku nikgonit katlawani tuku nitlan wantiku lamakgolhku, o wankgoy pi Dios kamalakgaxokge wantiku nitlan likatsikgo xlipaks kilhtamaku anta kpupatin.

WANTUKU MASIYA BIBLIA. Akxni niyaw nialh latamayaw. Eclesiastés 9:5 wan pi «wantiku nikgonita nialh tuku katsikgoy». Ni tuku katsikgoy, nitu makgkatsikgo, ni tuku la tlawakgoy, wa xlakata na nila katlawaniy tuku nitlan wantiku lamakgolh, chu na nila kamakgtayakgoy (Salmo 146:3, 4).

Na kaʼakxilhti Génesis 3:19 chu Eclesiastés 9:6, 10.

 ¿Pi tlan nalatamaparakgoy tiku nikgonitta?

¿TUKU XLAKATA TAWILA UMA TAKGALHSKININ? Kinputumkan xalipaxaw katalatamaputunaw wantiku kapaxkiyaw. Wa xlakata kaʼakxilhputunparayaw tiku xkapaxkiyaw chu tanikgonitta.

WANTUKU MASIYA BIBLIA. Lhuwa latamanin tiku nikgonitta nalatamaparakgoy. Jesús wa pi «tiku aknukgoy [o tiku takgtapukgonit], nakgaxmatkgoy xtachuwin, nataʼakxtupalakgoy» (Juan 5:28, 29). Latamanin tiku nalakastakwanankgoy anta unu kKatiyatni nalatamaparakgoy chu naʼakxilhkgoy akxni xakalipaxaw nawan chuna la Dios xlakpuwanit pulana (Lucas 23:43). Chuna nawan, akxni natawila tama tuku lu lilakgatit, latamanin tiku ni katimakgatsankgananikgolh Dios nalipaxawakgoy latamat nema ni kgalhiy xlisputni chu ni katitatatlakgolh. Biblia wan: «Xalaktankswa xlakan nawan ama lipaxaw pulataman [...] kanikxniwa natalatama ana» (Salmo 37:29).

Na kaʼakxilhti Job 14:14, 15; Lucas 7:11-17, chu Hechos 24:15.

¿La naktlaway oración xlakata Dios nakinkgaxmatniy?

¿TUKU XLAKATA TAWILA UMA TAKGALHSKININ?. Putum tiku tapakgsikgoy kʼakgtum takanajla tlawakgoy oración. Pero lhuwa latamanin lakpuwankgoy pi xʼoracionkan ni kakgalhtikan.

WANTUKU MASIYA BIBLIA. Jesús masiyalh pi nitlan watiya watiya nawanaw akxni tlawayaw kioracionkan. Xla wa: «Akxni ntlawayatit mioracionkan, ni makglhuwa ntiwana tu watiya ntachuwin ni kgalhi xlakgasi» (Mateo 6:7). Komo lakaskinaw pi Dios kakinkakgaxmatnin, kilitlawanitkan oración chuna la xla tlan akxilha. Wa xlakata kilikatsitkan xtalakaskin chu naskinaw kkiʼoracionkan chuna la xtalakaskin Dios. Anta 1 Juan 5:14, liwana kinkawaniyan: «Mpi lapi wi mpala tu kskiniw, wa lantlata xtalakaskin, wa nakinkakgaxmatniyan».

Na kaʼakxilhti Salmo 65:2; Juan 14:6, 14, chu 1 Juan 3:22.

¿La tlan naktekgsa tapaxuwan?

¿TUKU XLAKATA TAWILA UMA TAKGALHSKININ?. Xlakata lhuwa lakpuwankgoy pi tumin, lhuwa nakalakgapaskan o xlakata stlan natasiyakgoy chuna nakaliminiy tapaxuwan, lhuwa latamanin wa uma tuku putsakgoy. Pero chuntiya ni paxuwakgoy.

WANTUKU MASIYA BIBLIA. Jesús masiyalh la tlan napaxuwakan akxni wa: «Paxuwana lamakgo wantiku katsikgo pi maklakaskinkgo tuku xla Dios» (Mateo 5:3). Kajwatiya xlikana napaxuwayaw komo naputsayaw wantuku tlakg maklakaskinaw: nalimasiyayaw pi lu katsiputunaw wantuku xaxlikana xlakata Dios chu wantuku lakapastaknit natlawa. Uma tuku xaxlikana anta wi kBiblia, chu komo nalakgapasaw, nakinkamakgtayayan nakatsiyaw tuku lu xlakaskinka chu tuku ni xlakaskinka. Akxni mastayaw talakaskin pi Biblia kakinkapulalin xlakata tuku nalaksakaw natlawayaw kkilatamatkan chu la linaw kilatamatkan, kajwatiya chuna tlakg napaxuwayaw (Lucas 11:28).

Na kaʼakxilhti Proverbios 3:5, 6, 13-18 chu 1 Timoteo 6:9, 10.

 Kajku tsinu akxilhnitawa xatakgalhtin nema mastay Biblia xla uma akgchaxan takgalhskinin. ¿Tlakg katsiputuna? Komo wix nachuna la «tiku katsikgoy pi maklakaskinkgoy tuku xla Dios», tlakg nakatsiputuna. Max nakgalhskinkana tuku xlakata Dios mastanit talakaskin pi lu lhuwa kaʼanalh tuku nitlan chu tapatin komo xlikana kinkapaxkiyan. O max nakatsiputuna la tlakg tlan nakatatawilaya mifamilia. Biblia liwana mastay xatakgalhtin umakgolh takgalhskinin chu amakgapitsi.

Pero lhuwa latamanin ni putsaputunkgoy xatakgalhtin xtakgalhskininkan anta kBiblia. Akxilhkgoy la maktum libro tuku lhuwa páginas kgalhi chu lu tuwa akgatekgskan. ¿Xlakaskinti tlan xmakgtayaka natekgsa takgalhtin nema mastay Biblia? Wa xlakata xtatayananin Jehova, pulaktiy tuku tlan nalimakgtayakgoyan.

Xapulana wa libro ¿Tuku xlikana masiyay Biblia?, tlawakanit xlakata nakalimakgtayakan latamanin, chu uma libro tlakg tlan nakalimakgalhtawakgekan wantiku lhuwa taskujut kgalhikgoy xlakata naʼakxilhkgoy xatakgalhtin nema mastay Biblia, makgapitsi takgalhskinin nema lu xlakaskinka anankgoy. Xlipulaktiy wa nalimasiyanikana maktum likgalhtawakga kminchik chu ni naxokgoya. Chatum xtatayana Jehová tiku lu katsiya tlan nalakganan kminchik, ni naxokgoniya chu xatapaxuwan namasiyaniyan o alakatanu niku wix tlan naʼakxilha, xlakata nalimaxtuyatit tsinu kilhtamaku akgatunu semana nalikgalhtawakgayatit Biblia. Lhuwa millones latamanin litamakgtayakgonit umakgolh takgalhtawakga, chu lhuwa wankgoy pi aku tekgskgolh tuku xaxlikana.

Wix na tlan nakatsiya pi xaxlikana tuku masiyay Biblia nitu la tamalakxtumikan la xlilhuwa kxtapalh. Ni kajwatiya kinkalakgmaxtuyan, xlakata talismanin xla magia, ni xataʼakgtsankgan nalatamayaw, na ni napekuaniyaw makgapitsi takanajla nema anankgoy, wata nakinkamakgtayayan xlakata nakgalhiyaw takgalhkgalhin, tlan nalatamayaw chu napaxuwayaw. Asta Jesús wa: «nalakgapasatit ntalulokgtat [o tuku xlikana], chu na wa ntalulokgtat, nakamalakgtaxtiyan» (Juan 8:32).