Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 PULAKTIY

Tuku nitlan kinkaʼakgspulayan: «Pulaklhuwa la kinkatlawanikanan tuku nitlan»

Tuku nitlan kinkaʼakgspulayan: «Pulaklhuwa la kinkatlawanikanan tuku nitlan»

June wan: «Akxni xtitaxtunita 25 kata lata xaktamakgaxtokgnitaw, kinchixku chu akit klakxtlawaw kintamakgaxtokgatkan. Kinkamanan makgxtakgolh xaxlikana takanajla. Chu kinchipalh tipalhuwa xatuwa tajatat. Wa xlakata kkgalhilh tajatat xla talipuwan. Xaklakpuwan pi putum tuku xaktlawanit xlaklanit chu nialhla tuku xaktlawa. Nialh kalh ktamakxtumit chu nialh klichuwinalh Dios».

PUTUM xlakskujnin Dios kaʼakgspula tuku nitlan. Salmista tsokgli: «Lu xakklilipuwama tuku nitlan xkiʼakgspulama» (Salmo 94:19TNM). Chu Jesús wa pi kxaʼawatiya kilhtamaku, kskujnin Dios tlakg xʼamakgo kgalhikgo «taʼakglhuwit nema titaxtukan klatamat» (Lucas 21:34TNM). Chu wix, ¿lu nitlan limakgkatsiya xlakata ni kgalhiya tumin, kgalhiya taʼakglhuwit kmifamilia, o tatatlaya? ¿La namakgtayayan Jehová natayaniya?

«Litliwakga nema lakatsala kilitliwakgakan»

Nila kiakstukan katitayaniw taʼakglhuwit. Apóstol Pablo tsokgli pi «pulaklhuwa la kinkatlawanikanan tuku nitlan [...]; ni katsiyaw tuku natlawayaw [...]; kinkalikatalakanan». Pero na wa pi ni wilaw «chuna la nialhla natatsuwiyaw», «ni wamputun pi nila tuku natlawayaw» chu «ni kinkamasputukanan». ¿Tuku nakinkamakgtayayan natayaniyaw? «Litliwakga nema lakatsala kilitliwakgakan», wa nema masta Jehová Dios tiku kgalhi xliputum litliwakga (2 Corintios 4:7-9TNM).

Kalilakpuwanti la xmaxkiyan «litliwakga nema lakatsala kilitliwakgakan». ¿Lakapastaka akgtum taʼakgchuwin nema lu matliwakglhnan chu tlawalh pi tlakg xlakaskinka xʼakxilhti xtapaxkit Jehová nema ni makgxtakgnan? ¿Tlakg kanajlani tuku Jehová wanit pi natlawa akxni kalitachuwinanti amakgapitsi mintakgalhkgalhin xlakata paraíso? Akxni xpina ktamakxtumit chu xkalitachuwinana amakgapitsi mintakanajla, xmatliwakglhan natayaniya tuku nitlan xʼakgspulayan chu wa xlakata tlan xatapaxuwan kskujnaniya Jehová.

Kaʼakxilhtit la Jehová Dios lu tlan likatsi

Xlikana pi minkilhtamaku ni katsiyaw tuku nalaksakaw natlawayaw. Akgtum liʼakxilhtit, Jehová kinkawaniyan pi pulana kaputsaw xTamapakgsin chu chuntiya kaskujniw (Mateo 6:33; Lucas 13:24). Pero taputsastalanit, tajatat chu taʼakglhuwit kmifamilia, ¿tlawanit pi nialhla namakgantaxtiya la skujnaniya Dios? O xlakata lhuwa kilhtamaku makglhtiyan mintaskujut, ¿nila akxtum katatawilaya congregación? Xlakata lhuwa tuku kilitlawatkan chu ni lhuwa kilhtamaku kgalhiyaw, uma tlawa pi lu nitlan namakgkatsiyaw. Max nalakpuwana pi Jehová lu lhuwa tuku skiniyan.

Jehová akgatekgsa. Ni kinkaskiniyan tuku nila katitlawaw. Katsi pi talakaskin nalimaxtuya kilhtamaku xlakata najaxa (Salmo 103:13, 14).

Kalilakpuwaw la Jehová kuentajtlawalh Elías. Akxni Elías xtaxlajwaninit chu xpekuama, alh kdesierto, ¿kilhnilh Jehová chu wanilh pi xtaspitli xlakata xmakgantaxtilh xtaskujut? Ni. Jehová makgtiy malakgachalh xʼángel xlakata ni pixlanka xwanilh Elías pi nialh klhtatalh chu maxkilh  tuku nawa. Maski chuna, 40 kilhtamaku alistalh, Elías chuntiya nitlan xmakgkatsi chu xpekuama. ¿Tuku tlawapa Jehová xlakata namakgtaya? Pulana, Jehová limasiyanilh pi tlan xmakgtaya. Xlipulaktiy, tlan mamakgkatsinilh akxni ni pixlanka tachuwinalh. Chu awatiya, makatsinilh pi lhuwa miles tiku xkakninanikgo chu ni xmakgxtakgkgo chuna la Elías. Kaj ni makgas, xatapaxuwan tsukupa palakachuwinan Dios (1 Reyes 19:1-19). ¿Tuku kinkamasiyaniyan? Akxni Elías nialh xkatsi tuku natlawa, Jehová lakgalhamalh chu ni kilhnilh. Xla nitu talakgpalima. Nachuna lu nakuentajtlawayan.

Akxni nalilakpuwana la xlilhuwa tlan naskujnaniya Jehová, ni kalakpuwanti pi lakapala natlawaya tuku xtlawaya. Ni katamalakxtumi tuku xtlawaya makgasa. Akgtum liʼakxilhtit: Chatum tiku kgosnan, chu akglhuwa papaʼ o lhuwa kata nialhpara tsinu kgosnan. Akxni tsukupara kgosnan tsinu tsinu tsuku xlakata natatliwakglhpara chu tlan nakgosnampara la xapulana. Kstalaninanin Cristo xtachuna la tiku kgosnankgo. Talakaskin nalakgtawakgakgo chu liwana xlilakkaxwilitkan tuku tlawaputunkgo (1 Corintios 9:24-27). ¿Tlan xlakkaxwili tuku tlan namakgantaxtiya la uku xlakata naskujnaniya Dios? Akgtum liʼakxilhtit, max tlan nalakkaxwiliya napina ktamakxtumit. Kaskini Jehová kamakgtayan xlakata tlan chuna natlawaya. Chuna tlan natatliwakglha mintakanajla, chu naʼakxilha pi Jehová Dios lu tlan likatsi (Salmo 34:8). Kalakapastakti pi putum tuku tlawaya xlakata nalimasiyaya pi paxkiya Jehová, maski ni lu lhuwa, xla lu xlakaskinka akxilha (Lucas 21:1-4).

Jehová ni kinkaskiniyan tuku nila katitlawaw

«Tamakgtay nema xakmaklakaskima»

¿La makgtayalh Jehová June xlakata xlakgtaspitpa? Xla wan: «Xaktlawani oración Jehová, xakskini xkimakgtayalh. Alistalh xpuskat kinkgawasa kiwanilh xlakata akgtum lanka tamakxtumit nema xʼama tatlawa kkinkachikin. Chu klakkaxwililh nakan akgtum kilhtamaku kʼuma tamakxtumit. ¡Lu tlan klimakgkatsilh xlakata amakgtum akxtum xakkatawi xkachikin Jehová! Ama tamakxtumit wa tamakgtay nema xakmaklakaskima. La uku lu xatapaxuwan kskujnanimapa Jehová. Chu klimaklakaskima kilatamat xlakata naktlawa tuku lu xlakaskinka. Liwana kkatsi pi ni xlilat naktamakgatlini chu kiʼakstu naklatama. Kpaxtikatsini pi kkgalhilh kilhtamaku naklakgtaspitpara Dios».