Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Kalakgtaspitti Jehová

 PULAKTUM

«Nema tsankganit nakputsa»

«Nema tsankganit nakputsa»

Borrego ni katsi tuku natlawa. Akxni xputswayama tsinu tsinu katamakgatlinilh amakgapitsi borregos chu xkuentajtlawana. La uku, nialh akxilha amakgapitsi borregos nipara xkuentajtlawana. Amaja tsiswan. Akgtsankgalapula kxakaxtum niku anankgo lapanit chu ni anan tiku namakgtaya. Kaj xalan kgaxmata pi wi tiku chuwinan chu kgalhlakgapasa, wa xkuentajtlawana chu lakapala lakgan xborrego, chaxa, limakgswita klhakgat chu lin kxchik.

JEHOVÁ makglhuwa tamalakxtumikan la chatum xkuentajtlawana borrego. Anta kxTachuwin, kinkawaniyan: «Nakkaputsa kiborregos chu nakkakuentajtlawa» (Ezequiel 34:11, 12).

«Borregos nema akit kkakuentajtlawa»

¿Tiku litaxtukgo xborrego Jehová? Wa tiku paxkikgo chu kakninanikgo. Biblia wan: «Katatsokgostaniwij. Tsokgostaj kalakgachixkuwiw [Jehová, TNM] ti kinkatlawanitan. Porque wata wa kiDioskan; ankin ixkamanan nima kalaksaknit, ankin la borregos y xla kinkamakgtakgalhan» (Salmo 95:6, 7). Chuna la tantum borrego stalani xkuentajtlawana, tiku kakninanikgo Jehová, xatapaxuwan stalanikgo xKuentajtlawanakan. Maski stalanikgo, kgalhikgo talakgalhin. Kskujnin Dios minkilhtamaku litaxtukgo la borrego «nema akgawani lamakgo», «borregos nema tsankgakgonit», chu «xtachuna xaʼakgtsankgan» borrego (Ezequiel 34:12; Mateo 15:24TNM; 1 Pedro 2:25). Maski chuna,  akxni tamakgatlikgo, Jehová ni lakpuwan pi nialhla katitaspitkgolh.

¿Makgkatsiya pi Jehová chuntiyaku minKuentajtlawana? ¿La limasiya Jehová pi la uku chatum Kuentajtlawana litaxtu? Kaʼakxilhwi pulaktutu la tlawa:

Kinkamaxkiyan taway xaʼespiritual. Jehová wan: «Nakkamapuchwayani niku anan lakstlan sekget. Nalatamakgo niku xakastlan, chu anta niku anan tlakg xalakstlan sekget napuchwayankgo» (Ezequiel 34:14). Jehová putum kilhtamaku kinkamaxkiyan lhuwa taway xaʼespiritual akxni maklakaskinaw chu lu tlan kinkamamakgkatsiniyan. ¿Tlan xlakapastakti akgtum artículo, akgtum taʼakgchuwin o akgtum video nema Jehová likgalhtin mioración akxni skini tamakgtay? ¿Ni malakpuwanin pi Jehová kuentajtlawayan?

Kinkakuentajtlawayan chu kinkamakgtayayan. Jehová kinkawaniyan: «Nema anu anu lama naklimimpara, chu nema talaktukxnit nakchini niku talaktukxnit chu nema ni tliwakga nakmatliwakglha» (Ezequiel 34:16). Jehová kamatliwakglha tiku xlajwanankgonit o nialh tayanikgo tuku nitlan titaxtumakgo. Kitaxtu la Jehová kachini niku tatukxnit xlukut xborregos akxni kamakgtaya nialh nakakatsani tuku nitlan katlawanikgonit tiku na kanajlakgo la xlakan. Chu kalimimpara tiku xtsankgakgonit chu tiku xlixlajwanankgonit talipuwan.

Makgkatsi pi lakgchan nakinkakuentajtlawayan. Jehová wan: «Nakkakilakgmaxtu kaniwa niku taʼakgawanikgolh», «nema tsankganit nakputsa» (Ezequiel 34:12, 16). Jehová nikxni lakpuwan pi tiku tamakgatlinikgonit nialh katitaspitkgolh. Xla katsi akxni tantum xborrego tsankganit, putsa chu lu lipaxuwa akxni tekgsa (Mateo 18:12-14). Jehová kalimapakuwi tiku kakninanikgo, «borregos nema akit kkakuentajtlawa» (Ezequiel 34:31). Chu wix litaxtuya tantum xborrego.

Jehová nikxni lakpuwan pi tiku tamakgatlikgonit nialh katitaspitkgolh

«Chuna kawampa la kilhtamaku xamakgasa»

¿Tuku xlakata Jehová putsaman chu waniyan pi kalakgtaspitti? Xlakata lakaskin pi napaxuwaya. Xla wan pi «chuna la sen na[...]kamakamini tasikulunalin» xborregos (Ezequiel 34:26). Uma tuku wanit xlikana nakgantaxtu, ni kaj tachuwin. Chu wix akxilhnitata tuku limasiya pi chuna nawan.

Kalilakpuwanti tuku titaxtunita lata lakgapasti Jehová. Akgtum liʼakxilhtit, ¿tuku makgkatsi akxni xapulana katsini xlakata xtukuwani Dios chu tuku lakapastaknit natlawa xlakata latamanin? ¿Lakapastaka la lu skaya limakgkatsi akxni akxtum xkatawila natalan klaklanka tamakxtumit? Akxni litachuwinanti xalakwan xalaksasti tiku lu lakgatilh, chu akxni taspitti kminchik, ¿ni xlikana pi lu xpaxuwaya chu lu tlan xlimakgkatsiya?

Wix tlan chuna napaxuwaparaya. Xalakskujnin Dios xala makgasa wankgolh: «Katlawa pi nakkalakgtaspitan, oh Jehová, chu lakapala nakkalakgtaspitan. Chuna kawampa la kilhtamaku xamakgasa» (Lamentaciones 5:21). Jehová kakgalhtilh xʼoracionkan, chu xkachikin lakgtaspitli chu xatapaxuwan skujnaniparakgolh (Nehemías 8:17). Jehová nachuna natlawa mimpalakata.

Ni tuwa wankan nalakgtaspitparakan Jehová pero tuwa tlawakan. Kalichuwinaw tuku tuwa tamakgkatsi chu tuku tlan natlawayaw xlakata ni nakinkamalakgachokgoyan.