Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Kakamasiyani minkamanan

 TAKGALHTAWAKGA 2

Rebeca xmakgapaxuwaputun Jehová

Rebeca xmakgapaxuwaputun Jehová

Rebeca chatum puskat tiku xpaxki Jehová. Xchixku xwanikan Isaac chu na xpaxki Jehová. ¿La lakgapasli Rebeca Isaac? ¿La xmakgapaxuwalh Rebeca Jehová? Tlakg kakatsiw xlakata Rebeca.

Xnatlatni Isaac xwankgonit Abrahán chu Sara. Xlakan xlamakgo kxtiyat Canaán, niku latamanin ni xkakninanikgo Jehová. Pero Abrahán xlakaskin pi xkgawasa xtatamakgaxtokgli tiku xkakninanilh Jehová. Wa xlakata malakgachalh kskujni, (max Eliezer) kHarán. ¿Tuku xlakata malakgachalh anta? Xlakata kHarán xlamakgolh makgapitsi xfamilia Abrahán chu anta Eliezer tlan xputsanilh chatum puskat Isaac.

Rebeca makglhuwa kitiyalh chuchut xlakata nakamakgotni camellos

Eliezer kataʼalh amakgapitsi kskujnin Abrahán. Lu lakgamakgat niku ankgolh. Xlinkgo 10 camellos, niku xlinkgo taway chu tamaskiwin. Pero ¿la xʼama katsi Eliezer tiku xʼama laksaka xlakata xpuskat Isaac xwa? Akxni Eliezer chu amakgapitsin skujnin chankgolh kʼHarán, tachokgokgolh niku xtiyakan chuchut xlakata xkatsi pi xʼamakgo minkgo laktsuman tiku xtiyakgo chuchut. Xla tlawanilh oración Jehová chu wanilh: «Tsumat tiku nakskini chuchut chu xla nakimaxki chu na nakamaxki chuchut camellos, wa naklikatsi pi wa uma tsumat tiku laksaknita».

 Kaj lipuntsu Rebeca chilh kpozo. Biblia wan pi lu stlan xwanit. Eliezer skinilh chuchut chu xla wa: «Nakmaxkiyan chuchut chu na nakmaxki mincamellos». Camellos lhuwa wakgo chuchut, wa xlakata Rebeca lhuwa chuchut makutulh. ¡Makglhuwa kitiyalh chuchut! Kaʼakxilhti dibujo xla página 6. ¿Tuku tlawama Rebeca?... Akxni Eliezer akxilhli pi lhuwa kskujma kaks lilakawa: ¡Jehová xkgalhtinit xʼoración!

Eliezer maxkilh Rebeca lhuwa lakstlan tamaskiwin chu xla wanilh Eliezer chu tiku xtaʼankgo kaʼankgolh xchik kxfamilia. Eliezer lichuwinalh tuku xlakata Abrahán xmalakgachanit kHarán chu la kgalhtilh Jehová xʼoración. Xfamilia Rebeca lu lipaxuwakgolh. Wanikgolh Eliezer: «Tlan kakxilhaw pi Rebeca katatamakgaxtokgli Isaac».

Rebeca taʼalh Eliezer kCanaán chu tatamakgaxtokgli Isaac

¿Pero xtatamakgaxtokgputulh Rebeca Isaac?... Akxni xfamilia kgalhskilh komo xtatamakgaxtokgputun Isaac, Rebeca wa: Chuna, nakan. ¿Tuku xlakata? Xlakata Rebeca xkatsi pi wa Jehová xmalakgachanit Eliezer. Wa xlakata Rebeca taʼalh Eliezer chu akxni xla chalh kCanaán, tatamakgaxtokgli Isaac.

Xlakata Rebeca tlawalh xtalakaskin Jehová, xla lu kuentajtlawalh. Chu ni kajwatiya uma: Jesús milh anta kxfamilia Rebeca. Komo wix nakgalhakgaxpata Jehová chuna la Rebeca chu namakgapaxuwaya, xla lu nakuentajtlawayan.

KALIKGALHTAWAKGAW KBIBLIA:

  • Génesis 12:4, 5; 24:1-58, 67