Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 TAKGALHTAWAKGA 18

Xlipan xʼamigo Dios kawanti

Xlipan xʼamigo Dios kawanti

Tuwa teakgskan chatum amigo, nachuna tuwa ninamakgatsankgaya. Min takgoxajlat xpalakata xʼamigo Dios nawana namaxkiyan lhuwa tasikulunalin. Jesus kawanilh tiku xkanajlanikgoy: “Xaxlikana nakalakgmaxtuyan” (Juan 8:32, NM). ¿Tuku wamputun uma?

Tlan natawilaya niaj tuku katisakgalin. Niaj katikasakgalin nixaxlikana xtamasiy chu xtakgsanin Satanas, nema malakgatuminit. Chu niaj kintikasakgalin talipuwan wantuku litsamay xlatamat chalhuwa miyon kristiano tiku ni kgalhikgoy takgalhkgalhin xpalakata ni lakgapaskgoy Jiova (Romanos 8:22). Xʼamigo Dios nanikatisakgalikgolh “xatapekuaniy linin” (Hebreos 2:14, 15).

Tlan nalatapaya niaj tuku katisakgalin anta niku natawilakgoy latamanin kxasasti Katiyatni xla Dios. ¡Lutlan nalatapaya niaj tuku katisakgalin! Akxni Katiyatni akgtum paraiso nawan, niaj katiʼanalh guerra, tajatat chu tiku lakatsalay talimapakgsin. Ni katiʼanalh talimaxkgat chu tatsinkstat. Niaj tiku katikgololh chu niajti katinilh, nachuna tapekua, talaʼakgchipan, chu talaksakpaxkit niaj katianalh. Biblia wan xlakata Dios: “Lakalitana mimakan tlania kasikuanatlawaya wakg ti staknan talamanaj” (Salmo 145:16, S).

 Xʼamigo Dios xlipan nalatamakgoy. Xaxlipan latamat wa akgtum tamaskiwin xla Dios, kgalhiy lhuwa xtapalh chu nakamaxkiy wanti xʼamigo wamputunkgoy (Romanos 6:23). ¡Kalakapastakti puntsu tuku wamputun xlipan nalatapaya!

Nalimakgwaniyan xpalakata lhuwa tuku natlawaya. Max nakatsiputuna natlakga akgtum litlakgni. Max nakatsiputuna lantla namaniya tuku xastlan o lantla xwaknankan. Max nakalikatsiniputuna takgalhinin o tachanan. Max xlakgati kaniwa xpit chu xlakgapasti laklanka kachikinin chu xlatamanin. Anta nak xaxlipan latamat paks uma nakgantaxtuy.

Nalimakgwaniyan nateakgsa lhuwa amigo. Akxni xlipan nalatapaya tlan nakalakgapasa chalhuwa xʼamigo Dios. Nakatsiya tuku lakgatikgoy tlawakgoy chu nakalakgapasa lantla likatsikgoy; nachuna tlan mi amigo nakatlawaya. Napaxkikgoya chu nanapaxkikgoyan (1 Corintios 13:8). Xlakata naʼanan latamat xaxlipan, naʼanan kilhtamaku xlakata paks latamanin xalaʼ kKatiyatni mi amigo nawankgoy. Tlakgtlan: mintalalinat kon Jiova natatliwakglha akxni natitaxtutilhakgoy akglhuwa siento kata. ¡Tlan xaxlipan xʼamigo Dios nawanaw!