Ankan kxpulakni

Ankan kliputsan

Xtatayananin Jehová

Laksakkan tachuwin totonaco

 SECCIÓN 10

Salomón xaskgalala mapakgsina

Salomón xaskgalala mapakgsina

Jehová lhuwa liskgalala maxkilh mapakgsina Salomón. Akxni mapakgsinalh, israelitas kgalhikgolh takaksni chu lhuwa tuku kgalhikgolh

¿LA XLATAMAKGOLH akgtum kachikin komo xputumkan chu xmapakgsina ni xmakgatsankgananikgolh Jehová chu xtapakgsinikgolh? Xtakgalhtin kinkamaxkiyan xtamapakgsin Salomón, nema mapakgsinalh tipuxum kata.

Akxni nina xniy, David wa pi xkgawasa Salomón wa xʼama mapakgsinan. Akgtum kilhtamaku, Dios tachuwinalh Salomón kʼakgtum tamanixni chu wanilh pi namaxki tuku nalakaskin. Salomón skilh liskgalala chu takatsin xlakata akgstitum nakamapakgsi kachikin. Jehová lakgatilh tuku skinilh wa xlakata maxkilh. Nachuna, wanilh pi komo chuntiya xkgalhakgaxmatli, namaxki lhuwa tumin, lilanka chu makgas nalatama.

Xlakata xkgalhi liskgalala, Salomón lhuwa lakgapaska. Akgtum kilhtamaku, lakgankgolh chatiy lakpuskatin xlakata xlalakgamakglhtima kskgatakan. ¿Tuku tlawalh Salomón? ¡Wa pi akgputiy xtlawaka uma skgata! Xapulana puskat wa pi xlakchukuka chu xlichatiy wa pi ni chuna xtlawaka chu xmaxkika xapulana puskat. Chuna Salomón katsilh pi xlichatiy puskat wa xaxlikana xtse skgata. Akxni kachikin katsilh tuku lalh, akgatekgskgolh pi Salomón xkgalhi xliskgalala Dios.

Tuku tlakg lanka nema tlawalh uma mapakgsina wa xalilakgatit xtemplo Jehová kJerusalén, niku kachikin Israel xʼamakgo kakninanikgo Jehová. Akxni masastika templo, Salomón tlawanilh oración Dios niku wa: «¡Kaʼakxilhti! Akgapun, xlikana pi akgapun ni akchaʼaniyan; ¡chu uma chiki nema ktlawanit tlakg ni katiʼakchanin!» (1 Reyes 8:27).

Salomón lu lhuwa lakgapaska asta lichuwinanka makgat kachikinin, la Seba (o Saba) anta kʼArabia. Xmapakgsina uma kachikin alh kʼIsrael xlakata naʼakxilha xlilanka chu la xlilhuwa tumin xkgalhi Salomón, chu nachuna xlakata naliʼakxilha xliskgalala. Kaks malakawanilh putum tuku akxilhli wa xlakata asta malankilh Jehová xlakata laksakli chatum mapakgsina tiku lu skgalala. Xlakata Dios sikulunatlawalh, xtamapakgsin Salomón wa tamapakgsin nema tlakg tlan xwi chu niku tlakg tawi takaksni xliputum tamapakgsin nema kgalhilh Israel.

Pero Salomón ni putum kilhtamaku stalanilh xliskgalala Jehová. Akgtum liʼakxilhtit, maski Dios xwanit pi mapakgsinanin nixkgalhikgolh lhuwa lakpuskatin, Salomón lhuwa lakpuskatin katatawi chu tuku tlakg nitlan, lhuwa tiku xkatawi xkakninanikgo nixaxlikana dioses. Chu kitaxtulh pi xlakpuskatin tsinu tsinu tlawakgolh pi xtamakgatlinilh Jehová chu na xkakninanilh ídolos. Wa xlakata Dios wanilh pi xfamilia nialh xʼama mapakgsi putum Israel. Dios ni xʼama makglhtikgo putum xtamapakgsin kaj xlakata tuku xmalaknuninit David. Xlikana, maski Salomón makgxtakgli, Jehová chuntiya lakapastakli talakkaxlan nema tatlawalh David.

(Takilhtinit capítulo 1 asta 11 xla 1 Reyes, capítulo 1 asta 9 xla 2 Crónicas chu Deuteronomio 17:17.)