Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 11

Takilhtlin nema kinkamasiyanikgoyan chu kinkamatliwakglhan

Takilhtlin nema kinkamasiyanikgoyan chu kinkamatliwakglhan

Dios kamalakpuwanilh David chu amakgapitsi xlakata natsokgkgo takilhtlin nema nalimalankikgo. Libro xla Salmos kgalhi 150 takilhtlin

LIBRO xalak Biblia nema tlakg lhuwa capítulos kgalhi, limin lhuwa takilhtlin nema tsokgnika Dios chu max akgtum mil kata litsokgka. Tiku tsokgkgolh lilakgatit la lichuwinankgolh lhuwa takanajla nema xkgalhikgo. Na tsokgkgolh tuku xmakgkatsikgo, la akxni xpaxuwakgo, xtakatsanajwatkan, akxni xpaxtikatsinikgo, akxni nitlan xlimakgkatsikgo tuku xtlawakgonit, akxni xmalankikgo Dios chu xtalipuwankan. Xputumkan xpaxkikgo Dios chu xmakgkatsikgo pi tlakg lakatsu xwilanikgo Dios. Kaʼakxilhwi makgapitsi tuku lichuwinan Salmos.

Jehová, wantiku Lakgchan Namapakgsinan xlikalanka kakilhtamaku, lakgchan namalankiyaw chu nakakninaniyaw. Salmo 83:18 liwana kinkawaniyan: «Katakatsilh ti kintasitsini xlakata wata wix Dios, y Jehová mintukuwani. Wata wix Dios xala talhman, ti mapakgsinan nak ixlitilanka katiyatni». Lhuwa salmos malanki Jehová xlakata tlawanit akgapun, staku, latamat kKatiyatni chu lu tlan la tlawanit kimaknikan (Salmos 8, 19, 139 chu 148). Lhuwa salmos na maxkikgo kakni akxni kamakgtayalh chu kalakgmaxtulh tiku ni makgxtakgkgo (Salmos 18, 97 chu 138). Chu amakgapitsi na tlinikgo Dios xlakata tlawa tuku xaʼakgstitum chu kamakgtaya akxni katlawanikan tuku nitlan tiku nitu tlawakgonit chu kamalakgaxokge tiku lixkajni xtayatkan (Salmos 11, 68 chu 146).

Jehová kamakgtaya chu kamatliwakglha tiku paxkikgo. Tlan nawanaw pi salmo nema tlakg lakgapaskan wa Salmo 23, niku David tamalakxtumi kinTlatikan xalak akgapun la chatum xapaxkina maputswayanina nema kapulalin, kamakgtaya chu kamakgtakgalha xborregos. Anta kSalmo 65:2 kinkamalakapastakayan pi Jehová “Kgaxmata oración”. Asta tiku tlawakgonit tuku lu nitlan kxlatamatkan kamakgtayanit tuku wan Salmos 39 chu 51. Anta David limasiya pi lu xlikana nitlan xlimakgkatsi lanka talakgalhin nema xtlawanit chu liwana xkatsi pi Dios natapati. Chu kSalmo 55:22 kinkawaniyan pi nalipawanaw Jehová chu namastayaw talakaskin pi nakinkatalinan kintakukakan.

Jehová namaklakaskin xTamapakgsin Mesías xlakata nalimin xasasti kakilhtamaku. Anta kSalmos tekgsaw lhuwa niku lichuwinan Mesías, Mapakgsina tiku xwankanit pi namin. Akgtum liʼakxilhtit, Salmo 2 lichuwinan pi uma Mapakgsina xʼama masputu kachikin tiku xtalalakatawakalh. Salmo 72 lichuwinan pi namasputu tatsinksni, tuku ni xaʼakgstitum chu tiku katlawanikgo tuku nitlan amakgapitsi. Salmo 46:9 wan pi Dios nalimaklakaskin xTamapakgsin xlakata namasputu guerras chu namasputu tuku limakgninankan. Nachuna, kSalmo 37 lichuwinan pi kxasasti kakilhtamaku nialh katianalh latamanin tiku lixkajni xtayat chu wantiku xaʼakgstitum nakgalhikgo takaksni chu tapaxuwan xliputum kilhtamaku.

(Takilhtinit kSalmos.)