Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 2

Katamakxtuka kParaíso

Katamakxtuka kParaíso

Chatum ángel tiku ni kgalhakgaxmatli Dios tlawalh pi Adán chu Eva nialh xtapakgsiniputunkgolh Dios. Tsukulh talakgalhin chu linin

AKXNI nina axkatlawakan latamanin, Dios katlawalh ángeles, espíritus nema nila kaʼaxilhaw. Chatum wantiku alistalh lilakgapaska Satanás o Akgskgawini ni kgalhakgaxmatninalh chu akgskgawilh Eva xlakata xwalh xtawakat kiwi nema Jehová xkawaninit pi ni xwakgolh.

Satanás tlawalh pi tantum luwa xtachuwinalh Eva chu malakpuwanilh pi xla chu xchixku wi tuku lu tlan xmakgatsankgamakgolh nema xkamatsekgnima Dios. Nachuna, wanilh pi komo xwalh tawakat nema xkawanikanit ni nawakgo, ni xnikgolh; chuna Satanás xlimasiyaputun pi Dios xkaʼakgskgawinit. Akgskgawini lu lilakgatit la kawanilh, limasiyalh pi komo ni xkgalhakgaxmatkgolh Dios nachuna xlakapastaknankgolh la Dios chu tlan xtlawakgolh tuku xlakaskinkgolh. Pero uma lu lanka taʼakgsanin: wa uma xapulana taʼakgsanin. Xlikana, akgsanina wa uma tuku xwamputun: ¿Lakgchan Dios namapakgsinan putum kkakilhtamaku? ¿Xaʼakgstitum xlimapakgsin? ¿Tlan nakinkakitaxtuniyan komo nakgalhakgaxmataw?

Eva akgskgawika. Tsukulh lakgati uma tawakat chu walh. Alistalh maxkilh Adán, chu xla na walh. Maski ni lu lanka tuku tlawakgolh, talakgalhin kitaxtulh xlakata ni kgalhakgaxmatninankgolh. Xlakan liwana xkatsikgo tuku xtlawamakgolh: xlakgmakgamakgolh xlimapakgsin xMalakatsukinakan, tiku xkamaxkinit putum tuku xkgalhikgo, asta xlatamatkan nema ni xkgalhi talakgalhin.

«Xla naʼaktayamiyan chu wix natsankxkitiya.» (Génesis 3:15)

Dios xʼama kamalakgaxokge tiku talalakatawakakgolh xlakata nitlan tuku xtlawakgonit. Pulana, wa pi kilhtamaku nema aku xmima, xʼama malakgacha chatum Lakgmaxtuna xlakata xmalakgsputulh luwa, o Satanás. Alistalh, wa pi Adán chu Eva xʼamakgo nikgo, pero kalakgalhamalh xkamanan nema xkgalhikgolh chu Dios ni tunkun kamasputulh Adán chu Eva. ¿Tukuya takgalhkgalhin xkgalhikgolh? Jehová kawanilh pi tiku xʼama malakgacha tlan kxapakgolh tuku nitlan xkitaxtunit kʼEdén. Pero ¿tiku uma Lakgmaxtuna, chu la xmakgantaxtilh xtalakaskin Dios xlakata tuku xlimalakgachamaka? Xtakgalhtin uma takgalhskinin taʼakgatekgstilalh o tamakgachakgxilh chuna la titaxtulh kilhtamaku, akxni xtsokgmaka Biblia.

Alistalh, Dios katamakxtulh Adán chu Eva kParaíso. Akxni nialh kʼjardín xwilakgolh, lu lhuwa kskujkgolh xlakata tlan xkgalhikgolh tuku xwakgolh. Chu ama kilhtamaku Eva kgalhilh chatum xkgawasa, Caín. Alistalh, kgalhiparakgolh xlakgawasan chu xlaktsuman, chatum xwanikan Abel chu achatum xwanikan Set, chu anta kilhtsukulh xfamilia Noé.

(Takilhtinit kGénesis kcapítulo 3 asta 5 chu Apocalipsis 12:9.)