Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 17

Jesús xlichuwinan xTamapakgsin Dios

Jesús xlichuwinan xTamapakgsin Dios

Jesús lhuwa tuku kamasiyanilh kstalaninanin, pero tlakg lichuwinalh xTamapakgsin Dios

¿TUKU xlakata milh Jesús kKatiyatni? Xla wa: «Nakan mastay xatlan tamakatsinin xla xtapakgsin Dios; xampi wa yuma nkilimakaminkanit» (Lucas 4:43). Kaʼakxilhwi pulaktati tuku xaxlikana masilh Jesús xlakata xTamapakgsin Dios, wantuku tlakg xlichuwinan.

1. Jesús Mapakgsina xʼama litaxtu. Jesús liwana limasiyalh pi wa Mesías (Juan 4:25, 26). Nachuna, wa pi xla wa Mapakgsina nema makxilhnika Daniel. Kawanilh xʼapóstoles pi xʼama chan kilhtamaku xla natawila «klikaknit xlaktawilh mpumapakgsin» chu xʼamakgo tamapakgsinankgo Jesús (Mateo 19:28). Umakgolh tiku natamapakgsinankgo kalimapakuwilh «ni xalhuwa borregos». Na lichuwinalh «amakgapitsi borregos» chu uma ni anta tapakgsikgo (Lucas 12:32, NM; Juan 10:16NM).

2. Wa xTamapakgsin Dios xlikana nalimin tuku xaʼakgstitum. Jesús masiyalh pi xTamapakgsin Dios namasantujli xtukuwani Jehová. ¿La xʼama tlawa? Namasputu putum tuku nitlan limawakanit Satanás xtukuwani Jehová nema matsukinit kʼEdén (Mateo 6:9, 10). Nachuna, Cristo limasilh pi kʼuma Tamapakgsin niti katilalakgmakgalh, xlakata kamasinilh lakchixkuwin chu lakpuskatin, tiku lhuwa tuku xkgalhi chu tiku nitu xkgalhi. Chu maski xmalakgachakanit xlakata nakamasiyani israelitas, liskujli xlakata nakamakgtaya samaritanos chu latamanin xalak amakgapitsi kachikinin. Jesús nichuna xwanit la tiku xpulalinkgo xtakanajlakan judíos kxkilhtamaku, xlakan nitlan tuku xlakpuwanikgo amakgapitsi chu xlaksakpaxkinankgo.

3. Wa xTamapakgsin Dios ni xʼama tapakgsi kkakilhtamaku. Jesús xlama akxni xkgalhikgo taʼakglhuwit judíos, xlakata uma kachikin wa xtapakgsinikgo atanu kachikin. Pero, nikxni tlawakgolh pi namakgtanu kpolítica (Juan 6:14, 15). Akxni xtachuwinama chatum mapakgsina, wa: «Wa nkilimapakgsin, ni anta xala yunu nkatuxawat» (Juan 18:36). Chu kstalaninanin kawanilh: «Ni xala katuxawat wixin» (Juan 15:19). Nachuna, ni mastalh talakaskin xmaxtukgolh tuku xlimakgninankan, maski kaj xlimakgtayaputunkgo (Mateo 26:51, 52).

“Xlatapuliy yama lhuwa laktsu kachikin wantu xwilakgo anta lakatsu, xliʼakgchuwinampulay lantla Dios xwiliputun xasasti xtapakgsit.” (Lucas 8:1, TXS [1999])

4. Cristo nalimasi tapaxkit akxni namapakgsinan. Jesús kamalaknunilh kstalaninanin pi xʼama kamakgtaya akxni xkgalhikgolh taʼakglhuwit (Mateo 11:28-30). Chu chuna tlawalh. Kamaxkilh laktlan tastakyaw nema xkamakgtayalh xlakata tuku xlilakgaputsakgo, xlakata ni lhuwa tuku xkgalhiputunkgolh, la xkatalalinkgolh amakgapitsi chu xlakata tlan xpaxuwakgolh (Mateo, capítulo 5 asta 7). Xla xapaxkina xwanit chu tlan xtachuwinankan. Putum latamanin xlakgankgo xlakata xkatsikgo pi tlan nakalikatsini chu ni katikalakgmakgalh. ¡Kimputumkan kgalhiputunaw chatum mapakgsina la Jesús!

Jesús tlawalh lhuwa tuku nila tamakanajla xlakata nalimasiya tuku natlawa xTamapakgsin Dios. ¿Tuku xlakata chuna tlawalh? Kaʼakxilhwi.

(Takilhtinit kMateo, kMarcos, kLucas chu kJuan.)