Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 18

Tuku nila tamakanajla nema katlawalh Cristo

Tuku nila tamakanajla nema katlawalh Cristo

Jesús tlawalh tuku nila tamakanajla xlakata nalimasiya la nalimaklakaskin xlitliwakga akxni Mapakgsina nawan

DIOS maxkilh litliwakga xKgawasa xlakata tlan xtlawalh lhuwa tuku nila tamakanajla, chu chalhuwa tiku akxilhkgolh. Chuna la tlawalh, Jesús limasiyalh pi xkgalhi litliwakga xlakata nakamalakgsputu wantuku latamanin nila masputukgo. Kaʼakxilhwi makgapitsi tuku nila tamakanajla nema tlawalh.

Tatsinksni. Xapulana tuku nila tamakanajla nema tlawalh Jesús wa akxni chuchut vino tlawalh. Amakgtiy, malhuwilh kaxtalanchu chu skiti o tamakgnin xlakata kamawilh lhuwa mil latamanin. Akxni chuna tlawalh akgataxtulh lhuwa liwat. Chu chuna la tlawalh limasiyalh pi tlan masta lhuwa liwat chu wantuku likgotnankan.

Tajatat. Cristo kakuchilh latamanin «xlipaks xtajatatkan, chu xtakatsanajwatkan» (Mateo 4:23). Kakuchilh tiku ni xlakawanankgo, akgatapanin, tiku nila xtlawankgo, tiku xkgalhikgo lepra chu tiku xkgalhikgo epilepsia. Xla xkamasputu putum tajatat.

Un chu sen. Akgtum katsisni, akxni Jesús chu kstalaninanin xtajumakgolh kpupunu nema xwi kʼGalilea tsukulh min un chu sen. Kstalaninanin lu pekuankgolh, pero Jesús kajwatiya lakalh kʼakgapun chu wa: «¡Kaks katawila, chu nialh katakgayawa!». Chu lakapala xunkli sen chu un (Marcos 4:37-39, TXS [1999]). Atanu kilhtamaku tlawalh kchuchut akxni xmima sen chu un (Mateo 14:24-33).

Nixatlan espíritus. Umakgolh espíritus nema kalilakgapaskan demonios, tlakg lakgtliwakga nixawa akinin. Asta kaputsastalakgo lhuwa latamanin chu nila tuku tlawakgo xlakata nakamakgxtakga. Pero Jesús ni xkapekuwani. Wata wa xpekuanikgo chu akxni Jesús xkawani pi kamakgxtakgkgolh tiku xkatanunima, tunkun xtaxtunikgo.

Linin. Uma talatlawana, tiku Biblia wani «xlikgatsputni, talatlawana» kinputumkan kinkatlajayan (1 Corintios 15:26). Pero nipara linin machokgolh Jesús, xlakata xla malakastakwanilh xkgawasa chatum puskat tiku xninita xchixku chu chatum aktsu tsumat. Pero tuku tlakg lanka nema tlawalh wa xlakata xʼamigo Lázaro, xla akgtati kilhtamaku xninita chu Jesús malakastakwanilh xlakatin lhuwa latamanin. Asta tiku ni xakxilhputunkgo wankgolh pi Jesús xkgalhi litliwakga (Juan 11:38-48; 12:9-11).

Pero titaxtulh kilhtamaku tiku kakuchilh Jesús tatatlakgolh chu nikgolh. Wa xlakata, ¿la makgtayaninalh uma tuku tlawalh? Lhuwa makgtayaninalh, xlakata limasiyalh pi tuku xlichuwinankanit xlakata xTamapakgsin Jesús xaxlikana. Xlikana pi tiku laksakli Dios xlakata Mapakgsina nawan namasputu tatsinksni, tajatat, un chu sen, demonios chu linin. Liwana litasiyalh pi Jehová maxkinit litliwakga xlakata chuna natlawa.

(Takilhtinit kMateo, kMarcos, kLucas chu kJuan.)