Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 9

Israel skin chatum mapakgsina

Israel skin chatum mapakgsina

Saúl xapulana mapakgsina xalak Israel ni kgalhakgaxmata Jehová. Dios tatlawalh akgtum talakkaxlan David wantiku tawi xlakgxokgo Saúl chu malaknuni pi xtamapakgsin nikxni katisputli

AKXNI nialhti xlama Sansón, latamalh kʼIsrael chatum juez chu na palakachuwina xwanit, xwanikan Samuel. Xlakata israelitas nachuna xwamputunkgo la amakgapitsi kachikinin, wanikgolh Jehová pi xlakaskinkgo chatum mapakgsina. Jehová ni lakgatilh tuku skinikgolh, pero kawanilh pi nakamaxki tuku kskinimakgolh chu wanilh Samuel pi mapakgsina xtlawalh Saúl. Xla xtataktuju, pero titaxtulh kilhtamaku tlanka makgkatsika chu nialh kgalhakgaxmatli Dios. Wa xlakata Jehová lakgmakgalh chu wanilh Samuel pi xlaksakli chatum kgawasa wanikan David xlakata xlakgxokgo xwa Saúl. Pero, xʼama titaxtu akglhuwa kata xlakata mapakgsina xwa.

Akgtum kilhtamaku, David kalakgalh xnatalan, tiku na ksoldados Saúl xwankgonit chu xtlawamakgo guerra. Akxni chalh, kaʼakxilhli soldados pi klhpipimakgo o xtatatlanamana xlakata lu xpekuankgonit. ¿Tuku xlama? Chatum lanka soldado filisteo wanikan Goliat katuwa tuku xkawanima israelitas chu Dios. David lu sitsilh wa xlakata wanilh pi natalachipa Goliat asta nalamakgni, maski kajku kgawasa xwanit. Kajwatiya akgtum puxkgontalatni o limakatalatni chu ni akglhuwa chiwix alh litalatlawa uma lanka soldado, tiku atsinu ni akgtutu metro xlilanka xwanit. Goliat likgalhkgamanalh, pero David wanilh pi xʼama makgatlaja xlakata xʼama litalachipa kxtukuwani Jehová. Kaj akgtum chiwix limakgnilh. Alistalh makglhtilh xespada chu kaktinilh xakgxakga. Akxni makgapitsi soldados xalak Filistea akxilhkgolh, lu pekuankgolh chu tsalakgolh.

Mapakgsina Saúl kaks malakawanilh David xlakata ni pekualh wa xlakata xapuxku soldado tlawalh. Chu akxni David tsukulh tlajanan kguerra, Saúl tsukulh sitsini chu xmakgniputun. Xlakata nixmakgnika, David tsalalh. Chu maski akglhuwa kata xtatsekgpula, nitu tlawanilh Saúl. ¿Tuku xlakata? Xlakata xkatsi pi wa Jehová Dios tiku xwilinit xlimapakgsina. Alistalh, Saúl nilh akxni xtlawama guerra. Akxni ama kilhtamaku David xasasti mapakgsina wa chuna la xwanit Jehová.

«Liwana nakwili xtamapakgsin xliputum kilhtamaku.» (2 Samuel 7:13)

David xtlawaniputun akgtum templo Jehová. Pero wanilh pi ni wa xʼama tlawa, wata chatum xalak xfamilia xtlawalh templo. Tiku wanka pi natlawa wa Salomón xkgawasa David. Maski chuna, Jehová maxkilh lanka tasikulunalin: tatlawalh akgtum talakkaxlan, wa xapulana mapakgsina xʼama wan xliputum mapakgsinanin nema xʼama anan. Na kxfamilia xʼama taxtu Lakgmaxtuna, Tiku xwankanit kʼEdén pi namin. Mesías xʼama litaxtu, wamputun Xatalaksakni, wantiku Jehová xʼama laksaka xlakata xMapakgsina xwa kxTamapakgsin, tamapakgsin nema nikxni katisputli.

Xlakata lu xpaxtikatsini, David mamakgstokgli lhuwa tuku xʼama tamaklakaskin akxni xtlawaka templo chu lhuwa tuku laklanka xtapalh. Nachuna, xlakata malakpuwanilh Dios lhuwa takilhtlin tlawanilh Jehová. Akxni atsinu xtsankga naniy, David malankilh Dios xlakata tuku tlawalh: «Xespíritu Jehová wa chuwinalh kinpalakata chu xtachuwin xwi kkisimakgat» (2 Samuel 23:2).

(Takilhtinit 1 Samuel, 2 Samuel, 1 Crónicas, Isaías 9: 7, Mateo 21:9, Lucas 1:32 chu Juan 7:42.)