Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 7

Dios kalakgmaxtu israelitas

Dios kalakgmaxtu israelitas

Jehová malakgacha tuku nitlan kʼEgipto, chu Moisés katamakxtu kʼEgipto israelitas. Jehová limaklakaskin Moisés xlakata nakamaxki Limapakgsin

LHUWA kata nema tlan xwilakgolh israelitas kʼEgipto, chalhuwa wankgolh. Chu tsukulh mapakgsinan chatum xasasti Faraón, xla lixkajni xlikatsi chu ni xlakgapasa José. Xlakata xakxilha pi israelitas lu lhuwa xwankgonit, mapakgsinalh pi skujni xkatlawaka chu xkamamuxtika kkgalhtuchokgo wanikan Nilo laktsu lakgskgatan tiku lakgkgawasan xlakachinkgo. Pero chatum puskat israelita tiku ni xpekuan, mujulh kskgata kʼakgtum canasta chu matsekgli kxlakni tuwan o palhma. Xtsumat Faraón tekgsli, limapakuwilh Moisés chu makgastakli kxchik Faraón.

Akxni xkgalhi 40 kata, Moisés tanulh ktaʼakglhuwit xlakata makgtayalh chatum israelita xlakata chatum tiku xlakgayawakanit nakamaskuju skujnin xtlawanima tuku nitlan, wa xlakata tsalalh, makgat alh. Akxni xkgalhi 80 kata, Dios wanilh pi xtaspitli kʼEgipto chu xwanilh Faraón pi xkamakgxtakgli israelitas.

Xlakata Faraón ni lakaskilh, Dios kalimalakgaxokgelh pulakkaw tuku nitlan uma kachikin. Akxni nina xmalakgacha tuku nitlan, Moisés pulana xlakgan Faraón chu xmaxki talakaskin xlakgpalilh xtapuwan xlakata nitu xlakgmilh. Pero Faraón tlanka xmakgkatsikan akxni xlakgankan chu xlakataki Moisés chu Jehová. Xliʼakgkaw chu xaʼawatiya tuku nitlan, Dios malakgachalh chatum ángel xlakata nakamakgni putum kamanan xanapuxkun xalak Egipto. Kajwatiya tiku nitu katlawanilh ángel wa familias tiku kgalhakgaxmatkgolh Jehová chu mawakanikgolh xkilhpan xmalakchakan o xpuwilhtakan xkgalhni aktsu borrego nema xmakamastakgonit. Xlakata nalakapastakkgo uma tuku lalh, tsukukgolh tlawakgo Pascua kata kata.

Akxni xninita xapuxku xkgawasa, Faraón kawanilh Moisés chu israelitas pi xtaxtukgolh kʼEgipto. Xlakan lakapala takaxkgolh xlakata nataxtukgo. Pero Faraón lakgpalilh xtapuwan chu kalilh xsoldados chu xcarros nema xlitlawa guerra xlakata nakaputsastalani. Akxni chankgolh kxkilhtun Xaspinini pupunu, xtasiya pi ni anan niku xtsalakgolh israelitas. Pero Jehová malakkilh pupunu, chu Israel xakaskakni niku titaxtukgolh. Akxni egipcios kastalanikgolh, Dios tlawalh pi chuchut nema xtalakkinit xtalakchuwapa chu kamamuxtilh Faraón chu xsoldados.

Titaxtulh kilhtamaku, latamakgolh lakatsu ksipi wanikan Sinaí, chu Jehová anta katatlawalh akgtum talakkaxlan. Limaklaskilh Moisés chu kamaxkilh limapakgsin nema xkapulalilh chu xkamakgtayalh putum kxlatamatkan. Akxni ni xmakgatsankgananikgolh Dios chu xkgalhakgaxmatkgolh, ni xkamakgxtakgli chu xkalimaklakaskilh xlakata xkasikulunatlawalh amakgapitsi kachikinin.

Pero, lhuwa israelitas limasiyakgolh pi ni xlipawankgo Jehová. Xlakata xkamalakgaxokgelh, Dios tlawalh pi tipuxum kata xlatapulikgolh kdesierto. Wa xlakata, Moisés putsalh chatum israelita tiku ni xmakgatsankganani Dios wanikan Josué xlakata wa xpulalilh kachikin. Lakgchalh kilhtamaku xlakata israelitas xtanukgolh ktiyat nema Dios xmalaknuninit Abrahán tiku xkilhtsukutkan.

(Takilhtinit kÉxodo, kLevítico, kNúmeros, kDeuteronomio, kSalmo 136:10-15 chu Hechos 7:17-36.)