Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Biblia chu tuku lichuwinan

 SECCIÓN 16

Chin Mesías

Chin Mesías

Jehová limasiyalh pi Jesús xalak Nazaret wa Mesías tiku xwankanit pi namin

¿LA XLAKGAPASKGOLH latamanin Mesías? Dios xʼama masiya tiku Mesías. Akxni tsokgkgoka Tatsokgni xaHebreo titaxtulh 400 kata, ángel Gabriel tachuwinalh María, chatum tsumat tiku xlama kNazaret nema xtapakgsi kʼGalilea. Gabriel wanilh María pi xʼama kgalhi skgata. Maski xla nina tu xkgalhi xchixku, Dios xʼama tlawa pi xkgalhilh chatum skgata chu xʼama limaklakaskin xespíritu santo. Uma skgata wa Mapakgsina tiku xwankanit pi namapakgsinan xliputum kilhtamaku. Dios xtlawalh pi xlatamat xapuxku xKgawasa, wantiku xwilachaku kʼakgapun xwililh kxpan María.

María ni tlanka makgkatsika wata makglhtinalh uma lu xlakaskinka talakgalhaman. Xlitatawilat, chatum xwakna wanikan José, alistalh tatamakgaxtokgli akxni Dios malakgachanilh chatum ángel chu wanilh tuku xlakata María xʼama kgalhi skgata. Pero, kalakapastakwi pi xwankanit pi Mesías xʼama lakachin kBelén chu ni kNazaret (Miqueas 5:2). Xlakata kNazaret asta kBelén 150 kilómetros xlilakgamakgat xwanit, ¿la xkgantaxtulh tuku xlichuwinankanit?

Alistalh, chatum mapakgsina matlawinalh akgtum censo, wa pi putum xʼankgolh tatsokgkgo xkachikinkan. Pero max, xfamilia José chu María xalak Belén xwankgonit, wa xlakata ankgolh akxni atsinu xtsankga nalakachin Jesús (Lucas 2:3). Jesús lakachilh niku xkatamaknukan animales chu wilika niku xkamawikan. Ama kilhtamaku, niku xkamaputswayanimaka borregos lhuwa ángeles katasinikgolh makgapitsi maputswayananin chu kamakatsinilh pi ama kilhtamaku lakachilh Mesías o Cristo.

Nachuna, latamakgolh lhuwa latamanin tiku xwankgolh pi Jesús wa Mesías tiku xwankanit pi namin. Palakachuwina Isaías xwanit pi wi tiku xʼama kaxwilini xatuwa taskujut nema xʼama tlawa Cristo (Isaías 40:3). Uma chixku wa Juan tiku xMununan. Akgtum kilhtamaku akxni akxilhli Jesús, wa: «Kaukxilhtit aktsu xkalhnilu Dios, nti namapanuniy xtalakgalhin ntachixkuwitat». Chu lhuwa tiku kstalanikgo Juan lakapala stalanikgolh Jesús. Chu chatum wa: «¡Ktakgsnitaw Mesías!» (Juan 1:29, 36, 41).

Tuku tlakg xkamakgtayalh latamanin xlakata tlakg xkanajlakgolh, aku xʼamaka wankan. Akxni Juan munulh Jesús, Jehová limaklakaskilh xespíritu xlakata xwa pi Jesús wa Mesías chu wa: “Wa yuma nkinKam nti luwa kpaxkiy, wa nti luwa kimakgapaxuwa” (Mateo 3:16, 17). ¡Lakgchalh kilhtamaku akxni chilh Mesías!

Pero ¿tukuya kilhtamaku chuna lalh? Kata 29 akxni xminita Jesús, uma kata akxni takgatsilh 483 kata nema xlichuwinanit Daniel. Umakgolh kaj makgapitsi liʼakxilhtit nema limasiya pi Jesús wa Mesías o Cristo. Pero ¿tuku xʼama lichuwinan akxni xlatamalh unu kKatiyatni?

(Takilhtinit kMateo capítulo 1 asta 3, kMarcos capítulo 1, kLucas capítulo 2 chu Juan capítulo 1.)