Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 7: Chatum chixku tiku nixpeku

Takgalhtawakga 7: Chatum chixku tiku nixpeku
Enoc

AKXNI tlakg tsukulh anan latamanin kKatiyatni, tlakg analh tiku lixkajni xtayat xwanit la Caín. Pero chatum chixku ni chuna xwanit la amakgapitsi. Uma chixku xtukuwani Enoc. Xla nixpekuan. Kristianos tiku xlamakgolh anta niku xlama, lixkajni xtayat xwankgonit pero xla chuntiya kskujnanima Dios.

¿Katsiya wix tuku xlakata kristianos xtlawakgoy katuwa tuku nitlan? Kalakapastakti uma: ¿Tiku kamatlawilh Adán chu Eva ni nakgalhakgaxmatnikgoy Dios chu wakgolh tawakat nema xkawanikanit ni nawakgoy? Wa chatum ángel nema lixkajni xtayat. Biblia wani Satanás. Chu Satanás lakaskin pi putum kristianos na lixkajni kalikatsikgolh.

Takgalhan chu lamakgnit

Akgtum kilhtamaku Jehová Dios maxkilh Enoc akgtum taskujut, kakawanilh latamanin wantuku xlakan ni xkgaxmatputunkgoy. Uma tuku kawanilh: Nachan kilhtamaku akxni Jehová Dios nakamalakgsputuy putum tiku nitlan likatsiy. Max wantuku kawanilh Enoc snun lisitsikgolh kristianos. Max xmakgniputunkgoy Enoc. Wa xlakata Enoc ni xapekua xliwanat xlakata tlan xkawanilh kristianos tuku Dios xʼama tlaway.

Jehová Dios ni makgas malatamanilh Enoc niku lixkajni likatsikgoy. Kaj 365 kata latamalh Enoc. ¿Tuku xlakata wanaw «kaj 365 kata»? Xlakata tama kilhtamaku tlakg lakgtliwakga xwankgonit ni lauku, chu tlakg makgas xlatamakgoy. ¡Xlikana, Matusalén xkgawasa Enoc latamalh 969 kata!

Latamanin tlawamakgo tuku nitlan

Akxni nilh Enoc, kristianos tlakg lixkajni likatsikgolh. Biblia wan pi putum kilhtamaku nitlan tuku xlakapastakkgoy, chu Katiyatni litatsamalh tiku ni machokgokgoy xtasitsi.

¿Katsiya wix tuku xlakata lu lhuwa analh taʼakglhuwit akxni ktama kakilhtamaku? Wa xlakata Satanás tekgsli atanu tuku la tlan nakamatlawi kristianos tuku nitlan. Kaʼakxilhwi tuku tama.

Génesis 5:21-24, 27; 6:5; Hebreos 11:5; Judas 14, 15.



Takgalhskinin

  • ¿Tuku xlitasiyay pi Enoc ni chuna xwanit la amakgapitsin?
  • ¿Tuku xlakata kristianos xalak xkilhtamaku Enoc katuwa tuku nitlan xtlawakgoy?
  • ¿Tuku nitlan xtlawakgoy kristianos? (Kaʼakxilhti kdibujo.)
  • ¿Tuku xlakata Enoc ni xapekua xwa tama kilhtamaku?
  • ¿Niku akglit kata xlatamakgoy lakchixkuwin akxni tama kilhtamaku, pero Enoc niku akglit kata latamalh?
  • ¿Tuku lalh alistalh akxni xninitta Enoc?

Amakgapitsi takgalhskinin

  • Kalikgalhtawakga Génesis 5:21-24, 27.

    ¿La talalilh Jehová Enoc? (Gén. 5:24.)

    ¿La xwanikan tiku tlakg makgas latamalh nema lichuwinan Biblia, chu niku xakglit kata xwanit akxni nilh? (Gén. 5:27.)

  • Kalikgalhtawakga Génesis 6:5.

    ¿La tawilalh kakilhtamaku anta kKatiyatni akxni xninitta Enoc chu la xtachuna uku kkinkilhtamakujkan? (2 Tim. 3:13.)

  • Kalikgalhtawakga Hebreos 11:5.

    ¿Tuku xkgalhiy Enoc nema «xmakgapaxuway Dios», chu la kitaxtunilh? (Gén. 5:22.)

  • Kalikgalhtawakga Judas  14, 15.

    ¿La tlan nachuna natlawakgoy kstalaninanin Cristo la xwanit Enoc akxni lichuwinankgoy xlakata namin lilakgsputni kʼArmagedón? (2 Tim. 4:2; Heb. 13:6.)