Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 5: Tsukuma xakatuwa latamat

Takgalhtawakga 5: Tsukuma xakatuwa latamat

AKXNI nialh kjardín xaEdén xwilakgolh Adán chu Eva, kgalhikgolh lhuwa takglhuwit. Xlakata tlan xwayankgolh palha kskujkgolh. Tsukulh pulha kgajni chu lhtukun nixawa xalakswan kiwi nema mastay xtawakat. Uma tilalh akxni Adán chu Eva ni kgalhakgaxmatnikgolh Dios chu nialh xʼamigo xwankgonit.

Kataskujma xkamanan Adán

Tlakg nitlan wa akxni Adán chu Eva tsukukgolh kgolonkgoy. Kalakapastakti: Dios xkawaninit pi komo xwakgolh xtawakat kgantum kiwi xnikgolh. Chuna lalh akxni wakgolh xtawakat tama kiwi tsukukgolh kgolonkgoy chu alistalh nikgolh. ¡Lu tontos wankgolh xlakata ni kgalhakgaxmatkgolh tuku Dios xkawaninit!

Putum xkamanan Adán chu Eva alistalh lakachinkgolh, akxni Dios xkatamakxtunitta xnatlatnikan kjardín xaEdén. Uma wamputun pi xkaman na xʼamakgolh kgolonkgoy chu nikgoy.

Komo Adán chu Eva xtikgalhakgaxmatnikgolh Jehová, xalipaxaw xtiwa xlatamatkan chu nachuna xlakkamanan. Nikxni xnikgolh chu xatapaxawan xtilatamakgolh kKatiyatni. Nitiku kgolotsin xwa, niti xtatatlalh, chu nitiku xnilh.

Dios lakaskin pi kristianos nikxni kanikgolh chu xatapaxawan kalatamakgolh, chu wanit pi nachan kilhtamaku akxni chuna nawan. Nikajwatiya xastlan nawan Katiyatni, wa kristianos ni katitatatlakgolh. Chu putum tlan nalatalalinkgoy amakgapitsin chu xʼamigojkan Dios nawankgoy.

Eva katawi xkamanan

Pero Eva nialh xʼamiga Dios xwanit. Wa xlakata lu lhuwa patinalh akxni xkakgalhi xkamanan. Snun xkatsani. Xlikana, xlakata ni kgalhakgaxmatnilh Jehová lhuwa takglhuwit liminilh, ¿nichuna?

Adán chu Eva kgalhikgolh xlakgkgawasan chu xlaktsumajan. Akxni lakachilh xapuxku wilinika xtukuwani Caín. Xlichatiy wanika Abel. ¿Katsiya tuku kaʼakgspulalh umakgolh lakgkgawasan?

Génesis 3:16-23; 4:1, 2; Apocalipsis 21:3, 4.



Takgalhskinin

  • ¿La xwanit xlatamatkan Adán chu Eva akxni nialh kjardín xaEdén xwilakgolh?
  • ¿Tuku tsukulh kaʼakgspulay Adán chu Eva, chu tuku xlakata?
  • ¿Tuku xlakata xʼamakgolh kgolonkgoy chu nikgoy xkamanan Adán chu Eva?
  • Komo Adán chu Eva xtikgalhakaxmatnikgolh Jehová, ¿la xtiwa xlatamatkan chu xlatamat xkamanan?
  • ¿La liminilh lhuwa takatsanajwat Eva xlakata ni kgalhakgaxmatninalh?
  • ¿La xkawanikan xchatiykan xapulana xkamanan Adán chu Eva?
  • ¿Tiku amakgapitsi laktsu kamanan nema tasiyay kdibujo?

Amakgapitsi takgalhskinin

  • Kalikgalhtawakga Génesis 3:16-23 chu 4:1, 2.

    Xlakata Dios xwanit pi tiyat nialh tlan xʼama makgalanan, ¿la kitaxtunilh Adán? (Gén. 3:17-19; Rom. 8:20, 22.)

    ¿Tuku xlakata lu mininilh xtukuwani Eva, nema wamputun «lataman»? (Gén. 3:20.)

    ¿La kakuentajtlawapa Jehová Adán chu Eva maski xlekgalhinankgonitta? (Gén. 3:7, 21.)

  • Kalikgalhtawakga Apocalipsis 21:3, 4.

    ¿Tuku «wantu xʼanan xakgasiya» xlakaskinka kamasputuka?