Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 10: Lanka Munkaklat

Takgalhtawakga 10: Lanka Munkaklat

TIKU ni anta xtanumakgolh kʼarca xputumkan chunaku xlilamakgolh xlatamatkan. Nina xmakanajlakgoy pi xʼama min Munkaklat. Lu litsinkgolh chuna la nikxni a xlitsinkgoy. Pero ni makgas alh kilhtamaku nialh litsinkgolh.

Latamanin chu animales pekuankgonit xlakata kalistili Munkaklat

Kaj lakapara tsukulh senan. Mincha chuchut kʼakgapun la akxni pumakgankan. ¡Xlikana tuku xlichuwinama Noé! Pero nialhti la xtanu kʼarca. Jehová liwana xmalakchawanitta.

Niku kaxtum xwanit lakapara litatsamalh chuchut. Xtasiyay la laklanka puxkga. Xkamamuxtiy laklanka kiwi chu xtakgolokgoy laklanka chiwix chu lu xmakawankgoy. Chu kristianos nialh xkatsikgoy tuku natlawakgoy. Tawakakgolh tlakg kxalaklanka sipi. Xlakapastakkgoy: ¡Ay, lu xtitlawaniw kuenta Noé chu xtitanuw anta kʼarca akxni xlakkiyaku! Pero nialh la xtanukgoy.

Chuchut tsukulh tapulhmaniy chu tlakg tapulhmaniy. Senalh tipuxum kilhtamaku chu tipuxum katsisni. Chuchut maʼakgtsamalh sipi, chu lakapara litakgtsamakgolh chuchut asta tlakg xatalhman sipi. Chuna la Dios xwanit, putum kristianos chu animales nema nitu xtanumakgolh kʼarca nikgolh. Pero tiku kʼarca xtanumakgolh lakgtaxtukgolh.

Noé chu xkamanan tlawakgolh xatlan taskujut akxni tlawakgolh arca. Chuchut matalhmanilh arca chu kxkgalhni chuchut xlawaka. Alistalh chalh kilhtamaku, akxni nialh milh sen chu taxtucha Chichini. ¡Lu stlan xtasiyay! Lakaxtum kaj chuchut xtasiyay. Chu kaj watiya arca xtasiyay kxkgalhni chuchut.

Arca lawaka xkgalhni chuchut

Nialh xlamakgolh tiku lu laklanka lakchixkuwin xwankgonit. Nialhti xkatlawanilh tuku nitlan kristianos. Putum xnikgonit chu xtsekan chu amakgapitsi kristianos tiku nitlan xlikatsikgoy. Pero, ¿tuku kaʼakgspulalh xnatlatnikan?

Xnatlatnikan tiku lu laklanka lakchixkuwin ni lu xlikana kristianos xwankgonit la akinin. Ángeles xwankgonit chu xminkgonit kKatiyatni xlakata xlatamakgolh la lakchixkuwin. Wa xlakata, akxni milh Munkaklat, ni nikgolh la amakgapitsi kristianos. Makgxtakgkgolh xmaknikan la xla chixku nema xtlawakgonit, chu amparakgolh kʼakgapun, ángeles wamparakgolh. Pero nialh kamakgamakglhtinanka xlakata xʼángeles Dios nawankgoy. Litaxtukgolh xʼángeles Satanás. KBiblia kawanikan uma ángeles demonios.

Alistalh Dios makamilh lanka un, chu chuchut tsukulh xunka. Titaxtulh akgkitsis papaʼ alistalh arca tawilalh kxakgspun sipi. Lhuwa kilhtamaku titaxtulh, chu tiku anta xtanumakgolh tlan lakawanankgolh kilhtin chu akxilkgolh xakgspun laklanka sipi. Chu chuchut kskakma chu kskakma.

Alistalh Noé malakgachalh tantum cuervo. Uma cuervo xkgosa tsinu chu xtaspitpara xlakata ni xtekgsa niku natamakgxtakga. Makglhuwa chuna tlawalh, pero xmimpara tayay kʼarca.

Paloma

Noé xkatsiputun komo ay xkaskaknit, wa xlakata malakgachalh tantum paloma. Uma na mimpa xlakata ni tekgsli niku natamakgxtakga. Noé xlimakgti malakgachapa, chu akxni milh xkilhya xtuwan olivo. Chuchut kxunknita. Noé malakgachapa paloma xlimakgtutu, chu xla tekgsli niku kaskakni chu tamakgxtakgcha.

Alistalh Dios xakgatlilh Noé. Wanilh: Kataxtu kʼarca. Kakatataxtu putum mi familia chu animales. Liwakay akgtum kata xtanumakgolh kʼarca. ¡Katlawa la akxilhpat, lu lipaxuwakgolh pi ni nikgolh chu nialh kʼarca xtanumakgolh!

Génesis 7:10-24; 8:1-17; 1 Pedro 3:19, 20.



Takgalhskinin

  • ¿Tuku xlakata nialhti tanulh kʼarca akxni tsukulh senan?
  • ¿Niku akglit kilhtamaku chu niku akglit katsisni masenilh Jehová chu asta niku chalh chuchut?
  • ¿Niku tawi arca akxni chuchut litatsamalh Katiyatni?
  • ¿Lakgtaxtukgolh tama lu laklanka lakchixkuwin akxni milh munkaklat? ¿Tuku lanikgolh xnatlatnikan?
  • ¿Niku tawi arca akxni xtitaxtunitta akgkitsis papaʼ?
  • ¿Tuku xlakata Noé makgxtakgli kataxtulh kʼarca tantum cuervo?
  • ¿Tuku likatsilh Noé pi chuchut kxunknita?
  • ¿Tuku wanilh Dios Noé akxni liwakaya akgtum kata xtanumakgolh kʼarca?

Amakgapitsi takgalhskinin

  • Kalikgalhtawakga Génesis 7:10-24.

    ¿Tuku kamasputulh akxni milh lisputni unu kKatiyatni? (Gén. 7:23.)

    ¿Niku akglit kilhtamaku lixunkli chuchut akxni milh munkaklat? (Gén. 7:24.)

  • Kalikgalhtawakga Génesis 8:1-17.

    ¿La masiya Biblia kʼGénesis 8:17 pi tuku Jehová pulana xlakapastaknit natlaway xlakata Katiyatni nitu talakgpalima? (Gén. 1:22.)

  • Kalikgalhtawakga 1 Pedro 3:19, 20.

    ¿Tuku kalilhkayawaka ángeles wantiku ni kgalhakgaxmatnikgolh Dios akxni taspitkgolh kʼakgapun? (Jud. 6.)

    ¿La matliwakglha kintakanajlakan tuku tatsokgnit xlakata Noé chu xfamilia pi Jehová kgalhi litliwakga xlakata nalakgmaxtuy xkachikin? (2 Ped. 2:9.)