Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 9: Noé tlaway akgtum arca

Takgalhtawakga 9: Noé tlaway akgtum arca
Latamanin lilitsimakgo Noé

NOÉ xkgalhiy chatum xpuskat chu kgalhtutu xkaman. Xkaman xkawanikan Sem, Cam chu Jafet. Xkgalhtutukan xkgalhikgoy xlakpuskatin. Kaj xkgalhtsayankan xwankgonit xfamilia Noé.

Alistalh Dios wanilh Noé pi xtlawalh tuku nikxni a xʼakxilha. Dios wanilh pi xtlawalh akgtum lanka arca. Tama arca lu lanka la akgtum barco, pero xtasiyay la akgtum lanka caja chu lhman. Dios wanilh: Xakilhmaktutu natlawaya, chu pulaklhuwa namapitsiya. Xʼamaka mapitsikan arca kxpulakni xlakata anta natawilakgoy Noé chu xfamilia nachuna animales chu tuku nawakgoy.

Dios wanilh Noé pi xtlawalh arca chuna la ni xtanunilh chuchut. Wanilh: Nakmalakgachay akgtum lanka munkaklat chu nakmalakgsputunan xlikalanka kakilhtamaku. Wantiku ni kʼarca tanuma naniy.

Noé chu xkamanan kgalhakgaxmatnikgolh Dios chu tsukukgolh tlawakgoy arca. Pero amakgapitsi kristianos kaj lilitsinkgolh. Ni makgxtakgkgolh tuku nitlan xtlawamakgolh. Niti makanajlalh akxni Noé kawanilh tuku Dios xʼama tlaway.

Xfamilia Noé tamaknumakgo animales chu liwat kʼarca

Xlakata lu lanka xwanit arca lhuwa kilhtamaku litlawaka. Akxni akglhuwa kata xtitaxtunit matlanika arca. Alistalh Dios wanilh Noé pi kakatamaknulh animales anta kʼarca. Wanilh pi katamaknulh tantiyun makgapitsi animales, xakgawasa chu xatsumat. Pero amakgapitsi animales, Dios wanilh pi tantujunan kakatamaknulh. Na wanilh Noé pi katamaknulh kʼarca putum animales nema kgoskgoy. Noé chuna tlawalh la Dios wanilh.

Alistalh Noé chu xfamilia na tanukgolh kʼarca. Chu Dios malakchawalh arca. Anta kxpulakni arca, Noé chu xfamilia xkgalhimakgolh kamilh lanka sen. Kalakpuwanti pi anta tanupat chu kgalhipat pi kamilh tama munkaklat. ¿Xʼama min tama munkaklat la Dios xwanit?

Génesis 6:9-22; 7:1-9.



Takgalhskinin

  • ¿Niku xkgalhlitkan xwanit kxfamilia Noé, chu la xkawanikan kgalhtutu xkamanan?
  • ¿Tuku wanilh Dios Noé pi katlawalh tuku nikxni aʼxtlaway, chu tuku xlakata?
  • ¿Tuku wankgolh amakgapitsi akxni Noé kalixakgatlilh xlakata arca?
  • ¿Tuku wanilh Dios Noé natlaway xlakata animales?
  • Akxni Dios malakchawalh arca, ¿tuku tlawakgolh Noé chu xfamilia?

Amakgapitsi takgalhskinin

  • Kalikgalhtawakga Génesis 6:9-22.

    ¿Tuku litasiyalh pi Noé lu xkakninani xaxlikana Dios? (Gén. 6:9, 22.)

    ¿La akxilha Jehová wantiku ni machokgoy xtasitsi, chu tuku pulana kililakapastakatkan akxni laksakaw tuku lilakgastananaw? (Gén. 6:11, 12; Sal. 11:5.)

    ¿La tlan nachuna natlawayaw la tlawalh Noé akxni kinkawanikgoyan tuku kilitlawatkan wantiku pulalinkgoy xtatayananin Jehová? (Gén. 6:22; 1 Juan 5:3.)

  • Kalikgalhtawakga Génesis 7: 1-9.

    ¿La kinkamatliwakglhniyan kintakanajlakan xlakata Dios xakxilha Noé xalakatitum chixku, maski na xkgalhiy talekgalhin? (Gén. 7:1; Pro. 10:16; Isa. 26:7.)