Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 116: Tuku natlawayaw xlakata nikxni naniyaw

Takgalhtawakga 116: Tuku natlawayaw xlakata nikxni naniyaw

KAʼAKXILHTI dibujo, ¿katsiya wix tuku lekgalhtawakgama uma aktsu tsumat chu xʼamigos? Na lekgalhtawakgamakgolh uma libro nema wix lekgalhtawakgapat… Ki libro xla takgalhtawakga xalak Biblia. Chu, na lekgalhtawakgamakgolh uma takgalhtawakga nema wix likgalhtawakgapat. «Tuku natlawayaw xlakata nikxni naniyaw.»

Chatum kgawasa kgalhawakgama

¿Katsiya wix tuku katsinimakgolh uma aktsu tsumat chu xʼamigos? Katsimakgolh pi komo makglhtinanputunaw latamat nema nisputa, pulana nakatsiyaw xlakata Jehová chu Jesucristo. Biblia wan: Uma tiji nema linan klatamat nema ni kgalhiy xlisputni. Kakatsi xlakata xaxlikana Dios chu xKgawasa Jesucristo.

¿La nakatsiyaw xlakata Jehová chu xkgawasa Jesús? Wantuku nakinkamakgtayayan, nalikgalhtawakgayaw Ki libro xla takgalhtawakga xalak Biblia kxkilhtsukut asta kxkgatsputat. Uma libro lhuwa tuku lichuwinan xlakata Jehová chu Jesús, ¿nixlikana? Lhuwa tuku lichuwinan xlakata wantuku tlawakgonit chu tuku aku natlawakgoy. Pero wi tuku atanu na nalekgalhtawakgayaw.

Maktum Biblia

¿Akxilhpat atanu libro kkatutsu? Uma libro wa Biblia. Wi tiku kawani xlakata nalikgalhtawakganiyan anta niku takilhtinit kgatunu takgalhtawakga. Biblia kinkamaxkiyan tamakatsin xlakata la tlan naskujnaniyaw Jehová chuna la xliwanat, chu chuna tlan namakglhtinanaw latamat nema nikgalhiy xlisputni. Wa xlakata kilismanitkan chali chali nalekgalhtawakgayaw Biblia.

Pero nikajwatiya talakaskin nakatsiyaw xlakata Jehová chu Jesús. Maski lhuwa xkatsiw xlakata Jehová chu Jesús chu tuku masiyakgoy, chu ninajla kajwatiya nalimakglhtinanaw latamat nema nikgalhiy xlisputni. ¿Katsiya wix tuku na talakaskin?

Xlakaskinka na nalilatamayaw chuna la katsitilhamaw. ¿Lakapastaka Judas Iscariote? Judas chatum tiku na xlikgalhkutiy apóstol xwanit, nema Jesús xkalaksaknit. Judas lhuwa xkatsiy xlakata Jehová chu Jesús. Pero, ¿tuku akgspulalh? Titaxtulh kilhtamaku nitlan tsukulh likatsiy chu puxamakaw tumin xaplata listamakgalh Jesús. Judas ni katimakglhtinalh latamat nema nikgalhi xlisputni.

¿Lakapastaka Guehazí nema lichuwinalh takgalhtawakga 69? Xla xkgalhiputun lhakgat chu tumin nema ni xla xwanit. Chu akgsaninalh xlakata namaxkikan tuku ni xla xwanit chu Jehová malakgaxokgelh. Na nakinkamalakgaxokgeyan akinin komo ni nakgalhakgaxmatniyaw xlimapakgsin.

Pero lhuwa kristianos nikxni makgxtakgkgolh Dios chu xakgstitum skujnanikgolh. Nachuna skujnaniputunaw la tlawakgolh xlakan, ¿nixlikana? Samuel lu xatlan liʼakxilhtit. Kalakapastakti chuna la akxilhwi takgalhtawakga 55, xla max kajku xakgtati o xakgkitsis kata xkgalhiy akxni tsukulh skujnaniy Jehová anta kxtabernáculo. Wa xlakata maski aktsinajku wix tlan naskujnaniya Dios.

Xlikana, putum tlawaputunaw chuna la tlawalh Jesús. Akxni Jesús aktsu kgawasaku xwanit xlichuwinan xlakata xtlat xalak akgapun anta ktemplo, chuna la akxilhwi ktakgalhtawakga 87. Nachuna katlawaw la titlawalh Jesús. Kakatalichuwinaw lhuwa kristianos xlakata kiDioskan Jehová chu xKgawasa Jesucristo. Komo chuna natlawayaw tlan nalatamayaw kxakalipaxaw katiyatni chu nikxni naniyaw.

Juan 17:3; Salmos 145:1-21.



Takgalhskinin

  • ¿Tuku xlakaskinka nakatsiyaw komo nikxni niputunaw?
  • Chuna la tasiyay kdibujo, ¿la natlawayaw xlakata nakatsiyaw xlakata Jehová chu Jesús?
  • ¿La wanikan atanu libro nema wi kdibujo chu tuku xlakata chali chali nalikgalhtawakgayaw?
  • Xlikana pi talakaskin nakatsiyaw xlakata Jehová chu Jesús, ¿pero tuku na talakaskin xlakata namakglhtinanaw latamat nema nikxni kgatsputa?
  • ¿Tuku kinkamasiyaniyan takgalhtawakga 69?
  • ¿Tuku kinkamasiyaniyan xatlan liʼakxilhtit xlakata Samuel anta ktakgalhtawakga 55?
  • ¿La na tlan chuna natlawayaw la tlawalh Jesucristo? Chu komo chuna natlawayaw, ¿tukuya tasikulunalin namakglhtinanaw nema aku namin?

Amakgapitsi takgalhskinin

  • Kalikgalhtawakga Juan 17:3.

    ¿La masiyay Biblia pi wi tuku tlakg talakaskin chu ni kaj watiya lhuwa tuku nakatsiyaw xlakata Jehová chu Jesucristo? (Mat. 7:21; Sant. 2:18-20; 1 Juan 2:17.)

  • Kalikgalhtawakga Salmo 145:1-21.

    Anan lhuwa tuku tlan nalimalankiyaw Jehová, pero kawanti kaj makgapitsi tuku tlan nalimalankiyaw Jehová (Sal. 145:8-11; Apo. 4:11).

    ¿La «akxtum kalakgalhaman» kristianos Jehová? chu xlakata Jehová chuna likatsiy, ¿la tlaway pi tlakg natalakatsuwiniputunaw? (Sal. 145:9; Mat. 5:43-45.)

    ¿Tuku kilitlawatkan komo xlikana paxkiyaw Jehová? (Sal. 119:171, 172, 175; 145:11, 12, 21.)