Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 114: Akxni namasputukanputum tuku nitlan

Takgalhtawakga 114: Akxni namasputukanputum tuku nitlan

¿TUKU akxilhpat unu kdibujo? Unu akxilhmaw tanlhuwa kawayu xalaksnapapa. Pero kaʼakxilhti niku mimakgolh. ¡Uma tanlhuwa kawayu kgosnamakgolh mimakgocha kʼakgapun anta kpuklhni! Pero, ¿pi kawa anan kawayu kʼakgapun?

Jesús wi xliMapakgsina kʼakgapun

Ni, uma tanlhuwa kawayu nixaxlikana. Katsiyaw pi nixaxlikana xlakata kawayu nila kgosnankgoy kpuklhni, ¿nixlikana? Pero Biblia lichuwinan pi wilakgolh kawayu kʼakgapun. ¿Katsiya wix tuku xlakata?

Wa xlakata, makgasa xkalimaklakaskinkan kawayu akxni xtlawakan guerra. Wa xlakata akxni Biblia wan pi makgapitsi kristianos minkgoyacha kʼakgapun chu kgawilakgolh xkawayujkan, wa limasiyay pi Dios nakatatlaway guerra kristianos xalak unu kKatiyatni. ¿Niku natlawakan tama guerra? Anta kʼArmagedón chu Dios putum namasputuy tuku nitlan unu kKatiyatni.

Jesús nalakapulay kʼuma guerra nema wanikan Armagedón. Kalakapastakti, Jehová laksakli Jesús xlakata mapakgsina nawan anta kXtamapakgsin. Wa xlakata Jesús lin corona. Chu espada limasiyay pi nakamakgniy putum xtalamakgasitsin Dios. ¿Kaks nalilakawanaw xlakata Dios nakamalakgsputuy putum uma kristianos tiku lixkajni likatsikgoy?

Kaputsa takgalhtawakga 10. ¿Tuku akxilha anta? Wa munkaklat nema kamasputulh kristianos tiku lixkajni xlikatsikgoy. ¿Tiku makamilh uma munkaklat? Wa Jehová Dios. Chu uku kaʼakxilhti takgalhtawakga 15. ¿Tuku lama unu ktakgalhtawakga? Jehová kalimalakgsputuma lhkuyat Sodoma chu Gomorra.

Chu uku kaputsa takgalhtawakga 33. Kaʼakxilhti tuku lanimakgolh kawayu chu xcarros xla li Egipto nema xkalinkan kguerra. ¿Tiku tlawalh pi nalimuxtukgoy chuchut? Jehová. Chuna tlawalh xlakata nakamakgtayay xkachikin. Chu kaputsa takgalhtawakga 36 chu 76. Anta naʼakxilha pi Jehová asta mastalh talakaskin pi xkachikin namasputukan xlakata lixkajni xlikatsikgoy.

Wa xlakata, ni kaks nalilakawanaw pi Jehová nakamalakgachay ángeles xlakata namasputuy putum tuku nitlan unu kKatiyatni. ¿Tuku nalay alistalh? Kamatitaxtu akgtum página chu kaʼakxilhwi.

Apocalipsis 16:16; 19:11-16.



Takgalhskinin

  • ¿Tuku xlakata Biblia lichuwinan pi wilakgolh kawayu anta kʼakgapun?
  • ¿Tuku xtukuwani xguerra Dios nema nakaliminiy tiku lixkajni likatsikgoy kKatiyatni chu tuku xlakata natlawa uma guerra?
  • Chuna la tasiyay kdibujo, ¿tiku nalipulay kguerra chu tuku xlakata lin akgtum corona, chu tuku wamputun pi na lin akgtum espada?
  • Chuna la tasiyay ktakgalhtawakga 10, 15 chu 33, ¿tuku xlakata ni kaks nalilakawanaw xlakata Dios nakamalakgsputuy kristianos tiku lixkajni likatsikgoy?
  • ¿La masiyay takgalhtawakga 36 chu 76 pi Dios nakamasputuy kristianos tiku lixkajni likatsikgoy maski wankgoy pi kakninanikgoy?

Amakgapitsi takgalhskinin

  • Kalikgalhtawakga Apocalipsis 19:11-16.

    ¿La liwana kinkamakgatekgsayan Biblia pi tiku kgawi xasnapapa kawayu wa Jesucristo? (Apo. 1:5; 3:14; 19:11; Isa. 11:4.)

    Xlakata xlhakgat Jesús pasanit kgalhni, ¿la limasiyay uma pi tlajanit kguerra? (Apo. 14:18-20; 19:13; Isa. 63:1-6.)

    ¿Tiku na max taʼankgoy soldados nema stalanimakgolh Jesús tiku kgawi xasnapapa kawayu? (Apo. 12:7; 19:14; Mat. 25:31, 32.)