Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 75: Kgalhtati lakgkgawasan anta kBabilonia

Takgalhtawakga 75: Kgalhtati lakgkgawasan anta kBabilonia

MAPAKGSINA Nabucodonosor kalin kBabilonia lakgkgawasan xalak Israel tiku tlakg kgalhikgoy takgalhtawakga. Chu antiya kBabilonia kalaksakka wantiku tlakg xalakstlan chu tlakg xalakgskgalala. Anta unu kdibujo akxilhpat kgalhtati. Chatum xtukuwani Daniel, chu amakgapitsi li Babilonia kalimapakuwikgoy Sadrac, Mesac chu Abednego.

Nabucodonosor kamakgalhtawakgaputun xlakata anta naskujnikgoy kxchik. Akxni kamakgalhtawakgakanita nawan akgtutu kata nakalaksakan wantiku tlakg xalakgskgalalan xlakata namakgtayakgoy mapakgsina nalakkaxtlaway ta’akglhuwit. Lakaskin pi tama lakgkgawasan lu lakgtliwakga kawankgolh wa xlakata mapakgsinalh pi kakamaxkika na watiya taway chu na watiya vino nema way mapakgsina chu xfamilia.

Daniel, Sadrac, Mesac chu Abednego lichuwinamakgo tuku kanajlakgo

Ka’akxilhti Daniel. ¿Katsiya wix tuku wanima Aspenaz, xapuxku kskujni Nabucodonosor? Waniy pi niwaputun wantuku lakgkgama nema wi kxchik mapakgsina. Pero Aspenaz lu lilakgaputsalh, chu kawaniy: Wa mapakgsina wanit pi nawayatit liway nema xla way chu nalikgotnanatit wa nema likgotnan mapakgsina chu komo ni lakgtliwakga natasiyayatit chuna la amakgapitsin lakgkgawasan max nakimakgniy.

Wa xlakata Daniel tachuwinalh chixku wantiku Aspenaz xliyawanit nakakuentajtlawa. Daniel wan: Kakilali’akxilhwi akgkaw kilhtamku. Wakg atanu tuku kakilamaxkiw pero ni kakilamaxkiw liway nipara vino, kaj chuchut kakilamaxkiw naklikgotnanaw. Chu alistalh nakilatamalakxtumiyaw amakgapitsi lakgkgawasan wantiku na wakgoy xtaway mapakgsina chu na’akxilha tiku tlakg tlan tasiyay.

Xkuentajtlawanakan kawaniy pi tlan. Chu akxni takgatsilh akgkaw kilhtamaku, Daniel chu kgalhtutu x’amigos tlakg tliwakga xtasiyakgoy chu ni la amakgapitsi tiku wakgoy tuku way mapakgsina, chu kamaxkika talakaskin ninawakgoy xliwat mapakgsina.

Akxni ay sputli akgtutu kata putum lakgkgawasan kalinka anta kxlakatin mapakgsina Nabucodonosor. Akxni katachuwinalh, mapakgsina akxilhli pi Daniel chu kgalhtutu x’amigos tlakg lakgskgalalan nixawa amakgapitsi. Wa xlakata anta kamakgxtakgli kxchik xlakata namakgtayakgoy. Chu akxni mapakgsina kawani xta’akglhuwit chu takgalhskinin nema kgalhiy, Daniel, Sadrac, Mesac chu Abednego, mapakgsina akxilha pi pulakaw tlakg lakgskgalalan nixtachuna sacerdotes chu amakgapitsi xalakgskgalalan lakchixkuwin nema kgalhi.

Daniel 1:1-21.



Takgalhskinin

  • ¿Tiku uma kgalhtati lakgkgawasan nema wilakgolh kdibujo chu tuku xlakata anta wilakgolh kBabilonia?
  • ¿Tuku kalilakapastakninit Nabucodonosor natlawakgoy uma lakgkgawasan chu tuku kawanilh kskujnin nakamaxkikan?
  • ¿Tuku wa Daniel pi tlan nawakgoy chu tlan nalikgotnankgoy xkgalhtatikan?
  • Akxni xtitaxtunitta akgkaw kilhtamaku akxni ni wakgolh liway, ¿la xtasiyakgoy Daniel chu kgalhtutu x’amigos akxni katamalakxtumika amakgapitsi lakgkgawasan?
  • ¿Tuku xlakata linka Daniel chu kgalhtutu x’amigos kxchik mapakgsina chu tuku xlakata tlakg xalaktlan xwankgonit nixawa sacerdotes chu xalakgskgalalan lakchixkuwin?

Amakgapitsi takgalhskinin

  • Kalikgalhtawakga Daniel 1:1-21.

    ¿Tuku xlakata fuerza kilitlawatkan ni natuwasaw natlawayaw talekgalhin chu na ni namastayaw talakaskin nakinkatlajayan tuku nitlan tlawaputunaw? (Dan. 1:8; Gén. 39:7, 10; Gál. 6:9.)

    ¿La max wi tiku nakamatuwasaputun lakgkgawasan xlakata natlawakgoy wantuku makgapitsi tlan limakgkatsikgoy? (Dan. 1:8; Pro. 20:1; 2 Cor. 6:17-7:1.)

    ¿Tuku kinkamasiyaniyan chuna la tatsokgnit kBiblia xlakata kgalhtati lakgkgawasan li hebreo xlakata la na’akxilhaw takgalhtawakga xalak escuela? (Dan. 1:20; Isa. 54:13; 1 Cor. 3:18-20.)