Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 66: Mapakgsina Jezabel lixkajni xtayat

Takgalhtawakga 66: Mapakgsina Jezabel lixkajni xtayat

AKXNI xninitta mapakgsina xwanikan Jeroboán, chatunu chatunu mapakgsinanin nema mapakgsikgolh pulakkaw laklanka familia xalak Israel nema xwilakgolh pakxtu, lixkajni likatsikgoy. Wantiku tlakg lixkajni likatsilh wa Acab. ¿Katsiya wix tuku xlakata? Xlakata xpuskat Acab, Jezabel lixkajni likatsi.

Jezabel ni li Israel. Xtlat Jezabel mapakgsina xalak Sidón. Kakninaniy dios nema nixaxlikana wanikan Baal, chu tlaway pi Acab chu lhuwa li Israel na kakakninanikgolh Baal. Jezabel snun sitsiniy Jehová chu lhuwa kamakgniy xpalakachuwinanin. Chu amakgapitsi xpalakachuwinanin Jehová tatsekgkgoy anta klhuku xlakata ni nakamakgnikan. Akxni Jezabel wi tuku lu lakgatiy asta limakgninan xlakata nakgalhi tuku lakgatiy.

Akgtum kilhtamaku mapakgsina Acab lu lipuwan. Wa xlakata Jezabel kgalhskin: ¿Tuku xlakata lu lipuwana?

Acab wan: Xlakata tuku Nabot kiwanilh. Akit xakmakgtamawaputun xkakiwin niku chanit x’uvas. Pero Nabot kiwanilh pi nila nakimaxkiy.

Jezabel wan: Kakgalhi. Akit nakmaxkiyan.

Wa xlakata Jezabel kamalakgachanilh tatsokgni lakchixkuwin wantiku xalakpuxku anta xalanin niku kxkachikin Nabot. Anta niku wan: Kaputsatit makgapitsi lakchixkuwin tiku nitlan likatsikgoy, xlakata nawankgoy pi Nabot waninit laklixkajni tachuwin Dios chu mapakgsina. Chu katamakxtutit kkachikin chu ka’aktalamakgnitit.

Akxni Jezabel katsilh pi Nabot ninit, wanilh Acab: Kapit chu mila katlawa kakiwin niku tachanit uvas nema xla xwanit Nabot. ¿Nixlikana pi Jezabel mininiy namalakgaxokgekan uma tuku lanka nitlan tlawanit?

Mapakgsina Jezabel

Wa xlakata, titaxtulh kilhtamaku Jehová malakgachalh chatum chixku xtukuwani Jehú xlakata namalakgaxokge Jezabel. Akxni Jezabel katsilh pi namin Jehú lakgpitsokgka xlakata stlan natasiyay. Pero akxni Jehú chilh chu akxilhli anta kventana, kawanilh lakchixkuwin wantiku wilakgolh klanka chiki: ¡Kamamokgosatit! Chu lakchixkuwin chuna tlawakgolh, la akxilhpat unu kdibujo. Mamokgosakgolh, chu nilh. Chuna lisputli xlatamat uma xalixkajni xtayat mapakgsina Jezabel.

1 Reyes 16:29-33; 18:1-4; 21:1-16; 2 Reyes 9:30-37.



Takgalhskinin

  • ¿Tiku Jezabel?
  • Akgtum kilhtamaku, ¿tuku xlilipuwama mapakgsina Acab?
  • ¿Tuku tlawalh Jezabel xlakata namaxkiy Acab xkakiwin Nabot niku xchanit uvas?
  • ¿Tiku malakgachalh Jehová xlakata namalakgaxokgey Jezabel xtalekgalhin?
  • Chuna la tasiyay kdibujo, ¿tuku lalh akxni Jehú chalh kxchik Jezabel?

Amakgapitsi takgalhskinin

  • Kalikgalhtawakga 1 Reyes 16:29-33 chu 18:3, 4.

    Akxni Acab xwi xlimapakgsina k’Israel, ¿tuku lhuwa nitlan xtasiyay anta? (1 Rey. 16:33.)

  • Kalikgalhtawakga 1 Reyes 21:1-16.

    ¿La limasiyalh Nabot pi ni xapekua xwanit chu ni xmakgxtakga Jehová? (1 Rey. 21:1-3; Lev. 25:23-28.)

    ¿Tuku kinkamasiyaniyan Acab, xlakata la akinin natayaniyaw akxni wi tuku nitlan kinkataxtuniyan?(1 Rey. 21:4; Rom. 5:3-5.)

  • Kalikgalhtawakga 2 Reyes 9:30-37.

    Xlakata Jehú lu tliwakga skujli xlakata namakgantaxtiy xtalakaskin Jehová, ¿tuku kinkamasiyaniyan uma? (2 Rey. 9:4-10; 2 Cor. 9:1, 2; 2 Tim. 4:2.)