Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 62: Ta’akglhuwit anta kxchik David

Takgalhtawakga 62: Ta’akglhuwit anta kxchik David

AKXNI David tsukulh mapakgsinan anta kJerusalén Jehová kamakgtayay xsoldados David natlajakgoy lhuwa guerra. Dios Jehová xkawaninit li Israel pi nakamaxkiy putum xtiyat Canaán. Chu uku putum tama tiyat nema xkawanikanit nakamaxkikan ay xlakan uku.

David lu xatlan mapakgsina. Lu paxkiy Jehová. Wa xlakata akgtum wantuku na pulana tlawalh akxni ay xla xtlawanit kachikin wanikan Jerusalén, anta lilh caja xla talakkaxlan xla Jehová. Chu tlawaputun akgtum templo niku nawiliy caja xla talakkaxlan.

Alistalh titaxtulh akglhuwa kata, David tlawalh akgtum lanka talekgalhin. David katsiy pi nitlan tiyakan tuku atanu tiku xla. Pero akgtum kilhtamaku akxni xkgotanunita akxni xlawaka kxakgstin xchik, lakalh tutsu chu akxilhli chatum lu xastlan puskat. Xtukuwani Bat-seba, chu xchixku chatum xsoldado David wanikan Urías.

David lu lakgatiy Bat-seba chu tlawalh pi kaliminka anta kxchik. Xchixku Bat-seba makgat anit makgtlawa guerra. Chu wa xlakata David tatamalh chu alistalh katsilh pi nakgalhiy kskgata. David nixkatsiy tuku natlaway, wa xlakata wanilh Joab xapuxku xsoldados pi klakatin kayawalh Urías anta kguerra chu kamakgnika. Akxni Urías nilh, David tatamakgaxtokgli Bat-seba.

Jehová snun sitsinilh David. Chu malakgachalh xlakskujni xtukuwani Natán xlakata natalichuwinan xtalekgalhin. ¿Akxilhpat Natán tachuwinama David? David lu nitlan limakgkatsiy xlakata tuku tlawanit, wa xlakata Jehová ni makgnilh. Pero wanilh: Lhuwa na’anan talakgaputsu anta kminchik. Chu, ¡lu nitlan tuku lakgchilh David!

Natán stakyawama David

Pulana xkgawasa Bat-seba nilh. Alistalh wa xapuxku xkgawasa David, xtukuwani Amnón, xwatachipalh xtalatsumat Tamar natatamay. Wa xlakata Absalón xkgawasa David lu snun lisitsilh chu makgnilh Amnón. Chu alistalh Absalón tlawalh pi lhuwa kristianos nastalanikgoy xlakata mapakgsina nawan. Alistalh David tlajalh guerra nema xtakgalhiy Absalón, chu Absalón nilh. Chuna akgspulalh David, lhuwa talakgaputsu kgalhilh.

Akxni x’anama takglhuwit, Bat-seba kgalhilh chatum xkgawasa xtukuwani Salomón. Akxni David kgolotsina xwanit chu xtatatlay xkgawasa Adonías xputsama la mapakgsina nawan. Wa xlakata David matasaninalh sacerdote wanikan Sadoc kakmawakalh aceite Salomón xlakata nalimasiyay pi mapakgsina nawan. Ni makgas alh kilhtamaku David nilh, xkgalhiy 70 xkata. Mapakgsinalh tipuxum kata. Chu Salomón wa mapakgsina uku.

2 Samuel 11:1-27; 12:1-18; 1 Reyes 1:1-48.



Takgalhskinin

  • Xlakata Jehová kamakgtayalh li Israel, ¿tuku lalh kCanaán alistalh?
  • ¿Tuku lalh akgtum kilhtamaku akxni xkgotanunita, akxni David xlawaka kxakgstin xchik?
  • ¿Tuku xlakata Jehová snun sitsinilh David?
  • ¿Tiku uma chixku xalak dibujo nema Jehová malakgachalh natachuwinan David xlakata xtalekgalhin, chu tuku wani pi na’akgspulay?
  • ¿Tukuya ta’akglhuwit kgalhilh David?
  • ¿Tiku xlimapakgsina tawi anta k’Israel akxni nialhtu xwi David?

Amakgapitsi takgalhskinin

  • Kalikgalhtawakga 2 Samuel 11:1-27.

    ¿La kinkamakgtayayan putum kilhtamaku naskujnaniyaw Jehová?

    ¿Tuku matlawilh David natlaway talekgalhin, chu tuku kinkamasiyaniyan uma tuku tilalh pi ni natlawayaw akinin kskujnanin Jehová? (2 Sam. 11:2; Mat. 5:27-29; 1 Cor. 10:12; Sant. 1:14, 15.)

  • Kalikgalhtawakga 2 Samuel 12:1-18.

    ¿Tuku kamasiyani lakgkgolotsin xalak congregación chu wantiku xalak natlatni chuna la Natán stakyawalh David? (2 Sam. 12:1-4; Pro. 12:18; Mat. 13:34.)

    ¿Tuku xlakata Jehová lu lakgalhamalh David? (2 Sam. 12:13; Sal. 32:5; 2 Cor. 7:9, 10.)