Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 60: Abigail chu David

Takgalhtawakga 60: Abigail chu David

¿LAKGAPASA uma xastlan puskat nema lakgmima David? Xtukuwani Abigail. Uma puskat liwana lakapastaka tuku natlaway chu makgtayalh David xlakata ni natlaway tuku nitlan. Pero pulana na’akxilhaw tuku akgspulatilhama David.

Akxni David tsalaniy Saúl, tsukuy tatsekga k’akgtum lanka lhuku. Chu xnatalan chu putum amakgapitsi xfamilia lakgminkgolh anta niku wi David. Max 400 lakchixkuwin lakgminkgolh, chu David xpuxkukan wa. David alh anta niku wi mapakgsina xalak Moab chu waniy: Kskiniyan akgtum lanka litlan, anta unu katawilakgolh kintlat chu kintse chu akit nakan akxilha la nakinkitaxtuniy. Alistalh David chu lakchixkuwin tiku xtalapulakgoy tsukukgolh tatsekgkgoy kkasipijni.

Titaxtulh kilhtamaku David lakgapasli Abigail. Xchixku, Nabal lanka rico chu laklanka kakiwin kgalhiy. Max 3,000 borregos chu 1,000 cabras kgalhiy. Nabal lu lixkajnit xtayat. Chu xpuskat lu xastlan. Chu na lu katsiy tlaway tuku xatlan. Akgtum kilhtamaku asta kalakgmaxtulh xfamilia. Na’akxilhaw la titlawalh.

David chu lakchixkuwin tiku talapulakgoy lu tlan likatsinikgolh Nabal. Makgtayakgolh nakatakuentajtlaway xborrego. Akgtum kilhtamaku David kamalakgachalh lakchixkuwin naskinikgoy Nabal akgtum litlan. Lakchixkuwin chankgolh akxni Nabal chu kskujnin xmakgsitmakgolh xborregos. Uma kilhtamaku tlawamaka fiesta. Chu Nabal katuwa tuku kgalhiy lu xalakkgama tuku wakan. Wa xlakata, lakchixkuwin tiku talapulakgoy David wankgoy: Akinin lu tlan kkalikatsininitan. Nitu kkamakgkgalhanitan nipara tantum borrego chu kkatakuentajtlawan. Kkaskiniyan litlan kakilatawaw mi liwat.

Ni ktikatawalh tuku kila lakchixkuwin tiku nipara klakgapaskgoy, wan Nabal. Lu lixkajni kakgalhtilh, chu katuwa kawaniy tuku nitlan xlakata David. Akxni David kgaxmatli uma, snun lisitsilh. Kawaniy lakchixkuwin tiku xtalapulakgoy: ¡Katiyatit mi espadajkan! Chu taxtukgolh xlakata namakgnikgoy Nabal chu kskujnin.

Chatum kskujni Nabal kgaxmatli tuku xalaklixkajni xtachuwin wa chu alh waniy Abigail. Abigail lakapara alh makaxa liwat chu kamakukilh kxburro chu alh putsa David. Akxni tatanokglhi taktalh kxburro chu tatsokgostanilh chu wanilh: Ni kuenta katlawani kinchixku Nabal. Xla xatonto, chu ni pulana lakpuwan tuku tlaway. Chu uwi liwat kamakglhtinanti. Chu kakilatapatiw uma tuku nitlan kkatlawanin.

Abigail linima liwat David

Wix lu xaskgalala kgalhtinalh David. Wix tlawa pi ni kakmakgnilh Nabal xlakata lu lixkajnit likatsiy. Kapimpara kminchik chu nitu kalipuwanti. Alistalh akxni Nabal nilh, Abigail na xpuskat wa David.

1 Samuel 22:1-4; 25:1-43.



Takgalhskinin

  • ¿La xtukuwani puskat tiku wi unu kdibujo nema lakgama David chu la xtayat?
  • ¿Tiku Nabal?
  • ¿Tuku xlakata David kamalakgachalh makgapitsi lakchixkuwin anta kxchik Nabal naskinikgoy akgtum litlan?
  • ¿Tuku kawani Nabal lakchixkuwin wantiku David xkamalakgachanit chu tuku lakpuwa natlaway David?
  • ¿La limasiyalh Abigail pi lu xaskgalala puskat?

Amakgapitsi takgalhskinin

  • Kalikgalhtawakga 1 Samuel 22:1-4.

    ¿Tuku li’axilhtit katsiyaw xlakata la xlamakgtayay xfamilia David chu akinin kstalaninanin Cristo la nachuna tlan nalamakgtayayaw? (Pro. 17:17; 1 Tes. 5:14.)

  • Kalikgalhtawakga 1 Samuel 25:1-43.

    ¿Tuku xlakata lu nitlan lichuwinankan Nabal? (1 Sam. 25:2-5, 10, 14, 21, 25.)

    ¿La lakpuskatin tiku kstalaninanin Cristo tlan natlawakgoy la tlawalh Abigail? (1 Sam. 25:32, 33; Pro. 31:26; Efe. 5:24.)

    ¿Tuku tama pulaktiy nixatlan x’ama tlaway David nema makgtayalh Abigail ni natlaway? (1 Sam. 25:31, 33; Rom. 12:19; Efe. 4:26.)

    ¿Chuna la David kgalhtilh Abigail, la kamakgtaya uma, lakchixkuwin nalakapastakkgoy chuna la Jehová ka’akxilha lakpuskatin? (Hech. 21:8, 9; Rom. 2:11; 1 Ped. 3:7.)