Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 59: Tuku xlakata tsalama David

Takgalhtawakga 59: Tuku xlakata tsalama David

AKXNI David kajku xmakgninit Goliat, Abner wantiku xapuxku xliputum soldados Israel lilh David anta niku wi Saúl. Saúl na xapuxku xsoldados tlaway David. Chu tlawalh pi anta katawilalh kxchik.

Alistalh akxni taspitkgolh soldados akxni kitatlawakgolh guerra li Filistea, lakpuskatin tsukukgolh kilhtlikgoy: Saúl lhuwa mil makgnilh pero David lhuwa xa’akgkaw mil makgnilh. Saúl lu sitsilh xlakata tlakg malankikgoy David chu wata ni wa. Pero Jonatán xapuxku xkgawasa Saúl ni xalakgkatsana. Lu paxkiy David chu David na lu paxkiy. Wa xlakata lamaxki xtachuwin pi tlan nalatalalinkgo xliputum kilhtamaku.

Mapakgsina Saúl lakgmakaʼama lanza

David stlan tlakga arpa chu Saúl lu lakgatiy la tlakgnan David. Pero akgtum kilhtamaku akxni lu snun xsitsinit xlakata xlakgkatsananiy lu lanka nitlan tuku tlawanilh David. Akxni xtlakgma arpa, Saúl tiyalh lanza chu lakgmaka’alh David chu wa: ¡Naklakgxtokgowakay David kpatsaps! Pero David tsalalh. A’akgtum kilhtamaku chuna tlawapa pero ni xtokgoparacha David. David lu liwana katsi pi lu skgalalh xlitawilat.

¿Lakapastaka tuku xwanit Saúl? Tiwa pi wantiku xmakgnilh Goliat x’ama maxkiy xtsumat xlakata xpuskat nawan. Chalh kilhtamaku akxni Saúl wanilh David pi namaxkiy xtsumat xtukuwani Mical pero pulana xlimakgnit 100 li Filistea. ¡Lu nitlan! Kaj xlakaskin pi li Filistea namakgnikgoy David. Pero ni chuna akgspulalh, wa xlakata Saúl maxkilh xtsumat.

Akgtum kilhtamaku Saúl waniy Jonatán chu putum amakgapitsi kskujnin pi makgniputun David. Pero Jonatán waniy: Nitu katlawani David. Nikxni atlawaniyan tuku nitlan. Wata makgtayanitan chu kxwastat wililh xlatamat akxni makgnilh Goliat. Chu akxni akxilhti chuna tlawalh asta lipaxuwa.

David tsalanima lanza

Saúl kgaxmatnilh xkgawasa, chu maxkilh xtachuwin pi nitu katitlawanilh. David liminparaka chu tsukupa skujniy la pulana kskuja. Pero akgtum kilhtamaku akxni David xtlakgnama, Saúl lakgmakanipa xlanza, pero David ni patilh chu lanza kpatsaps tayacha. ¡Uma xlimakgtutu litsakgsalh namakgni! ¡Chu David uku katsilh pi xlitsalat!

Akxni tama katsisni David an kxchik, pero Saúl kamalakgachay lakchixkuwin xlakata namakgnikgoy. Mical katsiy tuku tlawaputun xtlat. Wani David: Kapit uma katsisni komo ni napina chali xanin nalakgaxkgakgaya. Uma katsisni Mical makgtaya David xatsekg nataxtuy kventana. Max akgtujun kata David tatsekgpulay xlakata Saúl xmakgniputun.

1 Samuel 18:1-30; 19:1-18.



Takgalhskinin

  • ¿Tuku xlakata Saúl lakgkatsananiy David, pero xkgawasa Jonatán la likatsiy?
  • Akgtum kilhtamaku akxni David xlitlakgnanima arpa Saúl, ¿tuku lalh?
  • Xlakata David tlan xtatamakgaxtokgli Mical, ¿tuku skinilh Saúl natlaway David chu tuku xlakata chuna skinilh?
  • Chuna la tasiyay kdibujo, ¿tuku xlimakgtutu tlawalh Saúl akxni David xlitlakgnanima arpa?
  • ¿La makgtayalh Mical David xlakata ni namakgnikan chu tuku tlawalh David akgtujun kata?

Amakgapitsi takgalhskinin

  • Kalikgalhtawakga 1 Samuel 18:1-30.

    ¿La limasiyay pi chuna x’amakgolh lapaxkikgoy «amakgapitsi borregos» chu «ni xa lhuwa borregos» chuna la lu xlapaxkikgoy David chu Jonatán? (1 Sam. 18:1; Juan 10:16; Luc. 12:32; Zac. 8:23.)

    Xlakata Jonatán x’ama tawilay xlimapakgsina xlakgxokgo Saúl akxni xnilh, ¿la masiyay 1 Samuel 18:4 pi lu xlakgachixkuwili tiku xlaksakkanit xlimapakgsina natawila?

    ¿Tuku limasiyay tatsokgni xlakata Saúl, pi wantiku xalakgkatsana nalin natlaway laklanka talekgalhin chu tuku kinkalimasiyaniyan uma? (1 Sam. 18:7-9, 25; Sant. 3:14-16.)

  • Kalikgalhtawakga 1 Samuel 19:1-17.

    ¿La kxwastat wililh xlatamat Jonatán akxni talakgalhtilh Saúl? (1 Sam. 19:1, 4-6; Pro. 16:14.)