Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Takgalhtawakga 58: David chu Goliat

Takgalhtawakga 58: David chu Goliat

LI FILISTEA kalakgminparakgolh li Israel xlakata nakatatlawapara guerra. Kgalhtutu xalak puxku xnatalan David xsoldados Saúl. Wa xlakata akgtum kilhtamaku Isaí waniy David: Kakalipini kaxtalanchu chu tuku nawakgoy minatalan. Chu kaki’akxilhpi la kakitaxtunima.

Goliat

Akxni David chalh niku xyawakgonit xchikkan soldados, takgosni alh niku x’amakgoy tlawakgoy guerra chu kaputsalh xnatalan. Chatum lu xalanka chixku xtukuwani Goliat taxtuy chu kalikgalhkgamanan li Israel. Chali, chali chuna tlaway tsisa chu katsisni tipuxum kilhtamaku. Pixlanka wan: Kalaksaktit chatum chixku tiku nakintalachipay. Komo nakintlajay chu nakimakgniy, miskujnin nakwanaw. Pero komo akit naktlajay chu nakmakgni wixin kiskujnikan nawanatit. ¿Tiku kintalachipaputun? Kalaksaktit.

David kakgalhskin soldados: ¿Tuku namaxkikan tiku namakgni uma li Filistea chu nalakgmaxtu Israel k’uma tamaxana?

Chatum soldado wan: Saúl namaxki lhuwa tumin, chu namaxki xtsumat xlakata natatamakgaxtokga.

Pero putum li Israel pekuanikgoy Goliat xlakata lu lanka chixku. Atsinu ni akgtutu metro xlilanka, chu na kgalhi chatum soldado tiku liniy xescudo.

Makgapitsi soldados ankgoy wanikgoy mapakgsina Saúl pi David amputun talachipay Goliat. Pero Saúl wanilh David: Wix nila napina. Aktsinajku wix, chu Goliat lu makgasa soldado litaxtuy. David wan: Akit kmakgnilh tantum oso chu tantum león nema xlimakgolh xborregos kintlat. Uma li Filistea nakmakgni chuna la kkamakgnilh tama animales. Jehová nakimakgtaya. Wa xlakata Saúl wani: Kapit chu Jehová kamakgtayachan.

David an kkgalhtuchokgo chu saka akgkitsis chiwix xalakslipinki chu kamuju kxmurralh. Alistalh alh chu lilh xlixkgontalatni xlakata natalachipay uma lanka chixku. Goliat nila makanajlay. Lakpuwan pi lu lakapara namakgniy David.

David talama Goliat

Goliat wan: Katat unu, nakmaxki kawakgolh mintiyatliwa animales. Pero David kgalhti: Wix tampat kintalachipaya chu litana akgtum espada chu akgtum lanza chu akgtum aktsina lanza, pero akit kamacha talachipayan anta kxtukuwani Jehová. Chiyu Jehová namakamastayan kkimakan chu akit nakmakgniyan.

Chu David lakapara lakgtalakatsuwilh Goliat. Makutuy kxmurralh akgtum chiwix wili kxlixkgontalatni chu xliwakg xlitliwakga litalalh Goliat. ¡Mutanulh chiwix Goliat, chu xla niy! Akxni akxilhkgoy pi tiku tlakg xatliwakga makgnika, li Filistea tsalakgoy. Li Israel kastalanikgoy chu tlajakgoy uma guerra.

1 Samuel 17:1-54.



Takgalhskinin

  • ¿Tuku kawani Goliat katlawakgolh soldados li Israel?
  • ¿La xlilanka Goliat chu tuku namaxkiy Saúl wantiku namakgni Goliat?
  • ¿Tuku wa David akxni Saúl wani pi nila na’an talachipay Goliat xlakata lu kgawasaku?
  • ¿La limasiyalh David akxni kgalhtilh Goliat pi xlipawan Jehová?
  • Chuna la tasiyay kdibujo, ¿tuku limakgnilh David Goliat chu tuku ka’akgspulalh li Filistea alistalh?

Amakgapitsi takgalhskinin

  • Kalikgalhtawakga 1 Samuel 17:1-54.

    ¿Tuku xlakata ni xapekua xwanit David chu la akinin nachuna ni xapekua nawanaw? (1 Sam. 17:37, 45; Efe. 6:10, 11.)

    Goliat fuerza xtlajananputun, ¿tuku xlakata kstalaninanin Cristo ni fuerza natlajananputunkgoy akxni kgamanankgoy? (1 Sam. 17:8; Gál. 5:26; 1 Tim. 4:8.)

    ¿La limasiyay tuku wa David pi xkatsi pi Jehová x’ama makgtayay? (1 Sam. 17:45-47; 2 Cró. 20:15.)

    ¿La limasiyay uma tatsokgni pi wantiku lu xlikana xlachipamakgolh wa xaxlikana Dios Jehová chu dioses tiku ni xaxlikana chu ni kaj watiya xlachipamakgolh tamputiy soldados tiku xlamakgasitsi? (1 Sam. 17:43, 46, 47.)

    David lu xlikana xlipawan Jehová, ¿la nachuna tlawakgoy xatalaksani kristianos tiku akgataxtukgonit? (1 Sam. 17:37; Jer. 1:17-19; Apo. 12:17.)