Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 57: Dios laksaka David

Takgalhtawakga 57: Dios laksaka David
David lakgmaxtulh xaskgata borrego

¿AKXILHPAT tuku lanit unu kdibujo? Uma aktsu kgawasa lakgmaxtunit xaskgata borrego xlakata ni nalin uma oso. Uma oso xlinit xlakata nawa. Pero uma aktsu kgawasa stalanilh chu lakgmaxtulh. ¡Chu akxni tayalh oso uma aktsu kgawasa makgnilh! Chu a akgtum kilhtamaku uma aktsu kgawasa lakgmaxtulh tantum borrego nema xlinit tantum león. Uma kgawasa ni xapekua, ¿nixlikana? ¿Katsiya wix tiku uma kgawasa?

Wa uma kgawasa xtukuwani David. Chu xkachikin wanikan Belén. Obed xtata xwanit, xkgawasa Rut chu Booz. ¿Lakapastakaku tiku xwankgonit? Chu xtlat David, Isaí (Jesé) xtukuwani. David kuentajtlaway xborrego xtlat. David lakachilh akxni xtitaxtunitta akgkaw kata akxni Jehová wililh xlimapakgsina Saúl.

Chalh kilhtamaku akxni Jehová wanilh Samuel: Katiya aceite nema akmawakakan tiku lilaksakkanit mapakgsina nawan chu kapit kxchik Isaí anta kBelén. Klaksaknit chatum xkgawasa xlakata mapakgsina nawan. Akxni Samuel akxilhli Eliab, xapuxku xkgawasa Isaí, lakpuwa, lu xlikana pi wa uma. Pero Jehová wani: Ni wa ka’axilhti pi lu lanka chu stlan chixku. Niwa klaksaknit mapakgsina nawan.

Wa xlakata Isaí tasanilh achatum xkgawasa Abinadab chu lilh kxlakatin Samuel. Pero Samuel wan: Niwa, Jehová na niwa laksaknit. Alistalh Isaí limilh xkgawasa Samah. Niwa, Jehová na niwa laksaknit wan Samuel. Isaí limilh kgalhtujun xkamanan kxlakatin Samuel, pero xlikgalhtujunkan Jehová niti laksakli. Samuel kgalhskininalh: ¿Xputumkan uma mi lakgkgawasan?

Isaí wan: Wi achatum tlakg xakgawasaku. Pero makgat lamacha kuentajtlawama borrego. Akxni liminika David, Samuel akxilhli pi lu xastlan kgawasa. Jehová wan: Wa uma. Ka’akmawaka aceite. Chu Samuel chuna tlawalh. Lhuwa kilhtamaku natitaxtuy chu David mapakgsina nawan.

1 Samuel 17:34, 35; 16:1-13.



Takgalhskinin

  • ¿Tukuya xtukuwani uma kgawasa nema wi kdibujo, chu la likatsiyaw pi ni xapekua?
  • ¿Niku wi xchik David chu la wanikan xtlat chu xtata?
  • ¿Tuku xlakata waniy Jehová Samuel pi ka’alh kxchik Isaí (Jesé) anta kBelén?
  • ¿Tuku lalh akxni Isaí lilh kxlakatin Samuel kgalhtujun xlakkamanan?
  • ¿Tuku waniy Jehová Samuel akxni linika David?

Amakgapitsi takgalhskinin

  • Kalikgalhtawakga 1 Samuel 17:34, 35.

    ¿La limasiyay uma tuku tilalh pi ni xapekua xwanit David chu lu xaxlikana xlipawan Jehová? (1 Sam. 17:37.)

  • Kalikgalhtawakga 1 Samuel 16:1-14.

    ¿La kinkamakgtayayan xtachuwin Jehová nema tatsokgnit 1 Samuel 16:7 ni nalaksakpaxkinanaw chu nitlan nakalakpuwaniyaw amakgapitsi kaj xlakata la tasiyakgoy? (Hech. 10:34, 35; 1 Tim. 2:4.)

    ¿Tuku limasiyay tuku akgspulalh Saúl pi akxni Jehová makglhtiy xespíritu santo chatum kristiano wata tsukuy tanuniy ni xatlan talakapastakni? (1 Sam. 16:14; Mat. 12:43-45; Gál. 5:16.)