Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Takgalhtawakga 76: Malakgsputuka Jerusalén

Takgalhtawakga 76: Malakgsputuka Jerusalén

TITAXTULHA akgkaw kata akxni Nabucodonosor kalilh kBabilonia lakgkgawasan xalak Israel wantiku tlakg kgalhikgoy takgalhtawakga. ¡Chu uku ka’akxilhti! Jerusalén lhkuyumaka chu li Israel nema ninikgolh kachilimaka kBabilonia.

Kalakapastakti, palakachuwinanin xkawaninit li Israel tuku x’ama ka’akgspulay komo ni xlakgpalikgolh la katuwa tuku nitlan xtlawamakgolh. Li Israel ni kgaxmatnikgolh palakachuwinanin. Chuntiya xkakninanimakgolh atanu dioses chu nixkakninanimakgolh Jehová. Wa xlakata kamininiy uma tuku nitlan ka’akgspulama. Katsiyaw pi nitlan tuku xtlawamakgolh xlakata Ezequiel xpalakachuwina Dios kinkawaniyan uma tuku nitlan xtlawakgoy.

¿Katsiya wix tiku Ezequiel? Ezequiel chatum kgawasa tiku na linka kBabilonia, akxni na kalinka Daniel chu x’amigos, Sadrac, Mesac chu Abednego.

Akxni Ezequiel antaku wilacha kBabilonia, Jehová masiyaniy wantuku nitlan tlawamakgolh kJerusalén anta kxtemplo Jehová. Jehová limasiyanilh tuku nila tamakanajla. Ezequiel makgat wilacha kBabilonia pero Jehová ma’akxilhalh tuku lama ktemplo. ¡Wantuku akxilhli Ezequiel lu lixkajni!

Jehová waniy Ezequiel: Ka’akxilhti uma tuku xalaklixkajni tlawamakgolh li Israel ktemplo. Ka’akxilhti patsaps litalakgatsamanit xadibujos luwa chu amakgapitsi animales. ¡Ka’akxilhti li Israel kakninanimakgolh! Ezequiel akxilhma uma chu tsokgwili tuku lama.

Taxtumakgo kJerusalén tiku kachilimaka

Jehová kgalhskilh Ezequiel: ¿Katsiya wix tuku tsekg tlawamakgolh pulalinanin xalak Israel? Ezequiel na akxilha tuku tsekg tlawamakgolh. Akxilhli 70 lakchixkuwin kakninanimakgolh dioses nema nixaxlikana. Chu wankgoy: Jehová nitu kinka’akxilhman. Ay makgxtakgnit uma kachikin.

Jehová na masiyanilh Ezequiel makgapitsi lakpuskatin nema wilakgolh kxapakxtu templo. Chu kakninanimakgolh Tamuz chatum dios nema nixaxlikana. Chu Jehová wanipara Ezequiel: ¡Kaka’akxilhti uma lakchixkuwin tiku wilakgolh kxkilhtin templo xla Jehová! Ezequiel naka’akxilha max puxamakitsis lakchixkuwin. ¡Takilhputamakgolh chu kakninanimakgolh Chichini!

Uma kristianos nikinkgalhakgaxmatnikgoy, wan Jehová. ¡Nikajwatiya tlawamakgolh tuku nitlan, asta minkgoy kintemplo chu anta tlawakgoy! Wa xlakata Jehová wan: Namakgkatsikgoy kintasitsi. Chu niktikalakglipuwa akxni nakamalakgsputukan.

Li Israel tatlankaninikgolh mapakgsina Nabucodonosor akxni xtitaxtunita akgtutu kata akxni Jehová masiyanilh Ezequiel uma tuku nitlan xtlawamakgolh. Wa xlakata Nabucodonosor milh katalachipay. Akxni xtitaxtunitta akgtum kata a itat lakxtlawakgolh patsaps nema xlimakgstili kachikin chu lhkuyukgolh. Tlakg lhuwa nikgolh chu wantiku ni nikgolh kachilinka kBabilonia.

¿Tuku xlakata Jehová mastalh talakaskin kakamalakgsputuka li Israel? Wa xlakata ni kgalhakgaxmatnikgolh xlimapakgsin Jehová. Uma limasiyay pi lu xlakaskinka nakgalhakgaxmatniyaw Jehová, nikxni natlawayaw tuku ni lakgatiy.

Mapakgsina Nabucodonosor kamaxkilh talakaskin Israel pi katamakgxtakgkgolh makgapitsi anta k’Israel. Chu Guedalías xpuxkukan tlawalh. Pero makgapitsi lakchixkuwin makgnikgolh Guedalías. Chu la uku pekuankgoy xlakata li Babilonia naminkgoy kamakgniy xlakata uma tuku tlawakgolh. Wa xlakata mafuerzajlinikgolh Jeremías natatsalakgoy chu ankgolh k’Egipto.

Akxni ankgolh k’Egipto nialhtiku tamakgxtakgli k’Israel. Titaxtulh 70 kata nitiku latamalh anta kkachikin. Pero Jehová wan pi nakamaspitparay xkachikin akxni titaxtunitta nawan 70 kata. Chu akxni tama kilhtamku, ¿tuku ka’akgspulay li Israel kBabilonia? Ka’akxilhwi.

2 Reyes 25:1-26; Jeremías 29:10; Ezequiel 1:1-3; 8:1-18.



Takgalhskinin

  • ¿Tuku akgspulama Jerusalén chu li Israel chuna la tasiyay kdibujo?
  • ¿Tiku Ezequiel chu tuku lu laklixkajni ma’akxilhnilh Jehová?
  • Xlakata li Israel ni kgalhakgaxmatnikgolh Jehová, ¿tuku wa Jehová natlaway?
  • ¿Tuku tlawalh Nabucodonosor akxni li Israel tatlankaninikgolh?
  • ¿Tuku xlakata Jehová mastalh talakaskin pi kakamasputuka li Israel?
  • ¿Tuku xlakata nialh analh kristianos k’Israel, chu niku akglit kata nialhti latamalh anta?

Amakgapitsi takgalhskinin

  • Kalikgalhtawakga 2 Reyes 25:1-26.

    ¿Tiku xwanit Sedequías chu tuku akgspulalh? Chu uma tuku akgspulalh, ¿la makgantaxtilh tuku xlichuwinanit Dios pi chuna x’ama lay? (2 Rey. 25:5-7; Eze. 12:13-15.)

    Xlakata li Israel nialh kgalhakgaxmatnikgolh Jehová chu kakninanikgolh atanu dioses, ¿tiku wa Jehová pi xkuentajkan? (2 Rey. 25:9, 11, 12, 18, 19; 2 Cró. 36:14, 17.)

  • Kalikgalhtawakga Ezequiel 8:1-18.

    ¿La nachuna tlawamakgolh tiku kaj wankgoy pi kstalaninanin Cristo chuna la xtlawamakgolh li Israel tiku xtalakgaspitnikgonit xaxlikana takanajla chu xkakninanikgoy Chichini? (Eze. 8:16; Isa. 5:20, 21; Juan 3:19-21; 2 Tim. 4:3.)