Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 72: Dios makgtaya Ezequías

Takgalhtawakga 72: Dios makgtaya Ezequías

¿KATSIYA wix tuku xlakata uma chixku tlawanima oración Jehová? ¿Tuku xlakata wilinit uma tatsokgni kxlakatin niku tlawanikan tamakamastan Jehová? Uma chixku xtukuwani Ezequías. Wa mapakgsina kxapulaktiy laklanka familia li Israel. Chu uku kgalhiy lanka ta’akglhuwit. ¿Tuku xlakata?

Mapakgsina Ezequías tlawama oración

Xlakata soldados li Asiria malakgsputukgolha pulakkaw laklanka familia xalak pakxtu. Jehová mastalh talakaskin pi chuna ka’akgspulakgolh xlakata tama kristianos lu lixkajni xlikatsikgoy. Chu uku soldados li Asiria minkgonit xlakata nakamasputuy pulaktiy laklanka familia li Israel.

Mapakgsina xalak Asiria makaminilh tatsokgni Ezequías. Wa uma tatsokgni nema wilinit xlakatin niku tlawanikan tamakamastan Jehová. Anta uma ktatsokgni lixkajni lichuwinan Jehová, chu anta waniy Ezequías katamakamastakgolh. Wa xlakata Ezequías waniy Dios: Wix kintlat Jehová, kakilamakgtayaw chu nitu kakinkatlawanin mapakgsina xalak Asiria. Chuna putum laklanka kachikin nakatsikgoy pi wix miakstu Dios chu nitiku achatum. ¿Nakgaxmatni Jehová x’oración?

Ezequías xatlan mapakgsina. Ni la tiku xalak lixkajni mapakgsinanin xapulakkaw laklanka familia xalak Israel chu ni chuna la xtlat Acaz. Xla kgalhakgaxmata chuna la wi xlimapakgsin Jehová. Wa xlakata akxni Ezequías tlawakgolh x’oración, Jehová malakgachalh xpalakachuwina Isaías xlakata nawaniy: Xmapakgsina li Asiria ni katitanulh kJerusalén. Ni chastum ksoldado natalakatsuwiy. Nipara kgantum flecha katimakaminkgolh kkachikin.

Ka’akxilhti uma dibujo. ¿Katsiya tiku umakgolh soldados nema nikgonitta? Wa li Asirios. Jehová malakgachalh x’ángel chu kamakgnilh 185,000 soldados li Asiria. Wa xlakata mapakgsina li Asiria taspitpa.

Nikgonit soldados li Asiria

Pulaktiy laklanka familia xapakgalhu lakgtaxtukgolh chu kachikin tlan tawilaparakgolh pero ni makgas. Akxni ay xninitta Ezequías, tsukulh mapakgsinan xkgawasa wanikan Manasés. Mapakgsinanin, Manasés chu xkgawasa Amón lu laklixkajni likatsikgoy. Wa xlakata kachikin litatsamalh tiku nitlan likatsiy chu tiku lakatsalay limapakgsin. Akxni kskujnin Amón makgnikgolh, xkgawasa Josías wa tsukulh mapakgsinan anta kpulaktiy laklanka familia nema xalak pakgalhu.

2 Reyes 18:1-36; 19:1-37; 21:1-25.



Takgalhskinin

  • ¿Tiku uma chixku nema wi kdibujo chu tuku xlakata lhuwa ta’akglhuwit kgalhiy?
  • ¿Tiku makaminilh tatsokgni Ezequías nema maminit kxlakatin niku tlawakan tamakamastan chu tuku wanima Jehová kx’oración?
  • ¿La xlikatsiy mapakgsina Ezequías chu tukuya tamakatsin wanilh Jehová xpalakachuwina Isaías pi kalinilh Ezequías?
  • ¿Tuku katlawanilh x’ángel Jehová li Asiria, chuna la tasiyay kdibujo?
  • Maski tamapakgsin xapulaktiy nema xwilakgolh kpakgalhu ni makgas tlan tawilakgolh, ¿tuku lalh akxni xninitta Ezequías?

Amakgapitsi takgalhskinin

  • Kalikgalhtawakga 2 Reyes 18:1-36.

    ¿Tuku kawanilh Rabsaqué xpalakachuwina li Asiria, xlakata nakamaxlajwaniy xtakanajlakan li Israel? (2 Rey. 18:19, 21; Éxo. 5:2; Sal. 64:3.)

    Chuna la tlawalh Ezequías akxni Asirios xkatalachipaputun, ¿la nachuna tlawakgoy xtatayananin Jehová akxni wi tiku katalatlaway? (2 Rey. 18:36; Sal. 39:1; Pro. 26:4; 2 Tim. 2:24.)

  • Kalikgalhtawakga 2 Reyes 19:1-37.

    Akxni anan lhuwa talakgaputsit, ¿la nachuna tlawakgoy xkachikin Dios chuna la tlawalh Ezequías? (2 Rey. 19:1, 2; Pro. 3:5, 6; Heb. 10:24, 25; Sant. 5:14, 15.)

    Kawanti makgtutu la tatlajilh Senaquerib chu, ¿tiku nachuna na’akgspulay chuna la akgspulalh Senaquerib? (2 Rey. 19:32, 35, 37; Apo. 20:2, 3.)

  • Kalikgalhtawakga 2 Reyes 21:1-6, 16.

    Manasés mapakgsinalh kJerusalén, ¿tuku xlakata tlan nawanaw pi xla na tlakg xalixkajni mapakgsina xwanit? (2 Cró. 33:4-6, 9.)