Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 70: Jonás chu xalanka skiti

Takgalhtawakga 70: Jonás chu xalanka skiti

KA’AKXILHTI uma chixku tsankgama kchuchut. Lu nitlan tuku akgspulama, ¿nixlikana? ¡Uma skiti nakgotway! ¿Katsiya wix tiku uma chixku? Xtukuwani Jonás. Na’akxilhaw la tanulh klhuwa takglhuwit uma chixku.

Jonás xpalakachuwina Jehová. Chu akxni nina makgas xninit xpalakachuwina Jehová wanikan Eliseo, Jehová wanilh Jonás: Kapit klanka kachikin wanikan Nínive. Lu snun lixkajni likatsikgoy kristianos tiku anta lamakgolh, chu klakaskin pi wix kakalixakgatli xtalekgalhinkan.

Jonás chu xalanka skiti

Chu Jonás ni amputun. Wa xlakata tanuy kbarco nema alakatunu niku x’ama chu ni kNínive. Jehová nitlan akxilhli pi Jonás tsalama. Wa xlakata makamilh akgtum lanka un chu sen. Uma un chu sen lu tliwakga chu matsankgaputun barco. Tiku kskujkgoy kbarco lu pekuankgoy, chu tsukukgolh pixlanka skinikgoy xdioskan pi kakamakgtayalh.

Alistalh Jonás kawani: Akit kkakninaniy Jehová, Dios wantiku tlawanit akgapun chu Katiyatni. Ktsalama xlakata ni ktlawaputun tuku Jehová kiwanilh naktlaway. Wa xlakata tiku kskujkgoy kbarco tsukukgolh kgalhskinkgoy: ¿Tuku nakkatlawaniyan xlakata natachokgoy uma un chu sen?

Jonás kgalhtinalh: Kakilamujuw kchuchut, chu uma pupunu natakaksa. Chu tiku skujkgoy kbarco ni mujuputunkgoy Jonás, pero tlakg tliwakga tsukulh min un chu sen, wa xlakata mujukgolh Jonás anta kpupunu. Tunkun takaksli un chu sen, chu chuchut xalak pupunu kaks tawilapa.

Akxni Jonás tsankgalh anta kchuchut, tantum lu xalanka skiti kgotwalh. Pero Jonás ni nilh. Akgtutu kilhtamaku chu akgtutu katsisni kxpokgo uma skiti xtajuma Jonás. Jonás lilipuwa xlakata ni kgalhakgaxmatnilh Jehová chu ni alh kNínive. Wa xlakata, ¿katsiya tuku tlawalh?

Jonás tlawanilh oración Jehová chu skinilh pi kamakgtayalh. Alistalh Jehová tlawalh pi tama lanka skiti ka’alh kilhtaxtuy kxkilhpan pupunu. Alistalh Jonás alh kNínive. ¿Ni kinkamasiyaniyan uma pi lu xlakaskinka nakgalhakgaxmatniyaw Jehová tuku nakinkawaniyan?

Jonás 1-4.



Takgalhskinin

  • ¿Tiku Jonás, chu tuku wanilh Jehová natlaway?
  • Xlakata Jonás ni x’amputun niku malakgachalh Jehová, ¿tuku tlawalh?
  • ¿Tuku kawanilh Jonás tiku kskujkgoy kbarco pi katlawanikgolh xlakata xtakaksli un chu sen?
  • Chuna la tasiyay kdibujo, ¿tuku lalh akxni Jonás tsankgalh kchuchut?
  • ¿Niku akglit kilhtamaku xtajuma Jonás kxpulakni skiti, chu tuku tlawalh anta kxpokgo skiti?
  • ¿Niku alh Jonás akxni nialh kxpokgo skiti xtajuma chu tuku kinkamasiyaniyan uma tuku tilalh?

Amakgapitsi takgalhskinin

  • Kalikgalhtawakga Jonás 1:1-17.

    Chuna la katsiw, ¿la xlakpuwan Jonás xlakata na’an kNínive lichuwinan xlakata Dios? (Jon. 1:2, 3; Pro. 3:7; Ecl. 8:12.)

  • Kalikgalhtawakga Jonás 2:1, 2, 10.

    ¿La kinkamasiyaniyan chuna la titlawalh Jonás pi akinin tlan nalipawanaw pi Jehová kgaxmata kioraciónkan? (Sal. 22:24; 34:6; 1 Juan 5:14.)

  • Kalikgalhtawakga Jonás 3:1-10.

    ¿La kinkamakgtayayan xlakata katsimaw pi Jehová maskujupa Jonás maski pulana ni xmakgantaxtunit taskujut nema xliyawakanit? (Sal. 103:14; 1 Ped. 5:10.)

    ¿Tuku kinkamasiyaniyan xlakata Jonás akxni tunkun nitlan kalakpuwanilh li Nínive, chu la akinin nakalakpuwaniyaw kristianos tiku wilakgolh niku latapuliyaw? (Jon. 3:6-9; Ecl. 11:6; Hech. 13:48.)