Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 67: Josafat lipawan Jehová

Takgalhtawakga 67: Josafat lipawan Jehová

¿KATSIYA wix tiku uma lakchixkuwin chu tuku tlawamakgolh? Amakgolh kguerra, chu lakchixkuwin tiku pulatilhakgoy kilhtlitilhakgoy. Max lakpuwana: ¿Tuku xlakata ni linkgoy xespadajkan chu xlanzajkan wantiku kilhtlitilhakgoy? Ka’akxilhwi tuku xlakata.

Li Israel amakgolh kguerra

Josafat (Jehosafat) xmapakgsina tamputiy laklanka familia xla Israel. Josafat na xlama akxni xlamakgolh Acab chu Jezabel wantiku xkamapakgsiy pulakkaw laklanka familia nema xwilakgolh pakxtu. Pero Josafat lu xatlan mapakgsina chu xtlat Asa (Asá) na lu xatlan xlikatsiy. Wa xlakata akglhuwa kata kristianos tiku xalak tamputiy laklanka familia nema xwilakgolh pakgalhu, lu tlan xwilakgolh.

Pero uku wintuku kamakgapekuankgoy kristianos. Makgapitsi makatsininanin wanikgoy Josafat: Mimakgolh lu lhuwa soldados xalak Moab, Ammón chu Seír, natatlawakgoyan guerra. Lhuwa li Israel tamakxtumikgoy kJerusalén xlakata naputsakgoy xtamakgtay Jehová. Ankgoy ktemplo, chu anta Josafat tlaway akgtum oración chu wan: Jehová, Jehová kiDioskan, nikkatsiyaw tuku naktlawayaw. Nilay ktikatlajaw uma soldados lu xlhuwakan. Kakilamakgtayaw.

Jehová kgaxmata chu tlawalh pi chatum kskujni kakawanilh kachikin: Uma guerra ni milakan wa xla Dios. Ni wixin katitlawatit guerra. Kaj na’akxilhatit la Jehová nakalakgmaxtuyan.

Wa xlakata lichali Josafat waniy kachikin: ¡Kalipawantit Jehová! Wa xlakata wililh tiku nakilhtlikgoy kxlakatin soldados chu akxni x’amakgolh kguerra kilhtlinitilhakgoy Jehová. ¿Katsiya tuku lalh akxni talakatsuwikgolh xlakata natlawakgoy guerra? Jehová tlawalh pi wantiku xtalamakgasitsinkan xakstukan nalamakgnikgoy. ¡Chu akxni li Israel chankgolh anta niku xwilakgolh soldados tiku xtalamakgasitsinkan putum xnikgonitta!

Lu xaskgalala wa Josafat xlakata lipawa Jehová, ¿nixlikana? Komo nachuna natlawayaw, lu xalakgskgalalan nawanaw.


Takgalhskinin

  • ¿Tiku Josafat (Jehosafat) chu tiku na xlamakgolh akxni xlama?
  • ¿Tuku xlakata pekuankgoy li Israel, chu tuku tlawakgolh lhuwa kristianos xalak Israel?
  • ¿La kgalhtilh Jehová x’oración Josafat?
  • ¿Tuku tlawalh Jehová pi kalalh akxni nina a’xtsukuy guerra?
  • ¿Tuku li’akxilhtit kinkamasiyaniyan chuna la tlawalh Josafat?

Amakgapitsi takgalhskinin

  • Kalikgalhtawakga 2 Crónicas 20:1-30.

    ¿La limasiyalh Josafat tuku xlitlawatkan kskujnin Jehová akxni wi tiku katlawaniputun tuku nitlan? (2 Cró. 20:12; Sal. 25:15; 62:1.)

    Xlakata Jehová wakg kilhtamaku wi tiku maklakaskin xlakata nakatachuwinan xkachikin, ¿tiku kalimaklakaskin uku xlakata natachuwinan xkachikin? (2 Cró. 20:14, 15; Mat. 24:45-47; Juan 15:15.)

    Akxni Jehová namatsukiy xalanka xguerra xla wantiku putum kgalhi litliwakga, ¿la nachuna natawilakgoyaw chuna la xwi Josafat? (2 Cró. 20:15, 17; 32:8; Apo. 16:14, 16.)

    Chuna la xtlawakgoy levitas, ¿la nachuna misioneros chu precursores na makgtayanankgoy xlakata natalichuwinan xtachuwin Dios xlikalanka katiyatni? (2 Cró. 20:19; Rom. 10:13-15; 2 Tim. 4:2.)