Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 64: Salomón tlaway templo

Takgalhtawakga 64: Salomón tlaway templo

AKXNI David nina a’xniy maxkilh Salomón tatsokgni niku xtatsokgnit la Jehová xlakaskin natlawakan xtemplo. Akxni xli’akgtati kata akxni xmapakgsinama Salomón tsukulh tlaway templo, chu akgtujun kata aitat litlawakgolh. Lhuwa xa’akgkaw mil lakchixkuwin tsukukgolh skujkgoy anta ktama lanka chiki, chu lu taparaxla kitaxtulh, xlakata lu lhuwa oro chu plata litlawaka.

Uma templo kgalhi pulaktiy tlakg xalaklanka chuna la xwi tabernáculo. Pero umakgolh pulaktiy xlakata, tlakg lanka nixawa xla tabernáculo. Salomón tlaway pi caja xla talakkaxlan kawilika alakatanu kpulaktu tlakg xa’aktsu, chu amakgapitsi tuku na anta xtanumakgolh ktabernáculo kawilikan x’apulaktu tlakg xalanka.

Akxni tlawakgoka templo litlawaka lanka fiesta. Chu Salomón tatsokgostalh kxlakatin templo chuna la wix akxilhpat, chu wan kx’oración: Nipara k’akgapun lay akchaniyan anta natawilaya xlakata mi lilanka, ¿la na akchaniyan uma templo? KiDios, kakakgalhakgaxpatti minkachikin akxni unu naminkgoy tlawakgoy x’oraciónkan.

Mapakgsina Salomón tlawama oración

Akxni Salomón tlawakgolh x’oración, mokgosli lhkuyat k’akgapun. Chu lhkuyulh animales nema xkamakamastamaka. Chu xmakgxkgakganat Jehová litatsamalh templo. Uma limasiyalh pi Jehová kgalhakgaxmatma x’oración, chu lu lipaxuwalh templo nema tlawalh Salomón. Chu kachikin unu ktemplo minkgoy kakninankgoy Jehová chu nialh ktabernáculo.

Lhuwa kata Salomón lu tlan mapakgsinalh, chu kristianos lu paxuwakgoy. Pero Salomón katatamakgaxtokgli lhuwa lakpuskatin xalak alakatanu kachikinin wa nema ni kakninanikgoy Jehová. ¿Akxilhpat kdibujo chatum xpuskat kakninanima xdios? Alistalh xlakpuskatin matlawikgolh pi Salomón na katsukulh kakninaniy amakgapitsi dioses. ¿Katsiya tuku tsukulh lay? Salomón lu lixkajni tsukulh likatsiy, chu kachikin nialh paxuwakgoy.

Mapakgsina Salomón kakninanima ídolo

Uma tuku tlawalh Salomón, Jehová lu lisitsinilh, chu waniy: Nakmakglhtiyan tamapakgsin chu atanu tiku nakmaxkiy. Ni kmilatamat naktlaway uma tuku kwaniman, chuna naktlaway akxni minkgawasa namapakgsinan. Pero ni putum ktimakglhtilh kristianos nema namapakgsiy minkgawasa. Na’akxilhaw la chuna lalh uma.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.



Takgalhskinin

  • ¿Niku akglit kata litlawalh templo Salomón, chu tuku xlakata lu taparaxla kitaxtulh?
  • ¿Niku pulaklit tlakg xalaklanka kgalhiy templo chu tuku wilika xa’apulaktu tlakg xaktsu?
  • ¿Tuku wa Salomón kx’oración akxni tlawakgoka templo?
  • ¿La limasiyalh Jehová pi lu tlan akxilhli x’oración Salomón?
  • ¿Tuku matlawikgolh xlakpuskatin Salomón chu tuku akgspulalh?
  • ¿Tuku xlakata Jehová lu sitsinilh Salomón chu tuku wanilh?

Amakgapitsi takgalhskinin

  • Kalikgalhtawakga 1 Crónicas 28:9, 10.

    Xlakata xtachuwin David nema tatsokgnit anta 1 Crónicas 28:9, 10, ¿tuku nalitakgoxiyaw xliputum kilhtamaku natlawayaw kkilatamatkan? (Sal. 19:14; Fili. 4:8, 9.)

  • Kalikgalhtawakga 2 Crónicas 6:12-21, 32-42.

    ¿La limasiyalh Salomón xlakata tuku wa, pi niniku wi akgtum chiki xtatlaw chixku na’akchani anta natawilay xlakata Dios lu Lanka? (2 Cró. 6:18; Hech. 17:24, 25.)

    ¿Tuku kinkamasiyaniyan xlakata Jehová, tuku tiwa Salomón nema tatsokgnit anta 2 Crónicas 6:32, 33? (Hech. 10:34, 35; Gál. 2:6.)

  • Kalikgalhtawakga 2 Crónicas 7:1-5.

    Nachuna la li Israel lu lakpuwankgolh pi namalankikgoy Jehová akxni akxilhkgolh xlilanka, ¿tuku kililakapastakatkan akinin akxni akxilhaw xtasikulunalin kxkachikin? (2 Cró. 7:3; Sal. 22:22; 34:1; 96:2.)

  • Kalikgalhtawakga 1 Reyes 11:9-13.

    ¿La limasiyalh xlatamat Salomón pi lu xlakaskinka ninamakgxtakgaw Dios asta kxlisputni kilatamatkan? (1 Rey. 11:4, 9; Mat. 10:22; Apo. 2:10.)