Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 56: Saúl xapulana mapakgsina xalak Israel

Takgalhtawakga 56: Saúl xapulana mapakgsina xalak Israel
Samuel akmawakamaka aceite Saúl xlakata mapakgsina nawan

KA’AKXILHTI Samuel akmawakama aceite kxakgxakga uma chixku. Chuna xkatlawakan xlakata xlimasiyakan wantiku xlilaksakkanit xlimapakgsina. Jehová waniy Samuel pi ka’akmawakalh aceite Saúl. Uma aceite lu muksun.

Saúl xlakpuwan pi ni katimatlanilh mapakgsina nawan. Wa xlakata waniy Samuel: Akit xfamilia li Benjamín, wa familia tlakg xa’aktsu xla li Israel. ¿Tuku xlakata wix wana pi mapakgsina nakwan? Jehová lu paxkiy Saúl xlakata ni lu lanka makgkatsikan chu nilakgatiy lu xlakaskinka kali’akxilhka. Wa xlakata Jehová lilaksakli xlakata mapakgsina nawan.

Pero Saúl ni limaxkgen chu ni aktsu chixku. Xfamilia Saúl kgalhikgoy tumin, chu lu xastlan chixku chu lanka. ¡Chu tlakg lanka ni la amakgapitsi li Israel! Saúl na lu tlan kgosnan chu lu tliwakga chixku. Chu kristianos lu lipaxawakgoy pi Jehová laksakli Saúl xlimapakgsina natawilay. Chu xputumkan tsukukgolh wankgoy: ¡Lanka kawa kimapakgsinakan!

Xtalamakgasitsin li Israel chunaku tliwakga wilakgolh chu katuwa katlawaniy li Israel. Ni makgas xtitaxtunit kilhtamaku akxni mapakgsina tlawaka Saúl, li Ammón kalakgalh xlakata nakatatlaway guerra. Pero Saúl mamakgstokgli lhuwa soldados, chu katlajalh li Ammón. Kachikin lu lipaxuway pi kgalhikgoy xmapakgsinakan Saúl.

Titaxtulh lhuwa kata, chu Saúl kamatlajiy li Israel lhuwa guerras. Saúl na kgalhiy chatum xkgawasa ni xapekua wanikan Jonatán. Chu Jonatán kamakgtaya li Israel natlajanankgoy lhuwa guerras. Chu li Filistea tlakg lipekua xtalamakgasitsinkan li Israel. Akgtum kilhtamaku lhuwa, lhuwa mil li Filistea lakgminkgolh li Israel xlakata nakatatlaway guerra.

Samuel waniy Saúl pi kakgalhilh asta akxni nachin xlakata natlawaniy tamakamastan Jehová. Pero Samuel makgapalay. Chu Saúl pekuan pi namatsukikgoy guerra li Filistea, wa xlakata nialh kgalhilh Samuel chu wa tlawalh tamakamastan. Akxni chilh Samuel wanilh Saúl pi ni kgalhakgaxmatninalh. Samuel waniy: Jehová nalaksaka achatum tiku xmapakgsina li Israel nawan.

Alh kilhtamaku, Saúl ni kgalhakgaxmata Jehová. Samuel waniy: Tlakg tlan kgalhakgaxmatkan Jehová nixawa namaskiwikan tlakg xalak lanka borrego. Xlakata ni kgalhakgaxmatti Jehová, Jehová nialh katimaxkin talakskin xmapakgsina Israel nawana.

Uma wintuku kinkamasiyaniyan. Kinkamasiyaniyan pi lu xlakaskinka putum kilhtamaku nakgalhakgaxmataw Jehová. Chu uma kinkamasiyaniyan pi chatum tiku lu tlan likatsiy, la xwanit Saúl, na tlan talakgpaliy xtayat. ¡Nikxni chuna kakinka’akgspulan!, ¿nixlikana?

1 Samuel, capítulo 9 asta 11; 13:5-14; 14:47-52; 15:1-35; 2 Samuel 1:23.



Takgalhskinin

  • ¿Tuku tlawama Samuel chuna la tasiyay kdibujo chu tuku xlakata?
  • ¿Tuku xlakata paxkiy Jehová Saúl, chu la xwanit?
  • ¿La xtukuwani xkgawasa Saúl, chu tuku tlawalh?
  • ¿Tuku xlakata Saúl tlawaniy akgtum tamakamastan Dios chu ni kgalhilh Samuel wa natlaway?
  • ¿Tuku kinkamasiyaniyan tuku katsiw xlakata Saúl?

Amakgapitsi takgalhskinin

  • Kalikgalhtawakga 1 Samuel 9:15-21 chu 10:17-27.

    Xlakata Saúl ni lanka xmakgkatsikan, ¿la makgtayalh uma xlakata nitu katlawanilh makgapitsi lakchixkuwin akxni likgalhkgamanankgolh? (1 Sam. 9:21; 10:21, 22, 27; Pro. 17:27.)

  • Kalikgalhtawakga 1 Samuel 13:5-14.

    ¿Tukuya talekgalhin tlawalh Saúl anta kGuilgal? (1 Sam. 10:8; 13:8, 9, 13.)

  • Kalikgalhtawakga 1 Samuel 15:1-35.

    ¿Tukuya lanka talekgalhin tlawalh Saúl xlakata Agag, mapakgsina tiku xalak Amaleq? (1 Sam. 15:2, 3, 8, 9, 22.)

    ¿La Saúl ni xlitawilaputun talekgalhin chu amakgapitsi xkaliwiliputun tuku nitlan xtlawanit? (1 Sam. 15:24.)

    ¿Tuku nikilitlawatkan akxni wi tiku nakinkastakyawayan? (1 Sam. 15:19-21; Sal. 141:5; Pro. 9:8, 9; 11:2.)