Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 55: Chatum aktsu kgawasa skujnaniy Dios

Takgalhtawakga 55: Chatum aktsu kgawasa skujnaniy Dios

¿NIXLIKANA pi lu stlan uma aktsu kgawasa? Xtukuwani Samuel. Chu uma chixku tiku akchipanit, wa xapuxku sacerdote xalak Israel wanikan Elí. Wantiku wilakgolh unu kdibujo wa liminkgonit uma aktsu kgawasa, wa xtlat wanikan Elqaná chu xtse Ana.

Samuel lakgapasa xapuxku sacerdote Elí

Samuel kajku max akgtati o akgkitsis kata kgalhiy. Pero anta unu natawilay kxtabernáculo Jehová anta niku wi Elí chu amakgapitsi sacerdotes. ¿Tuku xlakata liminkgolh Elqaná chu Ana lu skgataku Samuel naskujnaniy Jehová anta kxtabernáculo? Ka’akxilhwi.

Nina akglhuwa kata xtitaxtunit uma, Ana lu xlipuwan. Xlakata nilay xkgalhiy chatum aktsu skgata, chu lu xlakgatiy pi na xkgalhilh. Chuna akgtum kilhtamaku akxni xanit kxtabernáculo Jehová, tlawanilh oración Jehová chu wanilh: ¡Jehová, Jehová ni kakinpatsankga! Komo wix nakimaxkiya chatum aktsu kinkgawasa, lu kmaxkiyan kintachuwin pi nakmakamaxkiyan, chu naskujnaniyan xliputum xlatamat.

Jehová kgalhtinilh x’oración Ana chu ni akglhuwa papa’ titaxtulh kgalhilh Samuel. Ana lu xpaxkiy aktsu xkgawasa, chu tsukulh masiyaniy xlakata Jehová akxni kajku aktsina xwanit. Chu wanilh xchixku: Akxni Samuel tlantiya xakstu nakuentajtlawakan chu nialh nakilakaskin, naklin anta kxtabernáculo Jehová xlakata anta naskujnaniy.

Chuna tlawamakgolh Ana chu Elqaná la akxilhmaw kdibujo. Xlakata xnatlatni Samuel lu liwana xmasiyanikgonit xlakata Dios, xla lu xlipaxuway naskujniy Jehová kxtabernáculo. Elqaná chu Ana kata kata minkgoy kakninanikgoy Jehová unu kxtabernáculo chu lakgapaxialhnankgoy aktsu xkgawasakan. Chu akxni min Ana liminiy xasasti xlhakgat xapakgaxtulu nema tlawaninit Samuel.

Titaxtuy akglhuwa kata, chu Samuel chunaku skujnanima kxtabernáculo Jehová chu Jehová paxkiy chu kachikin na paxkikgoy. Pero Hofní chu Finees (Finehás) xkamanan xapuxku sacerdote Elí, nitlan likatsikgoy. Katuwa tlawakgoy tuku nitlan, chu tlawakgoy pi amakgapitsi ni nakgalhakgaxmatnikgoy Dios. Elí xkalitamakxtut li sacerdote pero ni chuna tlawalh.

Samuel kgawasaku chu maski katuwa nitlan lama anta nilimakxtakga naskujnaniy Jehová anta ktabernáculo. Pero Jehová lhuwa kilhtamaku ni a’xakgatliy chatum chixku, xlakata lu ni lhuwa kristianos lu xlikana paxkikgoy. Akxni Samuel tlakg stakli uma tuku lalh:

Samuel lhtatama anta kxtabernáculo Jehová chu xalan kgaxmatli tachuwinanka. Chu kgalhtinalh: Unu kma. Chu takilh chu lakapara alh niku xwi Elí chu waniy: Wix kixakgatli chu ukwi.

Pero Elí kgalhtinalh: Akit nitu kxakgatliman, kapimpara tapaya. Wa xlakata Samuel anpa tamay.

Alistalh xlimakgti tachuwimanparaka chu wanika: ¡Samuel! Wa xlakata Samuel takiy chu anpa niku wi Elí chu waniy: Kixakgatli chu ukminit. Pero Elí waniy: Nitu kxakgatliman, kinkgawasa. Kakitapapara. Wa xlakata Samuel anpa tamay.

Xlimakgtutu kgaxmatpa tachuwinamparaka: ¡Samuel! Wa xlakata Samuel lakapara anpa niku xwi Elí. Kminpa lu xaxlikana pi kintachuwinanti liwana kgaxmatli, wan. Chu uku Elí katsiy pi Jehová tiku tachuwinama. Waniy Samuel: Kakitapapara chu komo nakgaxpatparaya naxakgatlikana nawana: Kachuwinanti Jehová akit miskujni kkgaxmatma.

Chuna kgalhtinalh Samuel akxni Jehová chuwinampa. Jehová waniy Samuel pi nakamaxokgey Elí chu xkamanan. Ni makgas alh kilhtamaku Hofní chu Finees nikgolh akxni xkatalachipama li Filistea, chu akxni Elí kgaxmatli tuku xakgspulakgonit litakatalalh, tapixtukxli chu nilh. Chuna lalh la Jehová xwanit.

Samuel stakli chu xa’awatiya xlakkaxtlawana ta’akglhuwit xalak Israel wa. Akxni kgololh, kachikin waniy: Kalaksakti chatum kimapakgsinakan. Samuel ni lakgatiy, xlakata Jehová xmapakgsinakan. Pero Jehová waniy pi kakakgalhakgaxmatnilh kachikin.

1 Samuel 1:1-28; 2:11-36; 4:16-18; 8:4-9.



Takgalhskinin

  • ¿La xtukuwani aktsu kgawasa nema wi kdibujo chu tiku na anta wilakgolh?
  • Akgtum kilhtamaku, ¿tuku wa kx’oración Ana akxni kilalh kxtabernáculo Jehová chu la kgalhtilh Jehová?
  • ¿Niku akglit kata xkgalhiy Samuel akxni linka naskujnaniy Jehová anta kxtabernáculo chu tuku tlaway xtse kata kata?
  • ¿Tuku xtukuwanikan xkamanan Elí chu la xwanit xtayatkan?
  • ¿La tlawalh Jehová akxni xakgatlilh Samuel, chu tuku tamakatsin maxkilh?
  • ¿Tuku taskujut tlawalh Samuel akxni lankata wa, chu tuku skinikgolh akxni kgololh?

Amakgapitsi takgalhskinin

  • Kalikgalhtawakga 1 Samuel 1:1-28.

    ¿Tuku lu xatlan li’akxilhtit kawilinilh Elqaná xalak natlatni chuna la xlipulay kxaxlikana takanajla? (1 Sam. 1:3, 21; Mat. 6:33; Fili. 1:10.)

    ¿Tuku kinkamasiyaniyan xlakata la Ana lakkaxtlawalh xatuwa xta’akglhuwit? (1 Sam. 1:10, 11; Sal. 55:22; Rom. 12:12.)

  • Kalikgalhtawakga 1 Samuel 2:11-36.

    ¿La tlakg kapaxkilh xkamanan Elí nixawa Jehová, chu tuku li’akxilhtit kinkamasiyaniyan ni natlawayaw? (1 Sam. 2:22-24, 27, 29; Deu. 21:18-21; Mat. 10:36, 37.)

  • Kalikgalhtawakga 1 Samuel 4:16-18.

    ¿Tukuya akgtati tamakatsin lu nixatlan liminkancha niku xtlawamaka guerra chu xlakata uma, tuku li’akgspulalh Elí?

  • Kalikgalhtawakga 1 Samuel 8:4-9.

    ¿La li Israel tlawakgolh pi Jehová nitlan kamakgkatsilh chu la akinin xalakatitum nastalinayaw xTamapakgsin Dios? (1 Sam. 8:5, 7; Juan 17:16; Sant. 4:4.)