Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 44: Rahab kamatsekga skgalananin

Takgalhtawakga 44: Rahab kamatsekga skgalananin

UMA lakchixkuwin kgalikgoy taʼakglhuwit. Xlitsalatkan xlakata ni nakamakgnikan. Uma lakchixkuwin skgalananin li Israel, chu puskat tiku kamakgtayama xtukuwani Rahab. Rahab wi xchik anta kxpatsaps nema litamakgstilinit lanka kachikin Jericó. Kaʼakxilhwi la tilalh uma.

Li Israel nialh makgas napatakutkgoy kgalhtuchokgo wanikan Jordán chu natanukgoy kCanaán. Pero akxni xʼamakgolha tanukgoy, Josué kamalakgachalh chatiy skgalananin. Kawani: Kaʼakxilhtit tiyat chu kachikin xla Jericó.

Rahab chu chatiy skgalananin li Israel

Akxni skgalananin tanukgoy kJericó, ankgolh anta kxchik Rahab. Pero wintiku wanilh mapakgsina xalak Jericó: Kgotana katsisni minkgolh chatiy li Israel xlakata naskgalakgoy katiyatni. Akxni mapakgsina kgaxmatli uma, kamalakgachalh lakchixkuwin anta kxchik Rahab chu mapakgsikgolh Rahab: ¡Kamaxtukgo lakchixkuwin nema katatanupat kminchik! Pero Rahab kamatsekgnit lakchixkuwin kxakgstin xchik. Wa xlakata kawaniy: Chuna xla chatiy lakchixkuwin xminkgonit kkinchik pero nikkatsi niku xalanin. Ankgolh akxni xkatsiswamaja, akxni ni axmalakchuwakan kachikin. ¡Komo nakgosnanatit, nakamataxtukatit! Chu lakchixkuwin kgosnankgolh xlakata nakaputsay.

Akxni ankgolh, Rahab lakapara tawakalh kxakgstin xchik. Kawaniy skgalananin: Akit kkatsiy pi Jehová nakamaxkiyan uma tiyat. Kkgaxmatwi pi Jehová maskakalh pupunu xaspinini akxni wixin taxtutit kʼEgipto, chu wixin makgnitit mapakgsinanin Sehón chu Og. Xlakata akit tlan kkalikatsinin, kakimaxkitit mintachuwinkan pi wixin na tlan nakilikatsiniyatit. Nakalakgmaxtuyatit kintlat chu kintse chu putum kinatalan.

Wa skgalananin mastakgoy xtachuwinkan pi nakalakgmaxtuy, pero Rahab wintuku xlitlawat. Skgalananin wankgoy: Katiya uma tasiw xaspinini chu kachit kmiventana chu kamamakgstokgti putum minparientes anta kminchik. Chu akxni akinin nakminparayaw xlakata nakʼakgchipayaw Jericó chu naʼakxilhaw uma tasiw, nitiku ktimakgniw anta kminchik. Akxni skgalaninanin taspitparakgolh niku xwi Josué putum wanikgolh la kitaxtukgolh.

Josué 2:1-24; Hebreos 11:31.



Takgalhskinin

  • ¿Niku xkachikin Rahab?
  • ¿Tiku tama chatiy lakchixkuwin nema wilakgolh kdibujo chu tuku xlakata anta wilakgolh kJericó?
  • ¿Tuku limapakgsilh mapakgsina xalak Jericó Rahab, chu la kgalhtinalh Rahab?
  • ¿La kamakgtayalh Rahab chatiy lakchixkuwin chu tukuya litlan kaskinilh?
  • ¿Tukuya tachuwin maxkikgoy Rahab skgalananin?

Amakgapitsi takgalhskinin

  • Kalikgalhtawakga Josué 2:1-24.

    ¿La kgantaxtulh xtachuwin Jehová nema talhkatawilanit kʼÉxodo 23:28 akxni li Israel akgchipakgolh Jericó? (Jos. 2:9-11.)

  • Kalikgalhtawakga Hebreos 11:31.

    ¿La limasiyay tuku tlawalh Rahab pi lu xlakaskinka takanajla? (Rom. 1:17; Heb. 10:39; Sant. 2:25.)