Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 36: Aktsu toro nema litatlawanit oro

Takgalhtawakga 36: Aktsu toro nema litatlawanit oro

¡NI, NI! ¿Tukunchu tlawamakgolh li Israel? ¡Kakninanimakgolh xaʼaktsu toro nema litatlawanit oro! ¿Tuku xlakata chuna tlawamakgolh?

Akxni Moisés lu makgas tamakgxtakgcha ksipi li Israel wankgolh: Ni katsiyaw tuku akgspulalh Moisés. Katlawaw kiDioskan nema nakinkamaxtuyan unu niku wilaw.

Moisés likatalalh pakgtuy chiwix

Tlan chuna natlawayaw kgalhtinalh Aarón xtala Moisés. Kataʼakgaxtutit mi takganutkan nema litatlawanit oro chu kalitantit. Akxni kachikin mastakgolh, Aarón limastalankilh lhkuyat chu litlawalh tantum xaʼaktsu toro. Chu kachikin wan: ¡Uma kiDioskan nema kinkamaxtuchan kʼEgipto! Alistalh li Israel kakninanikgolh xaʼaktsu toro nema litatlawanit oro chu tlawakgolh lanka fiesta.

Akxni Jehová akxilhli uma, snun sitsilh. Chu waniy Moisés: Kalakapala katakta. Kachikin lu nitlan tuku tlawama. Ay patsankgakgonit kilimapakgsin chu takilhputanimakgolh tantum xaʼaktsu toro litlawakanit oro.

Latamanin kakninanimakgolh xaʼaktsu toro nema litatlawanit oro

Moisés lakapara taktalh ksipi. Chu akxni tlakg xtalakatsuwinit, wa uma tuku akxilhli. ¡Kachikin kilhtlinimakgolh chu tantlinimakgolh kxpaxtunin xaʼaktsu toro nema litlawakanit oro! Moisés snun lisitsilh, asta likatalalh pakgtuy chiwix niku xtatsokgnit xlimapakgsin Dios chu talakgpakglhkgolh laksu laktsu wankgolh. Lakatiyalh xaʼaktsu toro mastalankipa chu pokgxni tlawalh.

Kachikin lanka nitlan tuku tlawakgonit. Wa xlakata Moisés kawanilh lakchixkuwin pi katiyakgolh xespadajkan. Moisés wa: Wantiku kakninanikgolh xaʼaktsu toro xlinitkan. ¡Wa xlakata lakchixkuwin makgnikgolh 3,000 kristianos! ¿Ni kinkamasiniyan uma pi kilikuentajtlawatkan kaj Jehová nakakninaniyaw chu ni nakakninaniyaw amakgapitsi Dios nema nixaxlikana?

Éxodo 32:1-35.



Takgalhskinin

  • ¿Tuku tlawamakgolh kristianos tiku wilakgolh kdibujo, chu tuku xlakata?
  • ¿Tuku xlakata sitsilh Jehová, chu tuku tlawalh Moisés akxni akxilhli tuku tlawamakgolh kristianos?
  • ¿Tuku kamatlawilh Moisés amakgapitsi lakchixkuwin?
  • ¿Tuku kinkamasiyaniyan uma takgalhtawakga?

Amakgapitsi takgalhskinin

  • Kalikgalhtawakga Éxodo 32:1-35.

    ¿La masiyay uma takgalhtawakga xlakata la akxilha Jehová tamalakgxtumikan nixaxlikana takanajla chu takanajla xaxlikana? (Éxo. 32:4-6, 10; 1 Cor. 10:7, 11.)

    Akxni kstalaninanin Cristo laksakkgoy tuku nalilakgastanankgoy, chu tatlakgni nema kgaxmatkgoy, chu nema litantlikgoy, ¿tuku pulana xlilakapastakatkan? (Éxo. 32:25-28; Sal. 18:25.)

    ¿La wilikgolh xatlan liʼakxilhtit xfamiliajkan li Leví xlakata tlawakgolh tuku xalakatitum? (Éxo. 32:25-28; Sal. 18:25.)