Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 34: Xasasti tawa

Takgalhtawakga 34: Xasasti tawa

¿KATSIYA tuku sakmakgolh kristianos? La xalakstakaka hielo. Xasnapapa, chu la laktsu tawan o palhma. Pero ni xalakstakaka hielo; uma tlan wakan.

Li Israel sakmakgo maná

Kajku max akgtum papaʼ titaxtunit akxni li Israel taxtukgonitancha kʼEgipto. Anta kxakaskakni tiyat wilakgolh. Anta ni anan lhuwa taway chu wa xlakata kachikin wankgoy: Tlakgtlan komo xkintikamakgnin Jehová kʼEgipto. Anta xakwayanaw chuna la xaklakgatiyaw.

Wa xlakata Jehová wan: Nakmakataktayacha taway kʼakgapun. Chu chuna tlawalh. Lichali, akxni li Israel akxilhkgolh uma xasnapapa nema xtaktanit kʼakgapun, xlakgalhskinkgoy: ¿Tuku uma?

Moisés wan: Uma taway wa nema Jehová mastalh xlakata nawayanatit. Kristianos wanikgoy MANÁ. Wa maná takgalhwanan la torta xalakstakaka chu kgalhiy ksakgsi cera.

Moisés kawaniy, kasaktit kaj wa nema nawayatit. Wa xlakata tsisa tsisa ksakkgoy. Akxni tlakg xchichinan maná xlakgsputa.

Moisés na kawanilh: Niti kamakilh maná asta lichali. Pero makgapitsi chuna tlawakgolh. ¿Katsiya wix tuku xlay akxni tlakg ksakkgoy? ¡Lichali tsisa maná nema xmakikgonit paks xluwalanit chu xtsukuy lixkajni kankalay!

Pero Jehová wan pi xliʼakgtuminika semana kaj akgtum kilhtamaku tlan pulaktiy xsakkgolh maná chuna la chali chali xsakkgoy. Tama kilhtamaku xliʼakgchaxan xliʼakgtum semana. Chu Jehová wan pi kamakikgolh asta lichali, xlakata xliʼakgtujun kilhtamaku ni katimakataktaka. ¡Akxni xmakikgoy maná xliʼakgchaxan kilhtamaku, ni xluwalay chu ni lixkani xkankalay! ¡Uma na atanu nilay tamakanajlay xla Dios!

Putum kata nema tawilakgolh li Israel kxakaskakni tiyat, Jehová kalimawi maná.

Éxodo 16:1-36; Números 11:7-9; Josué 5:10-12.



Takgalhskinin

  • ¿Tuku sakmakgolh kristianos anta unu kdibujo, chu la wanikan tama?
  • ¿Tuku kawanilh Moisés kachikin, xlakata la xlisakatkan maná?
  • ¿Tuku wa Jehová pi katlawakgolh kachikin xliʼakgchaxan kilhtamaku, chu tuku xlakata?
  • ¿Tuku xtlaway Jehová nema nila tamakanajlay akxni xmakikan maná nema xʼama taway xliʼakgtujun kilhtamaku?
  • ¿Niku akglit kata Jehová kalimawilh maná kachikin?

Amakgapitsi takgalhskinin

  • Kalikgalhtawakga Éxodo 16:1-36 chu Números 11:7-9.

    ¿La masiyay Éxodo 16:8 pi lu xlakaskinka nalakgachixkuwiliyaw wantiku Dios kaliwilinit xlakata napulalinkgoy congregación xla kstalaninanin Cristo? (Heb. 13:17.)

    ¿La chali chali xkamalakapastakakan li Israel anta xakaskakni tiyat pi Jehová xtlawama kalatamakgolh? (Éxo. 16:14-16, 35; Deu. 8:2, 3.)

    Jesús lichuwinalh maná, ¿tuku wa pi xkilhchanima, chu la akinin litamakgtayayaw uma «kaxtalanchu xala kʼakgapun»? (Juan 6:31-35, 40.)

  • Kalikgalhtawakga Josué 5:10-12.

    ¿Niku akglit kata wakgolh maná li Israel, chu uma la kalikxilhka, chu tuku kinkamasiyaniyan uma tatsokgni? (Éxo. 16:35; Núm. 11:4-6; 1 Cor. 10:10, 11.)