Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Takgalhtawakga 52: Gedeón chu 300 xsoldados

Takgalhtawakga 52: Gedeón chu 300 xsoldados

¿AKXILHPAT tuku lama? Umakgolh xsoldados li Israel. Wantiku akxilhpat tapunkskgoy wamakgolh chuchut. Wa xlakkaxtlawana takglhuwit Gedeón anta laya lakatsu niku layakgolh. Gedeón akxilhma la wamakgolh chuchut.

Kaliwana akxilhti lakchixkuwin la tanu tanu tlawakgoy akxni wakgoy chuchut. Makgapitsi katakgalhjukgoy kchuchut. Chu chatum lilin xmakan chuchut kxkilhni chuna tlan akxilha tuku lama lakatsu. Uma lu xlakaskinka, xlakata Jehová waninit Gedeón kajwatiya nalaksaka tiku kuenta tlawamakgolh akxni kgotnamakgolh. Chu amakgapitsi xlitaspitatkan xchikkan. Ka’akxilhwi tuku xlakata.

Li Israel lhuwa ta’akglhuwit kgalhiparakgoy xlakata ni kgalhakgaxmatkgoy Jehová. Li Madián tlakg tliwakga tawilakgonit nixawa li Israel chu katlawani nitlan. Wa xlakata li Israel skinikgoy tamakgtay Jehová, chu Jehová kakgalhakgaxmatni tuku xtasaskinimakgolh.

Jehová waniy Gedeón kama’akgstokgli soldados wa xlakata Gedeón kama’akgstokga 32,000 tiku na’ankgoy tlawakgoy guerra. Pero tiku natatlawakgoy guerra li Israel 135,000 soldados. Pero Jehová waniy Gedeón: Lu lhuwaku soldados kgalhiya. ¿Tuku xlakata Jehová chuna wan?

Wa xlakata komo li Israel xtlajakgolh guerra max xlakpuwankgolh pi xsakstukan tlajanankgolh chu ni maklakaskinkgoy xtamakgtay Jehová. Wa xlakata Jehová waniy Gedeón: Kawanikgo pi putum wantiku pekuankgoy ka’ankgolh kxchikkan. Akxni Gedeón chuna kawani, 22,000 soldados ankgoy. Chu kaj tamakgxtakgkgoy kaj 10,000 mil soldados tiku na’ankgoy kguerra chu nakatalachipay 135,000 soldados.

Gedeón kaliʼakxilha xsoldados

Pero, wa uma tuku Jehová wan: Lu lhuwaku soldados kgalhiya. Wa xlakata Jehová waniy Gedeón pi kakalilh lakchixkuwin nakgotnankgoy ktaxtuna chu kakamalakgachalh kxchikkan tiku takgalhjukgolh kchuchut akxni kgotnankgolh. Naklimatlajiyan guerra kaj 300 lakchixkuwin wa nema skgalh lakawankgoy akxni xkgotnamakgolh, chuna mastalh xtachuwin Jehová.

Chalh kilhtamaku akxni natlawakgoy guerra. Gedeón kamapitsilh pulaktutu tama 300 lakchixkuwin. Chatunu kamaxkilh kgantum akgalokgot, chu patum xalu chu anta xtiju xmakgskgotkan. Akxni atsinu nialh xchan itat tsisni, xputumkan stiliwilikgolh anta niku wilakgolh xtalamakgasitsin. Chu akxni tama kilhtamaku, lakxtum maskgolekgoy x’akgalokgotkan chu lakgpakglhkgolh xalu, chu wankgolh pixlanka: ¡Xespada Jehová chu Gedeón! Akxni soldados nema xtalamakgasitsin lakgawankgolh, ni katsikgoy tuku natlawakgoy pekuankgolh. Putum tsalakgolh, chu li Israel tlajanankgoy.

Jueces, capítulos 6 asta 8.



Takgalhskinin

  • ¿Tuku ta’akglhuwit kgalhikgoy li Israel, chu tuku xlakata?
  • ¿Tuku xlakata Jehová waniy Gedeón pi lu lhuwa kgalhi soldados?
  • ¿Niku kgalhlit lakchixkuwin tamakgxtakgkgolh akxni Gedeón kamalakgachalh kxchikkan wantiku xpekuankgoy?
  • Chuna la tasiyay kdibujo, ¿la tlawalh Jehová pi kaj 300 lakchixkuwin nata’ankgoy kguerra Gedeón?
  • ¿La katalakkaxlalh Gedeón 300 lakchixkuwin chu la tlajalh li Israel guerra?

Amakgapitsi takgalhskinin

  • Kalikgalhtawakga Jueces 6:36-40.

    ¿La liwana katsilh Gedeón tuku xtalakaskin Jehová?

    ¿Tuku nalikatsiyaw uku, tuku xtalakaskin Jehová? (Pro. 2:3-6; Mat. 7:7-11; 2 Tim. 3:16, 17.)

  • Kalikgalhtawakga Jueces 7:1-25.

    ¿Tuku kinkamasiyaniyan ama 300 lakchixkuwin tiku skgalalh xwilakgolh chu nema ni skgalalh tawilakgolh? (Jue. 7:3, 6; Rom. 13:11, 12; Efe. 5:15-17.)

    Chuna la 300 soldados katsinikgolh chuna la xtlaway Gedeón akxni xakxilhmakgolh, ¿la akinin nakatsiniyaw la tlawalh Jesucristo xaPuxku Gedeón? (Jue. 7:17; Mat. 11:29, 30; 28:19, 20; 1 Ped. 2:21.)

    ¿La kinkamakgtayayan Jueces 7:21 xatapaxuwan naskujaw niku nakinkawanikanan anta kxkachikin Jehová? (1 Cor. 4:2; 12:14-18; Sant. 4:10.)

  • Kalikgalhtawakga Jueces 8:1-3.

    Akxni nalakkaxtlawayaw ta’akglhuwit nema takgalhiyaw chatum tala, ¿tuku kinkamasiyaniyan chuna la Gedeón lakkaxtlawalh ta’akglhuwit akxni xtata’akglhuwimakgolh li Efraín? (Pro. 15:1; Mat. 5:23, 24; Luc. 9:48.)