Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 51: Rut chu Noemí

Takgalhtawakga 51: Rut chu Noemí

ANTA kBiblia natekgsa akgtum libro wanikan Rut. Chu anta lichuwinan xlakata akgtum familia nema xlamakgolh kxkilhtamaku akxni li Israel xkgalhikgoy xlakkaxtlawananin ta’akglhuwit. Rut chatum tsumat xalak Moab, ni anta xtapakgsiy k’Israel, xkachikin Dios. Pero akxni Rut katsilh xlakata xaxlikana Dios Jehová, lu paxkiy. Noemí chatum puskat tiku xlina xkata chu makgtayalh Rut nalakgapasa Jehová.

Noemí li Israel. Noemí, xchixku chu chatiy xkamanan ankgolh litawilakgoy kkachikin wanikan Moab akxni nix’akchan taway anta Israel. Akgtum kilhtamaku, xchixku Noemí nilh. Alistalh, xkamanan Noemí tatamakgaxtokgkgolh laktsuman xalak Moab xkawanikan Rut chu Orpá. Max titaxtulh akgkaw kata, xkamanan Noemí nikgolh. ¡Lu lilakgaputsa! ¿Tuku x’ama tlaway Noemí?

Akgtum kilhtamaku Noemí lakapastakli nataspita niku wilakgolh xtachiki, makgat xwanit. Rut chu Orpá ni makgxtakgputunkgoy chu ta’ankgolh. Pero akxni nina lu makgat x’ankgonit anta ktiji, Noemí kawani laktsuman: Kataspittit anta niku kminkachikinkan chu katatamakgxtakgtit mintsekan.

Noemí kalakatsukli xlakata x’amaja. Chu xlakan tsukukgolh tasakgoy xlakata lu xpaxkikgoy Noemí. Wanikgoy: ¡Ni! Akinin nakkata’anan anta niku wilakgolh mintachiki. Pero Noemí kakgalhtilh: Katlawatit litlan kilaktsuman kataspittit. Tlakgtlan nakakitaxtuniyan natatawilayatit mi familiajkan. Wa xlakata Orpá taspitli niku xminitancha. Pero Rut ni taspitli.

Noemí wanilh Rut: Orpá anit. Na katataspitti. Pero Rut kgalhtilh: ¡Nikiwani nakmakgxtakgan! Kakimaxki talakaskin nakta’anan. Anta niku napina anta nakan, chu anta niku nalatapaya anta naklatamay. Minkachikin kinkachikin nawan chu mi Dios na kiDios nawan. Anta niku wix naniya anta nakniy, chu anta nakimaknukan. Akxni Rut chuna wankgolh Noemí nialh wanilh kataspitli.

Chalh kilhtamaku akxni xkgalhtiykan lakpuskatin chankgolh k’Israel. Anta latamakgolh. Rut lakapara tsukulh skuja anta kakiwin, xlakata kilhtamaku akxni makgalakan cebada. Chatum chixku wanikan Booz (Boaz) maxkilh talakaskin nalakaputsay cebada nema xakgataxtunit anta kxkakiwin. ¿Katsiya wix tiku xtse Booz? Rahab, anta xalak Jericó.

Akgtum kilhtamaku Booz waniy Rut: Katuwa kkgaxmatnit lichuwinankana xlakata lu tlan likatsiniya Noemí. Kkatsiy pi makgxtakgti mintlat chu mintse chu minkachikin chu tanita litawilaya unu akgtum kachikin nema ni xlakgapasa. ¡Lu kskiniy Jehová pi kasikulanatlawan!

Rut kgalhtinalh: Lu tlan likatsiya kimalana. Tlakg tlan klimamakgkatsiy xlakata putum tuku xatlan nema kiwani. Chu Booz lu xatlan tsumat akxilhli Rut, chu ni makgas alh kilhtamaku tatamakgaxtokgli. ¡Uma lu makgapaxuwalh Noemí! Pero Noemí tlakg lipaxuwalh akxni Rut chu Booz kgalhikgolh xapulana xkgawasa, xtukuwani Obed. Alistalh Obed xtata wa David alistalh tlakg nakatsiyaw xlakata David.

Rut chu Noemí

Rut 1-4.



Takgalhskinin

  • ¿Tuku xlakata Noemí x’anit kkachikin Moab?
  • ¿Tiku Rut chu Orpá?
  • ¿La kgalhtinankgolh Rut chu Orpá akxni Noemí kawanilh kataspitkgolh kxkachikinkan?
  • ¿Tiku Booz (Boaz), chu la kamakgtayalh Rut chu Noemí?
  • ¿La xwanikan xkgawasa Booz chu Rut, chu tuku xlakata kililakapastakatkan?

Amakgapitsi takgalhskinin

  • Kalikgalhtawakga Rut 1:1-17.

    ¿Tukuya xalaktlan tachuwin wa Rut nema limasiyalh pi lu xaxlikana xpaxkinan chu ni xmakgxtakgnan? (Rut 1:16, 17.)

    ¿La limasiyalh Rut la xkgalhiy xtalakapastakni chu la nachuna lakapastaknankgoy uku xa’amakgapitsi borrego xlakata la katalalin tiku akgataxtukgonit xatalaksakni? (Juan 10:16; Zac. 8:23.)

  • Kalikgalhtawakga Rut 2:1-23.

    ¿Tuku tlawalh Rut nema kawilinilh akgtum lu xatlan lia’akxilhtit laktsuman xala uku? (Rut 2:17, 18; Pro. 23:22; 31:15.)

  • Kalikgalhtawakga Rut 3:5-13.

    ¿La akxilhli Booz xlakata Rut tatamakgaxtokgputulh, chu ni tatamakgaxtokgli wantiku tlakg kgawasaku?

    ¿Tuku kinkamasiyaniyan Rut xlakata tapaxkin nema ni makgxtakgnan? (Rut 3:10; 1 Cor. 13:4, 5.)

  • Kalikgalhtawakga Rut 4:7-17.

    Lakchixkuwin tiku kstalaninanin Cristo, ¿la tlan nachuna natlawakgoy la tlawalh Booz? (Rut 4:9, 10; 1 Tim. 3:1, 12, 13; 5:8.)