Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 48: Xalakgskgalalan li Gabaó

Takgalhtawakga 48: Xalakgskgalalan li Gabaó

AKGLHUWA kachikinin xalak Canaán tsukukgolh takaxkgoy xlakata nakatatlaway guerra li Israel. Lakpuwankgoy pi natlajanankgoy. Pero kristianos xalak Gabaón tiku ni lu makgat wilakgolh ni chuna lakpuwankgoy. Li Gabaón lakpuwankgoy pi Dios kamakgtayama li Israel, chu ni tatlawaputunkgoy guerra Dios. Wa xlakata, ¿katsiya wix tuku tlawakgolh li Gabaón?

Tlawakgolh pi katasiyalh la lu makgat xalanin. Wa xlakata makgapitsi lhakgakgolh xataxtitni xlhakgatkan chu xalakgwan xtatunutkan. Kamakukikgoy xburrojkan kuxtalh xalakgwan chu linkgolh kaxtalanchu xalamakgasa chu palha. Chu ankgoy niku xwi Josué chu wankgoy: Lu makgat kachikin niku kminitanchaw, xlakata kkgaxmatwi pi mi Dioskan Jehová lu xalanka. Kkgaxmatwi putum tuku mi Dioskan tlawalh minpalakatakan kʼEgipto. Wa xlakata kinpulalinaninkan kinkawanikgon pi xakmakaxwi taway xlakata xakmiw kkawaniyan: «Miskujnanin akinin. Kakinkamaxkitit mintachuwin pi ni nakilatatlawayaw guerra». Wixin akxilhpatit pi ay sputmaja kinlhakgatkan xlakata lu makgat kminitanchaw chu kaxtalanchu lu xamakgasa chu xapalha.

Josué chu amakgapitsi xpulalinanin li Israel kakanajlanikgoy li Gabaón. Wa xlakata kamaxkilh xtachuwin pi nitu katikatlawanilh. Pero akgtutu kilhtamaku xtitaxtunitta katsikgolh pi ni xlikana makgat xalanin, lakatsu xalanin.

Josué kakgalhskilh: ¿Tuku xlakata kinkawanitit pi makgat kachikin tanitantit?

Li Gabaón kgalhtinankgoy: Xlakata kinkawanikan pi mi Dioskan Jehová kawaninitan pi nakamaxkiyan paks katiyatni xalak Canaán. Chu xakpekuanitaw pi wixin xpinpatit kilamakgniyaw. Pero li Israel makgantaxtikgolh chuna la xkawaninit li Gabaón chu ni kamakgnikgoy. Wata kaskujnin litaxtukgolh.

Chu mapakgsina xalak Jerusalén snun lisitsilh xlakata li Gabaón katalakkaxlalh li Israel. Wa xlakata kawaniy amakgapitsi kgalhtati mapakgsinanin: Katantit chu kakilamakgtayaw natalachipayaw Gabaón. Chuna tlawakgoy tama kgalhkitsis mapakgsinanin. ¿Lakgskgalalan wankgolh li Gabaón akxni talakkaxlakgolh li Israel, xlakata chu uma mapakgsinanin mimakgolh katatlaway guerra? Kaʼakxilhwi.

Josué 9:1-27; 10:1-5.

Josue chu li Gabaón


Takgalhskinin

  • ¿La xwankgonit li Gabaón chu la xwankgonit amakgapitsi kachikinin li Canaán
  • Chuna la akxilhpat kdibujo, ¿tuku tlawakgolh li Gabaón chu tuku xlakata?
  • Josué chu amakgapitsi pulalinanin, ¿tukuya tachuwin kamaxkikgolh li Gabaón, pero tuku katsikgolh akxni xtitaxtunitta akgtutu kilhtamaku?
  • ¿Tuku lalh akxni mapakgsinanin xala amakgapitsi kachikin kgaxmatkgolh pi li Gabaón xkatalakkaxlanit li Israel?

Amakgapitsi takgalhskinin

  • Kalikgalhtawakga Josué 9:1-27.

    Xlakata Jehová xmapakgsinanit pi li Israel nakamasputuy putum kristianos xalak katiyatni, ¿tuku lu tlan xtayat li tasiyalh akxni katapatilh li Gabaón? (Jos. 9:22, 24; Mat. 9:13; Hech. 10:34, 35; 2 Ped. 3:9.)

    Chuna la makgantaxtilh Josué xtachuwin chuna la xkawaninit li Gabaón, ¿la wililh akgtum lu xatlan liʼakxilhtit xlakata wantiku kstalaninanin Cristo xala uku? (Jos. 9:18, 19; Mat. 5:37; Efe. 4:25.)

  • Kalikgalhtawakga Josué 10:1-5.

    ¿La nachuna tlawakgoy xalhuwa kristianos chuna la tlawakgolh li Gabaón, chu xlakata pi chuna tlawakgoy tuku kaʼakgspulakgoy? (Jos. 10:4; Zac. 8:23; Mat. 25:35-40; Apo. 12:17.)