Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 43: Josué pulalina tlawaka

Takgalhtawakga 43: Josué pulalina tlawaka

MOISÉS katatanuputun kCanaán li Israel. Wa xlakata wan: Jehová, kakimaxki talakaskin na nakpatakuta kgalhtuchokgo wanikan Jordán chu tlan nakakxilha xatlan tiyat. Pero Jehová wani: ¡Kgalhtsekg! ¡Nialh akxni chuna tiwana! ¿Katsiya wix tuku xlakata chuna wanilh Jehová?

Wa xlakata, akxni Moisés nikli chiwix. Kalakapastakti: Moisés chu Aarón ni malankikgolh Jehová. Ni wanikgolh kachikin pi wa Jehová tiku tlawalh pi kataxtulh chuchut anta kchiwix. Wa xlakata Jehová kawanilh pi ni xʼama kamaxkiy talakaskin natanukgoy kCanaán.

Akxni nina lhuwa papaʼ xninit Aarón, Jehová wanilh Moisés: Kayawa Josué kxlakatin sacerdote Eleazar chu kxlakatin kachikin. Chu kxlakatin putum kristianos, kakawanikgo pi Josué xasasti tiku napulalin kachikin. Moisés tlawalh chuna la wanilh Jehová, chuna la akxilhpat kdibujo.

Moisés kawani li Israel pi wa Josué nakapulalin

Chu Jehová wanilh Josué: Tliwakga kawanti chu ni kapekuanti. Nakapulalipina li Israel chu nakalipina kkachikin wanikan kCanaán nema kkawaninit pi nakkamaxki, chu akit nikxni ktimakgxtakgni chu nakmakgtayayan.

Alistalh Jehová wanilh Moisés pi katawakalh talhman kxakgspun sipi wanikan Nebo kxtiyat Moab. Anta ksipi Moisés tlan akxilha tlakg lipekganacha kgalhtuchokgo Jordán chu akxilha xastlan tiyat wanikan Canaán. Jehová wan: Uma tiyat nema kkawaninit pi nakkamaxki xkaman Abrahán, Isaac chu Jacob. Kmaxkiman talakaskin naʼakxilha, pero niktimaxkin talakaskin natanuya anta.

Moisés nilh anta kxakgspun sipi wanikan Nebo. Xkgalhiy 120 kata. Tliwakgaku xwanit chu lu tlanku xlakawanan. Chu kachikin lu lipuwankgoy chu xputumkan lakgtasakgoy Moisés. Pero na lipaxuwakgoy pi Josué xasasti xpulalinakan.

Números 27:12-23; Deuteronomio 3:23-29; 31:1-8; 14-23; 32:45-52; 34:1-12.



Takgalhskinin

  • ¿Tiku tama xchatiykan lakchixkuwin tiku akxtum talayakgolh Moisés kdibujo?
  • ¿Tuku waniy Jehová Josué?
  • ¿Tuku xlakata Moisés alh kxakgspun sipi wanikan Nebo, chu tuku waniy Jehová?
  • ¿Niku akglit kata xkgalhiy Moisés akxni nilh?
  • ¿Tuku xlakata lipuwankgoy kachikin pero tuku xlakata xlipaxuwatkan?

Amakgapitsi takgalhskinin

  • Kalikgalhtawakga Números 27:12-23.

    ¿Tuku lu xlakaskinka taskujut liyawalh Jehová Josué chu la litasiyay uku pi Jehová kakuentajtlaway Xkachikin? (Núm. 27:15-19; Hech. 20:28; Heb. 13:7.)

  • Kalikgalhtawakga Deuteronomio 3:23-29.

    ¿Tuku xlakata Jehová ni kamaxkilh talakaskin natanukgoy Moisés chu Aarón kkatiyatni nema xkawaninit nakamaxki chu tuku kinkalimasiyanikanan uma? (Deu. 3:25-27; Núm. 20:12, 13.)

  • Kalikgalhtawakga Deuteronomio 31:1-8, 14-23.

    ¿La limasiyalh Moisés akxni kawanilh xʼawatiya xtachuwin li Israel, pi ni lanka xmakgkatsikan chuna la makgamakglhtinalh xtastakyaw Jehová? (Deu. 31:6-8, 23.)

  • Kalikgalhtawakga Deuteronomio 32:45-52.

    ¿Tuku xlitlawat xtachuwin Dios kkilatamatkan? (Deu. 32:47; Lev. 18:5; Heb. 4:12.)

  • Kalikgalhtawakga Deuteronomio 34:1-12.

    Maski Moisés nikxni akxilhli Jehová, ¿tuku limasiyay Deuteronomio 34:10 xalakata la xtalalin Jehová? (Éxo. 33:11, 20; Núm. 12:8.)