Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 40: Moisés nikli chiwix

Takgalhtawakga 40: Moisés nikli chiwix

TITAXTULH akglhuwa kata… ¡10 kata, 20 kata, 30 kata, 39 kata! Chu li Israel antaku wilakgolh kxakaskakni tiyat. Pero putum uma kata Jehová kuentajtlaway xkachikin. Kamawi maná. Akxni kakuwani kalipulalin pukgantum puklhni, chu katsisni kalipulani pukgantum lhkuyat. Nisputa xlhakgatkan chu nitu laniy xtantunkan.

Uma kilhtamaku xapulana papaʼ xla tipuxum kata nema titaxtunitta akxni taxtukgocha kʼEgipto. Li Israel anta wilaparakgolh kQadés. Atsinu ni tipuxum kata titaxtunita, unu xwilaparakgolh akxni kgalhkutiy skgalananin kamalakgachaka naskgalakgoy Canaán. Míriam xtala Moisés nilh anta kQadés. Chuna la xapulana, unu anan taʼakglhuwit.

Kristianos nila tekgskgoy chuchut. Makglhuwikgoy Moisés: Tlakgtlan xtiwa komo xaktiniw. ¿Tuku xlakata kinkamaxtu kʼEgipto chu kinkalita unu niku xakalixkajni niku nituku staka? Anta unu ni anan talhtsi ni anan higos, uvas, nipara granadas. Nipara anan chuchut nema naklikgotnanaw.

Moisés nikma chiwix

Akxni Moisés chu Aarón ankgolh tlawakgoy oración ktabernáculo, Jehová wanilh Moisés: Kamamakxtumi kachikin. Alistalh, kxlakatinkan putum kristianos, kanikti chiwix nema anta wi. Anta nataxtuy lhuwa chuchut, naʼakchanikgoy kachikin, chu xʼanimales.

Wa xlakata Moisés kamamakxtumi kristianos chu kawaniy: ¡Kakgaxpatit kristianos tiku nilipawankgoy Dios! Aarón chu akit, ¿nakkamaxtuniyan chuchut anta unu kchiwix? Alistalh Moisés makgtiy linika kgantum lixtokgo chiwix chu lhuwa chuchut taxtulh. Chu analh chuchut xlakata putum kristianos chu putum animales nema anta wilakgolh xkakchanilh.

Pero Jehová sitsinilh Moisés chu Aarón. ¿Katsiya wix tuku xlakata? Xlakata Moisés chu Aarón wankgolh pi wa xʼamakgolh maxtukgoy chuchut anta kchiwix. Pero xaxlikana tiku xtlawama uma, wa Jehová. Chu xlakata Moisés chu Aarón ni xlikana tuku wankgolh xlakata uma, Jehová wa pi nakamalakgaxokge. Dios Jehová wa: Ni wixin tiku nakalipinatit kinkachikin anta kCanaán.

Alistalh li Israel taxtukgolh kQadés. Ni makgas alh kilhtamaku chankgolh anta ksipi wanikan Hor. Anta kxakgspun sipi nilh Aarón. Xkgalhi 123 kata akxni nilh. Li Israel lu lilipuwankgolh, chu puxumakaw kilhtamaku tasakgoy. Eleazar xkgawasa Aarón tawi xapuxku lisacerdote kxalanka kachikin li Israel.

Números 20:1-13, 22-29; Deuteronomio 29:5.



Takgalhskinin

  • ¿La kakuentajtlaway Jehová li Israel akxni anta wilakgolh kxakaskakni tiyat?
  • ¿Tuku xlitakglhuwimakgolh li Israel akxni anta xwilakgolh Qadés?
  • ¿La kamaxkilh chuchut Jehová kristianos chu animales?
  • ¿Tiku tama chixku nema wi kdibujo chu sakstu limasiyamaka xmakan, chu tuku xlakata chuna tlawama?
  • ¿Tuku xlakata Jehová kasitsinilh Moisés chu Aarón, chu tuku kawanilh nakalimalakgaxokgey?
  • ¿Tuku lalh ksipi wanikan Hor, chu tiku xapuxku sacerdote xalak Israel wa?

Amakgapitsi takgalhskinin

  • Kalikgalhtawakga Números 20:1-13, 22-29 chu Deuteronomio 29:5.

    ¿Tuku kinkamasiyaniyan chuna la Jehová kakuentajtlawalh li Israel kxakaskakni tiyat? (Deu. 29:5; Mat. 6:31; Heb. 13:5; Sant. 1:17.)

    ¿La akxilhli Jehová xlakata Moisés chu Aarón ni malankikgolh kxlakatin kachikin? (Núm. 20:12; 1 Cor. 10:12; Apo. 4:11.)

    ¿Tuku kinkamasiyaniyan xlakata la makglhtinalh tastakyaw Moisés akxni stakyawalh Jehová? (Núm. 12:3; 20:12, 27, 28; Deu. 32:4; Heb. 12:7-11.)