Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 39: Xlixtokgo Aarón xanay

Takgalhtawakga 39: Xlixtokgo Aarón xanay

KAʼAKXILHTI xanat chu lhuwa almendra xachan nema stakma anta unu klixtokgo. Wa xlixtokgo Aarón. ¡Uma xanat chu uma tawakat kaj akgtum tsisni listakkgolh! Kaʼakxilhwi tuku xlakata.

Moisés maxkima Aarón lixtokgo nema xanajnit

Li Israel akglhuwata kilhtamaku anu anu kitawilakgonita kxakaskakni tiyat. Makgapitsi lakpuwankgoy pi Moisés ni wa xlipulalinat kachikin chu Aarón ni xapuxku sacerdote xliwanat. Tiku chuna lakapastakkgoy wa Coré, Datán, Abiram chu 250 pulalinanin xalak kachikin. Xputumkan minkgolh chu wanikgoy Moisés: ¿Tuku xlakata lakpuwana pi wix nakinkapulalipina?

Moisés waniy Coré chu kstalaninanin: Chali tsisa kalitantit pumajinin chu kawilinitit limajinin. Chu kalitantit kxtabernáculo Jehová. Nakatsiyaw tiku nalaksaka Jehová.

Lichali Coré chu x250 kstalaninanin minkgolh kxtabernáculo Jehová. Lhuwa tiku na minkgolh xlakata nakakgalhmakgtayay. Jehová lu sitsinit. Moisés wan: Katapanunitit xchikkan xla uma lakchixkuwin xalaklixkajnit xtayatkan. Nituku kaxamatit tuku xlakan. Chu kristianos kgaxmatkgolh, tapanunikgolh xchikkan Coré, Datán chu Abiram.

Chu Moisés wan: Wa uma nalikatsiyatit tiku nalaksaka Jehová. Katiyatni natakgalhpitsiy chu nakaway uma lakchixkuwin nema laklixkajni xtayatkan.

Akxni Moisés chuwinankgolh, takgalhpitsilh tiyat. Xchikkan chu tuku xkgalhikgoy Coré, Datán chu Abiram chu tiku anta xtanumakgolh tsankgakgolh, akxni xtsankgakgonitta tiyat takgalhchawapa. Akxni kgaxmatkgolh la pixlanka xchawamakgolh tiku xtsankgamakgolh, amakgapitsi kristianos pixlanka wankgoy: ¡Katsalaw! ¡Tiyat na max pala na nakinkawayan!

Coré chu 250 kstalaninanin lakatsujku xlayakgolh niku wi tabernáculo. Wa xlakata Jehová malakgachay lhkuyat chu xputumkan lhkukgolh. Alistalh Jehová wanilh Eleazar xkgawasa Aarón kalakatiyalh xpumajininkan tiku nikgolh chu kalitlawalh xastakaka limakgtlapan xlakata nalimakgtlapakan niku tlawakan tamakamastan. Uma limakgtlapan xla niku tlawakan tamakamastan litlawaka xlakata nakalimalakapastakakan li Israel pi kaj watiya Aarón chu xkamanan naliskujkgoy li sacerdote xla Jehová.

Pero Jehová lakaskin pi liwana nakatsikgoy pi kaj watiya Aarón chu xkamanan, sacerdotes nawankgoy. Wa xlakata waniy Moisés: Chatum wantiku pulalina xla kgatunu lhuwa familia xla li Israel kalimilh xlixtokgo. Xlakata li Leví Aarón kalimilh xlixtokgo. Alistalh kgantunu kgantunu lixtokgo kawili ktabernáculo kxlakatin caja xla talakkaxlan. Chu chixku nema akit klaksaknit lisacerdote naxanay xlixtokgo.

Akxni Moisés akxilhli lichali, ¡xlixtokgo Aarón taxtunikgolh lhuwa xanat chu lhuwa xachan almendra! ¿Katsipat wix chu, tuku xlakata Jehová tlawalh pi kaxanalh xlixtokgo Aarón?

Números 16:1-49; 17:1-11; 26:10.



Takgalhskinin

  • ¿Tiku ni xkgalhakgaxmatputunkgoy Moisés chu Aarón chu tuku wanikgoy Moisés?
  • ¿Tuku kaskini Moisés Coré chu 250 kstalaninanin?
  • ¿Tuku kawaniy Moisés kachikin chu tuku lalh akxni Moisés chuwinankgolh?
  • ¿Tuku kaʼakgspulalh Coré chu 250 kstalaninanin?
  • Eleazar xkgawasa Aarón, ¿tuku litlawalh xpumajininkan wantiku nikgolh?
  • ¿Tuku xlakata Jehová tlawalh pi kaxanalh xlixtokgo Aarón? (Kaʼakxilhti dibujo.)

Amakgapitsi takgalhskinin

  • Kalikgalhtawakga Números 16:1-49.

    ¿Tuku tlawakgolh Coré chu kstalaninanin, chu tuku xlakata uma tuku tlawakgolh, limasiyakgolh pi ni xkgalhakgaxmatputunkgoy Jehová? (Núm. 16:9, 10, 18; Lev. 10:1, 2; Pro. 11:2.)

    ¿Tukuya talakapastakni nema nixatlan kgalhikgolh Coré chu x250 xalakpuxku xla tama tamakxtumit? (Núm. 16:1-3; Pro. 15:33; Isa. 49:7.)

  • Kalikgalhtawakga Números 17:1-11 chu 26:10.

    Akxni xlixtokgo Aarón xanalh, ¿tuku limasiyalh, chu tuku xlakata Jehová wa pi katamakilh kcaja xla talakkaxlan? (Núm. 17:5, 8, 10.)

    ¿Tuku lu xlakaskinka tastakyaw kinkamasiyaniyan tama limasiy xlakata xlixtokgo Aarón? (Núm. 17:10; Hech. 20:28; Fili. 2:14; Heb. 13:17.)