Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 35: Jehová mastay xlimapakgsin

Takgalhtawakga 35: Jehová mastay xlimapakgsin

MAX ay akgtiy papaʼ xtitaxtunit akxni li Israel taxtukgonitancha kʼEgipto, li Israel ay chankgolh ksipi wanikan Sinaí, uma sipi na limapakuwikan Horeb. Anta unu niku Jehová tachuwinalh Moisés anta kkiwi ni lu xalanka nema xliwi lhkuyat. Kachikin litlawakgolh xuwa laktsu chiki chu anta tamakgxtakgkgolh ni lhuwa kilhtamaku.

Moisés takxtulh kksipi chu kachikin xkgalhimakgolh tutsu. Chu anta Jehová wanilh Moisés pi xla lakaskin pi li Israel kakgalhakgaxmatkgolh chu lakaskin pi xkachikin xatalaksakni nalitaxtukgoy. Akxni Moisés taspitli, kawaniy li Israel wantuku Jehová wanit. Chu li Israel wankgoy pi nakgalhakgaxmatkgoy Jehová, xlakata xkachikin wamputunkgoy.

Jehová tlawalh akgtum tuku nikxni a xtlaway. Tlawalh pi anta kxakgspun sipi kataxtulh gin, chu tlawalh pi kaʼanalh anta xalaklipekua jilina. Na katachuwinan kachikin chu kawani: Akit Jehová miDioskan wantiku kamaxtuchan kʼEgipto. Chu kamaxkilh uma limapakgsin: Kaj akit nakinkakninaniyatit, ni nakakninaniyatit atanu Dios.

Pakgtuy chiwix

Dios kamaxkipa li Israel amakgapitsi akgnajatsa limapakgsin. Kachikin li Israel lu pekuankgoy. Wanikgolh Moisés: Wix kachuwinanti xlakata kpekuanaw, pi komo Dios nakinkatachuwinanan nakniyaw.

Alistalh Jehová wanilh Moisés: Katakxtu unu ksipi. Akit nakmaxkiyan pakgtuy chiwix anta niku ktsokgnit limapakgsin nema klakaskin pi kachikin namakgantaxtikgoy. Wa xlakata Moisés takxtupa amakgtum anta ksipi. Tipuxum kilhtamaku chu tipuxum katsisni anta tamakgxtakgcha.

Dios kgalhiy lhuwa limapakgsin xla xkachikin. Moisés katsokgli. Dios na maxkilh Moisés pakgtuy chiwix. Anta unu Dios tsokgnit akgkaw limapakgsin nema xkawaninit putum xkachikin. Kawanikan Akgkaw Limapakgsin.

Moisés ya ksipi wanikan Sinaí

Akgkaw Limapakgsin xlakaskinka. Pero nachuna xlakaskinka amakgapitsi limapakgsin nema Dios kamaxkilh li Israel. Akgtum limapakgsin wa uma: Milipaxkit Jehová mi Dios xlipaks mi naku, xlipaks mintalakapastakni, xlipaks mi latamat chu xlipaks militliwakga. Chu wa uma xliʼakgtiy: Milipaxkit mintakristiano la wix miakstu paxkikana. Jesucristo xkgawasa Dios, tiwa pi wa umakgolh tlakg xalaklanka limapakgsin nema Dios kamaxkilh xkachikin Israel. Alistalh tlakg nakatsiyaw xlakata xKgawasa Dios chu xtamasiy.

Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.



Takgalhskinin

  • Max akgtiy papaʼ xtitaxtunita akxni taxtukgocha kʼEgipto, ¿niku tlawakgolh laktsu chiki li Israel niku ni makgas tamakgxtakgkgolh?
  • ¿Tuku lakaskin Jehová natlaway xkachikin, chu li Israel la kgalhtinankgolh?
  • ¿Tuku xlakata Jehová maxkilh Moisés pakgtiy chiwix?
  • Jehová mastalh Akgkaw Tamapakgsin, ¿tukuya amakgapitsi tamapakgsin na kamaxkilh li Israel?
  • ¿Tukuya akgtiy tamapakgsin lichuwinalh Jesús nema tlakg xlakaskinka?

Amakgapitsi takgalhskinin

  • Kalikgalhtawakga Éxodo 19:1-25; 20:1-21; 24:12-18, chu 31:18.

    ¿La kinkamakgtayayan Éxodo 19:8 xlakata nakatsiyaw tuku kilitlawatkan akxni tamakamastayaw xlakata kstalanina Cristo nawanaw? (Mat. 16:24; 1 Ped. 4:1-3.)

  • Kalikgalhtawakga Deuteronomio 6:4-6; Levítico 19:18, chu Mateo 22:36-40.

    ¿La limasiyakgoy kstalaninanin Cristo pi paxkikgoy Dios chu xtakristianojkan? (Mar. 6:34; Hech. 4:20; Rom. 15:2.)