Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 112: Tamakgtayakgolh kMalta

Takgalhtawakga 112: Tamakgtayakgolh kMalta

¡KAKXILHTI uma barco! ¡Tsankgama chu talakgxtuma! ¿Akxilhpat makgapitsi kristianos tiku tajumakgolh kchuchut? Makgapitsi ay chamakgolh kxkilhpan chuchut. ¿Na anta wi Pablo? Kaʼakxilhwi tuku akgspulama.

Tiku lakgtaxtukgolh

Kalakapastakti, Pablo ay akgtiy kata tamaknukanit kpulachin kCesarea. Chu akxni kamaxtuka kpulachin Pablo chu amakgapitsi kalinka kʼakgtum barco kRoma. Chu akxni lakatsu kCreta xlatilhakgoy, snun tsukulh unan chu senan. Chu lakchixkuwin nialh la linkgoy barco. Chu kakuwani nila akxilhkgoy Chichini chu katsisni na ni la akxilhkgoy staku. Akxni xtitaxtunitta akglhuwa kilhtamaku, tiku xʼankgoy kbarco lakpuwankgoy antiya nanikgoy.

Alistalh Pablo tayalh chu kawani: Nitiku katinilh, kaj barco nalakgsputa. Xlakata uma katsisni milh chatum xʼángel Dios chu kiwanilh: «Ni kapekuanti Pablo, xampi xlakaskinka nachipina kRoma lakimpi namakgalhapaliyan emperador, chu kaj minpalakata Dios nalakgmaxtukgoy lakimpi ni nanikgoy tama chixkuwin wanti wix lakxtum tatajupakgo kputakutni».

¡Akxni max itat tsisni xliʼakgkutati kilhtamaku akxni tsukulh senan chu unan, tiku kskujkgoy kbarco akxilhkgolh pi ni lu pulhman xwi chuchut! Tsukukgolh lakpuwankgoy pi max wi niku nalitakankawakay kkachiwixni barco xlakata katsisni, wa xlakata mujukgolh akglhuwa kgalhxtokge. Lichali akxilkgolh niku tlan xtamaknukgolh barco. Chu xlinputunkgoy barco asta kxkilhpan chuchut.

Chu akxni talakatsuwikgolh kxkilhpan chuchut uma barco talakgnutawi kmuntsaya. Chu chuchut tsukulh lakgsnokgwili chu barco laktsu laktsu lalh. Chatum xapuxku soldado tiku xkakuentajtlawama kawani: Wantiku tlan xkiwatnan kaxkiwatnalh chu kaʼalh kxkilhpan chuchut, chu amakgapitsi alistalh katajutit kchuchut kalimaklakaskintit nema lhuma laktsu laktsu lanit barco xlakata ni nalakgtsankgayatit. Chuna tlawakgolh chu 276 kristianos tiku xʼankgoy kbarco tlan chankgolh kxkilhpan chuchut chu niti nilh, chuna la xwanit ángel.

Uma tiyat niku tamakgtayakgolh xtukuwani Malta. Chu kristianos xalak Malta lu tlan likatsikgoy chu kamakgtayay tiku xminkgoy kbarco. Chu akxni tatlanilh kilhtamaku Pablo tamaknuka kʼatanu barco chu linka kRoma.

Hechos 27:1-44; 28:1-14.



Takgalhskinin

  • ¿Tuku lanilh barco anta niku xʼan Pablo akxni titaxtukgolh lakatsu kCreta?
  • ¿Tuku kawanilh Pablo tiku akxtum xtaʼankgoy kbarco?
  • ¿Tuku xlakata laktsu laktsu lalh barco?
  • ¿Tuku limapakgsin mastalh xapuxku soldado tiku xkakuentajtlawama kbarco chu niku kgalhlit chankgolh kxkilhtun chuchut?
  • ¿La xwanikan tiyat niku chankgolh chu tuku tlawanikgolh Pablo akxni tatlanilh kilhtamaku?

Amakgapitsi takgalhskinin

  • Kalikgalhtawakga Hechos 27:1-44.

    ¿La matliwakglha kintakanajlakan pi putum tatsokgnit kBiblia chuna la kitaxtunilh Pablo akxni xʼama kRoma? (Hech. 27:16-19, 27-32; Luc. 1:3; 2 Tim. 3:16, 17.)

  • Kalikgalhtawakga Hechos 28:1-14.

    Maski kristianos xalak kMalta nixkakninanikgoy Jehová lu tlan likatsinikgolh Pablo chu tiku na xtankgoy kbarco, wa xlakata, ¿tuku kililakpuwanatkan natlawayaw akinin kstalaninanin Cristo chu la tlan natlawayaw? (Hech. 28:1, 2; Heb. 13:1, 2; 1 Ped. 4:9.)