Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Takgalhtawakga 107: Aktalamakgnimaka Esteban

Takgalhtawakga 107: Aktalamakgnimaka Esteban

UMA chixku tiku tatsokgostanit xtukuwani Esteban. Esteban xakgstitum kskujni Jesús. ¡Pero ka’akxilhti tuku akgspulama! Uma lakchixkuwin tiku wilakgolh kdibujo li’aktalamimakgolh laklanka chiwix. ¿Tuku xlakata ni akxilhputunkgoy Esteban asta aktalamimakgolh? Ka’akxilhwi.

Aktalamakgnimaka Esteban

Dios makgtayama Esteban xlakata katuwa tlawama tuku laklanka nilay tamakanajla. Chu uma lakchixkuwin sitsikgoy, nilakgatikgoy chu tata’akglhuwatnankgoy Esteban xlakata kawani kristianos wantuku xaxlikana. Pero Dios maxki lanka liskgalala Esteban, chu masiyay pi uma lakchixkuwin nixaxlikana tuku masiyamakgolh. Chu uma tuku Esteban kawani lu kalimakgasitsilh. Wa xlakata chipakgolh Esteban chu kaputsaka tiku nawankgoy tuku nixalixkana xlakata Esteban.

Xapuxku sacerdote kgalhskilh Esteban: ¿Xlikana tuku wankgoy? Akxni Esteban kgalhtinan, Biblia limaklakaskin. Chu kawaniy: Makgasa makgpitsi lakchixkuwin ni x’akxilhputunkgoy xpalakachuwinanin Jehová. Chu na kawanipa: Wixin nachuna mintayatkan, wixin makgnitit Jesús kskujni Dios chu nitu kgalhakgaxpatnipatit xlimapakgsin.

¡Uma snun lisitsikgolh pulalinanin xla takanajla! Xlakata snun sitsikgonit malakxkanikgoy xtatsankan. Pero akxni Esteban talakayawalh k’akgapun wan: ¡Ka’akxilhtit! K’akxilhma Jesús kxpaxtun Dios k’akgapun chu uma lakchixkuwin ka’akgachipaka xlakata ni nakgaxmatkgoy chu chipakgolh chu xwatalinkgolh kxkilhpan kachikin.

Anta unu maktaktakgolh xlhakgatkan chu maxkikgolh uma kgawasa xtukuwani Saulo xlakata nakakuentajtlawaniy. ¿Akxilhpat Saulo? Chu akxni makgapitsi lakchixkuwin tsukukgolh aktalamikgoy Esteban. Esteban tatsokgostalh chuna la akxilhpat kdibujo chu tsukulh tlawaniy Dios oración chu waniy: Jehová ni kakamaxokge xlakata uma tuku nitlan tlawamakgolh. Xla katsiy pi pulalinanin xla takanajla ka’akgskgawimikgonit makgapitsi lakchixkuwin. Chu akxni Esteban chuna wankgolh nilh.

Akxni wi tiku tlawaniyan tuku nitlan, ¿nachuna makgaxokgoputuna o waniya Jehová pi ni kakatlawanilh tuku nitlan? Esteban chu Jesús ni skinkgolh pi wantiku katlawanikgolh tuku nitlan wintuku kalanikgolh. Xlakan lu tlan kalikatsinikgolh maski witiku lu snun nitlan tuku katlawanilh. Nachuna katlawaw.

Hechos 6:8-15; 7:1-60.



Takgalhskinin

  • ¿Tiku Esteban chu tuku tlawama nema litasiyay pi Dios makgtayama?
  • ¿Tuku wan Esteban nema lu kalimakgasitsiy pulalinanin xla takanajla?
  • Akxni Esteban xwataxtukgolh kxkilhpan kachikin, ¿tuku tlawanikgolh?
  • ¿Tiku uma kgawasa nema wi kdibujo chu kuentajtlawama lhakgat?
  • ¿Tuku skinilh Jehová Esteban akxni x’amaja niy?
  • ¿La na tlan chuna natlawayaw la Esteban akxni wi tiku nakinkatlawaniyan tuku nitlan?

Amakgapitsi takgalhskinin

  • Kalikgalhtawakga Hechos 6: 8-15.

    ¿Tuku tlawakgoy pulalinanin xla nixaxlikana takanajla xlakata xtatayananin Jehová nialh nalichuwinankgoy xTamapakgsin Dios? (Hech. 6:9, 11, 13.)

  • Kalikgalhtawakga Hechos 7:1-60.

    ¿Tuku tlawalh pi Esteban lu tlan kgalhtinalh kSanedrín chu tuku kinkamasiyaniyan uma? (Hech. 7:51-53; Rom. 15:4; 2 Tim. 3:14-17; 1 Ped. 3:15.)

    ¿La naka’akxilhaw wantiku lakatayakgoy xlakata nialh nalichuwinanaw xTamapakgsin Dios? (Hech. 7:58-60; Mat. 5:44; Luc. 23:33, 34.)