Ankan kxpulakni

Ankan kliputsan

Xtatayananin Jehová

Laksakkan tachuwin totonaco

Takgalhtawakga 106: Katamakxtumaka kpulachin

Takgalhtawakga 106: Katamakxtumaka kpulachin

KA’AKXILHTI uma ángel tiku malakkinit pulachin. Kamaxtuma x’apóstoles Jesús. Ka’akxilhwi tuku xlakata anta xtanumakgolh kpulachin.

Chatum ángel kalakgmaxtuma apóstoles

Ni lhuma kilhtamaku xtitaxtunit akxni xkamaxkikanit espíritu santo xtamakgalhtawakgen Jesús. Chu wa uma tuku lalh: Akgtum kakgotanun Pedro chu Juan ankgolh kxtemplo Jerusalén. Anta kxkilhtin templo wi chatum chixku tiku nikxni a tlawan. Chu wi tiku lin kxkilhtin templo xlakata chali chali nakaskiniy tumin tiku ankgoy ktemplo. Akxni ka’akxilhli Pedro chu Juan kaskinilh tumin. Chu xlakan, ¿tuku natlawakgoy?

Pedro chu Juan tayakgolh chu akxilhkgolh. Pedro waniy: Nikkgalhiy tumin pero nakmaxkiyan tuku kkgalhiy. ¡Anta kxtukuwani Jesús kataya chu katlawanti! Pedro makatiyalh chixku tiku nila xtlawan, chu xla tunkun tayalh chu tsukulh tlawan. Uma tuku tlawakgolh kaks kamalakawanilh chu lipaxuwakgolh kristianos.

Pedro wan: Wa xlitliwakga Dios, wantiku malakastakwanilh Jesús wa xlitliwakga klitlawaw uma. Chu akxni Pedro chu Juan xkawanimakgolh, makgapitsi tiku xalakpuxku ktakanajla lu xsitsikgonit akxni minkgolh xlakata Pedro chu Juan kawanikgoy kristianos pi Jesús malakastakwanikanit. Wa xlakata kachipaka chu katamaknuka kpulachin.

Lichali pulalinanin kxalaktakanjla kgalhikgolh akgtum lanka tamakxtumit. Anta ktamakxtumit kaliminka Pedro chu Juan chu chixku tiku mapaksakgolh. Pedro chu Juan kakgalhskinka: ¿Tiku xlitliwakga nema tlan litlawatit uma?

Pedro wan pi wa xlitliwakga Dios tiku malakastakwanilh Jesús. Sacerdotes nikatsikgoy tuku natlawakgoy, xlakata nila wankgoy pi nixlikana uma tuku lu tlan tlawakgolh. Wa xlakata kawanika apóstoles pi nialh kalichuwinankgolh xlakata Jesús, chu kamaxkika talakaskin na’ankgoy.

Titaxtulh kilhtamaku chu apóstoles chuntiya lichuwinamakgolh xlakata Jesús chu kamapaksamakgolh wantiku tatatlakgoy. Kaniwa takatsima xlakata uma tuku tlawamakgolh. Wa xlakata lhuwa kristianos tiku wilakgolh lakatsu kJerusalén kaliminkgolh tatatlanin xlakata apóstoles nakamapaksay. Wa xlakata, pulalinanin xla takanajla tiku sitsikgoy katamaknulh kpulachin apóstoles. Pero akxni tama kilhtamaku wi tuku lalh.

Akxni tama katsisni, x’ángel Dios malakkilh pulachin chuna la akxilhpat kdibujo. Ángel kawaniy apóstoles: Kapitit chu anta katayatit ktemplo, chu chuntiya kakalixakgatlitit kristianos. Lichali tsisa akxni xpulalinanin takanajla kamalakgachalh lakchixkuwin xlakata nakalinkan apóstoles, chu ni katekgska. Alistalh katekgska ktemplo chu kalinka anta kSanedrín.

Kkawanin pi nialh nalichuwinanatit xlakata Jesús, wankgoy pulalinanin xla takanajla. Pero limalakgatsamanitantit Jerusalén mintamasiyatkan. Apóstoles wankgoy: Wa Dios kimapakgsinakan nakkgalhakgaxmatniyaw chu ni lakchixkuwin. Chu chuntiya masiyamakgolh xlakata Jesús. ¡Lu tlan li’akxilhtit!

Hechos, capítulos 3 asta 5.



Takgalhskinin

  • ¿Tuku lalh akgtum kakgotanu akxni Pedro chu Juan kajku xtanumakgolh ktemplo?
  • ¿Tuku wanilh Pedro wantiku nila xtlawan chu tuku limakgtayalh nema tlakg tlan nixawa tumin?
  • ¿Tuku xlakata sitsikgolh pulalinanin xla takanajla chu tuku tlawakgolh Pedro chu Juan?
  • ¿Tuku kawaniy Pedro tiku pulalinkgoy takanajla chu tuku kawanika nialh natlawakgoy apóstoles?
  • ¿Tuku xlakata sitsikgoy pulalinanin, pero tuku lalh akxni xlimakgtiy katamaknuka kpulachin apóstoles?
  • ¿La kgalhtinankgolh apóstoles akxni kalinka kSanedrín?

Amakgapitsi takgalhskinin

  • Kalikgalhtawakga Hechos 3:1-10.

    Maski akinin nilay mapaksananaw, ¿la kinkamakgtayayan chuna la tiwa Pedro kHechos 3:6 xlakata lu xlakaskinka na’akxilhaw tamakatsin xlakata xTamapakgsin Dios? (Juan 17:3; 2 Cor. 5:18-20; Fili. 3:8.)

  • Kalikgalhtawakga Hechos 4:1-31.

    Akxni anaw latapuliyaw chu kinkalakatayanikanan, ¿la tlan akinin nachuna natlawayaw chuna la tlawakgolh xapulana kstalaninanin Cristo? (Hech. 4:29, 31; Efe. 6:18-20; 1 Tes. 2:2.)

  • Kalikgalhtawakga Hechos 5:17-42.

    Chuna la uku chu makgasa, ¿la limasiyakgoy wantiku ni xtatayananin Jehová pi tlan akxilhkgoy katalichuwinalh xlakata Dios? (Hech. 5:34-39.)