Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 103: Tanulh maski xlakchuwa

Takgalhtawakga 103: Tanulh maski xlakchuwa

AKXNI Pedro chu Juan taxtukgolh anta niku xwilikanit Jesús, anta xakstu tamakgxtakgli María. Chu tsukulh tasay. ¡Chu talakanulh anta niku xwilikanit Jesús chu akxilhli chatiy ángeles! Ángeles kgalhskinkgoy: ¿Tuku xlakata tasapat?

María kgalhtinalh: Kgalhankgolh xtiyatliwa kinPuxku chu nikkatsi niku wilikanit. Akxni talakgaspitli akxilhli chatum chixku. Xla kgalhskilh: ¿Tiku putsapat?

María lakpuwan pi uma chixku wa tiku kuentajtlawa jardín, lakpuwan pi max wa linit xtiyatliwa Jesús. Wa xlakata waniy: Komo wix lipinita xtiyatliwa kinPuxku kakiwani niku wilinita. Pero uma chixku wa Jesús. Chu uma nixtachuna lakawan la xapulana wa xlakata María ni lakgapasa. Pero akxni Jesús lixakgatliy xtukuwani, María katsilh pi wa Jesús. Xla lakapara alh kawaniy xtamakgalhtawakgen Jesús: ¡K’akxilhli kinPuxkukan!

Alistalh akxnitiya tama kilhtamaku chatiy xtamakgalhtawakgen ankgolh anta k’aktsu kachikin wanikan Emaús, chatum chixku kamataxtukli chu akxtum kata’alh. Xtamakgalhtawakgen Jesús lhuwa lipuwankgoy xlakata makgnikgolh Jesús. Pero akxni tlawamakgolh, uma chixku katuwa kawaniy xalak Biblia chu xlakan tlan limakgkatsikgoy. Chu akxni tachokgokgolh xlakata nawayankgoy xchatiykan tamakgalhtawakgen katsikgolh pi uma chixku wa Jesús. Xalan nialh akxilhkgolh Jesús, chu xlakan taspitkgolh kJerusalén xlakata nakawanikgoy amakgapitsi apóstoles.

Akxni katasiyanilh tama chatiy apóstoles Jesús na tasiyani Pedro. Chu amakgapitsi apóstoles lu tlan makgkatsikgoy akxni kgaxmatkgolh uma. Chu tama chatiy tamakgalhtawakgen ankgolh kJerusalén chu katekgskgolh amakgapitsi apóstoles. Chu kawanikgoy pi katasiyanilh Jesús. Chu akxni lawanimakgolh uma, ¿katsiya tuku lalh nema nilay tamakanajla?

Ka’akxilhti uma dibujo. Maski lakchuway anta kchiki, Jesús tanulh chu katasiyanilh. ¡Lu lipaxuwakgolh xtamakgalhtawakgen Jesús! ¡Tama kilhtamaku nila tamakanajla tuku lalh! ¿Tlan naputlekgeya niku makglit katasiyanilh Jesús? ¿Makgkitsis?

Jesús katasiyaniy xtamakgalhtawakgen

Apóstol xtukuwani Tomás ni anta wi akxni katasiyanilh Jesús. Wa xlakata akxni apóstoles wanikgoy: ¡K’akxilhwi kinPuxkukan! Pero Tomás kawani, asta akxni akit nakakxilha nakkanajla. Akgtsayan kilhtamaku titaxtulh chu xtamakgalhtawakgen Jesús kchiki wilaparakgolh chu lakchuwaparay, tama kilhtamaku Tomás na anta wi. Xalan Jesús katasiyanipa. Chu akxni tama kilhtamaku Tomás kanajlalh pi Jesús xlakastakwananit.

Juan 20:11-29; Lucas 24:13-43.



Takgalhskinin

  • ¿Tuku wanilh María chatum chixku nema xlakpuwan pi xkuentajtlawana jardín, pero tuku likatsilh pi Jesús xwanit?
  • ¿Tuku lalh akxni chatiy xtamakgalhtawakgen Jesús x’amakgolh k’Emaús?
  • ¿Tuku lu nilay tamakanajlay lalh akxni chatiy apóstoles xkawanimakgolh amakgapitsi pi akxilhkgolh Jesús?
  • ¿Niku makglit katasiyanilh Jesús xtamakgalhtawakgen?
  • ¿Tuku wan Tomás akxni wanika pi amakgapitsi tamakgalhtawakgen akxilhkgolh xpuxkukan, pero tuku lalh akxni xtitaxtunitta akgtsayan kilhtamaku?

Amakgapitsi takgalhskinin

  • Kalikgalhtawakga Juan 20:11-29.

    Chuna la wa Jesús anta kJuan 20:23, ¿wanputun pi kristianos tlan nakaxapanikgoy xtalekgalhinkan amakgapitsi? Kawanti (Sal. 49:2, 7; Isa. 55:7; 1 Tim. 2:5, 6; 1 Juan 2:1, 2).

  • Kalikgalhtawakga Lucas 24:13-43.

    ¿La tlan natlawayaw xlakata kinakujkan liwana na’akgatekgsa tuku xaxlikana xlakata Biblia? (Luc. 24:32, 33; Esd. 7:10; Mat. 5:3; Hech. 16:14; Heb. 5:11-14.)