Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 32: Pulakkaw tuku nitlan

Takgalhtawakga 32: Pulakkaw tuku nitlan

KAʼAKXILHTI kgatunu, kgatunu dibujo, masiyama kgatunu tuku nitlan nema Jehová makamilh kʼEgipto. Anta kxapulana akxilhpat Aarón lisnokgma xlixtokgo kgalhtuchokgo wanikan Nilo. Akxni chuna tlawalh kgalhtuchokgo kgalhni wa, chu skiti nema anta xtajumakgolh nikgolh, chu kgalhtuchokgo tsukulh lixkajni kankala.

Li Egipto kalakgmin tuku nitlan

Alistalh Jehová na tlawalh pi katakutkgolh anta kgalhtuchokgo wanikan Nilo lhuwa chichekg. Xwilakgolh khornos, kbandejas niku xwilikan skitit, kputama, lakaxtum xwilakgolh. Akxni nikgolh chichekg, li Egipto mamakxtumikgolh, chu lanka kachikin lixkajni kakankalalh.

Alistalh Aarón lilakgsnokgli xlixtokgo pokgxni chu jejenes wankgolh, laktsu kuxta nema kgoskgoy chu chawanankgoy. Wa uma xapulaktutu nitlan nema makaminika Egipto.

Amakgapitsi tuku nitlan nema kamakaminika, kaj li Egipto katlawanilh nitlan, chu nitu katlawanilh li Israel. Xlipulaktati tuku nitlan wa laklanka kuxta, tanukgolh kxchikkan li Egipto. Xlipulakkitsis tuku nitlan, kalakgchalh animales. Tanlhuwa wakax chu borrego chu cabras xla li Egipto nikgolh.

Alistalh xlakan, Moisés chu Aarón malakgachakgolh lhkaka kaunin, chu kamapulhnilh laklanka tsitsi kristianos chu animales. Wa uma xlipulakchaxan tuku nitlan kamakaminika.

Alistalh Moisés tamakayawalh kʼakgapun, chu Jehová makamilh jilina chu chijit. Nikxni aʼxmin chijit la milh kʼEgipto.

Xapulaktsayan nema tuku nitlan kamakaminika wa lhuwa xtuki. Nikxni aʼxmin chuna la milh nipara anampa lhuwa xtuki, tuku xmakgataxtunit chijit wakgolh xtuki.

Xlipulaknajatsa nema tuku nitlan kamakaminika wa pi lu katsiswalh. Akgtutu kilhtamaku nitsinu xtasiyay xlikalanka kachikin, pero niku xwilakgolh li Israel kxkgakganan.

Xlisputni, Dios wanilh xkachikin pi kamawakalh xkgalhni tantum aktsu cabra o aktsu borrego kxatalayaw xmalakchakan. Akxni chu xʼángel Dios titaxtulh kʼEgipto. Akxni ángel xʼakxilha tama kgalhni niti xmakgniy anta kchiki. Pero akxni ni xʼakxilha kgalhni, xmakgniy wantiku pulana xlakachinit kristiano chu na xmakgni animal. Wa uma xapulakkaw tuku nitlan kamakaminika.

Akxni xtitaxtunitta uma awatiya tuku nitlan, Faraón kamakgxtakgli naʼankgoy li Israel, xkachikin Dios xtakaxkgonitta chu tama katsisni taxtukgoy kʼEgipto.

Éxodo, capítulo 7 asta 12.



Takgalhskinin

  • Chuna la wi kdibujo, kawanti pulaktutu tuku nitlan nema Jehová pulana makamilh kʼEgipto.
  • ¿Tuku xlitalakgpaliy pulaktutu xapulana tuku nitlan makaminka Egipto chu amakgapitsi nema alistalh makaminparaka?
  • ¿Tuku tama nitlan makaminka kʼEgipto xapulaktati, xapulakkitsis chu xapulakchaxan?
  • Kawanti la xwanit tama tuku nitlan makaminka kʼEgipto xapulaktujun, pulaktsayan chu xapulaknajatsa.
  • ¿Tuku wa Jehová natlawakgoy li Israel akxni nina aʼxmin xapulakkaw tuku nitlan nema makaminka kʼEgipto?
  • ¿Tuku tama xliʼakgkaw tuku nitlan makaminka kʼEgipto, chu tuku lalh alistalh?

Amakgapitsi takgalhskinin

  • Kalikgalhtawakga Éxodo 7:19-8:23.

    Maski sacerdotes wantiku xtlawakgoy magia xalak Egipto na tlawakgolh tama pulaktiy tuku nitlan malakgachalh Jehová kʼEgipto, ¿tuku fuerza akgatekgskgolh akxni xtitaxtunitta xlipulaktutu tuku nitlan? (Éxo. 8:18, 19; Mat. 12:24-28.)

    ¿La limasiyalh Jehová kxlipulaktati tuku nitlan nema malakgachalh kʼEgipto pi kgalhiy litliwakga xlakata nakamakgtaya xkachikin? Chu, ¿la limakgkatsikgoy xkachikin Dios akxni natitaxtukgoy «tlanka tapatin» nema wankanit namin? (Éxo. 8:22, 23; Apo. 7:13, 14; 2 Cró. 16:9.)

  • Kalikgalhtawakga Éxodo 8:24; 9:3, 6, 10, 11, 14, 16, 23-25, chu 10:13-15, 21-23.

    Akxni xtitaxtunita akgkaw tuku nitlan, ¿tukuya tamputiy kristianos liwana tasiyakgolh chu la kinkamalakapastakayan uku tama tamputiy kristianos? (Éxo. 8:10, 18, 19; 9:14.)

    ¿La kinkamakgtayayan Éxodo 9:16 naʼakgatekgsaw tuku xlakata Jehová makgxtakgnit Satanás nalatamayku? (Rom. 9:21, 22.)

  • Kalikgalhtawakga Éxodo 12:21-32.

    ¿La Pascua lhuwa kamalakgtaxtilh kristianos, chu tuku xkilhchanima uma tuku tlawakgolh? (Éxo. 12:21-23; Juan 1:29; Rom. 5:18, 19, 21; 1 Cor. 5:7.)