Ankan kxpulakni

Ankan xlipulaktiy niku tsuku

Ankan kliputsan

Xtatayananin Jehová

totonaco

Ki libro xla takgalhtawakga xalak Biblia

Takgalhtawakga 19: Lanka xfamilia Jacob

Takgalhtawakga 19: Lanka xfamilia Jacob
Jacob chu xkamanan

KAʼAKXILHTI uma lanka familia. Uma xkgalhkutiy xlakgkgawasan Jacob. Jacob, na kgalhilh xlaktsuman. ¿Katsiya tuku xtukuwani makgapitsi xkamanan? Kakalakgapaswi makgapitsi.

Wa umakgolh xkamanan Lea, Rubén, Simeón, Leví chu Judá. Akxni Raquel akxilhli pi nila xkgalhi xkamanan lu lilakgaputsalh. Wa xlakata makamaxkilh Jacob kskiti Bilhá, chu Bilhá kgalhilh chatiy xkamanan Dan chu Neftalí. Alistalh Lea na maxkilh Jacob kskiti Zilpá chu xla na kgalhilh chatiy xkamanan Gad chu Aser. Alistalh Lea na kgalhilh chatiy xkamanan Isacar chu Zabulón.

Chalh kilhtamaku akxni Raquel na kgalhilh chatum xkgawasa. Chu wilinilh xtukuwani José. Alistalh tlakg nakatsiyaw, xlakata José lu lanka xlakatsukut litaxtulh. Wa uma xtukuwanikan xkgalhkawitu xkamanan nema kgalilh Jacob akxni akxtum xtawi Labán xtlat Raquel.

Jacob na kgalhilh makgapitsi xlaktsuman, pero Biblia kaj lichuwinan chatum. Xtukuwani Dina.

Chalh kilhtamaku akxni Jacob lakapastakli namakgxtakga Labán chu nataspitara kCanaán. Wa xlakata makgestokgli lanka xfamilia, xborregos chu atanu animales, chu taspitpa kCanaán.

Akxni Jacob xchinitta kCanaán chu xtitaxtunitta kilhtamaku, Raquel na kgalhilh achatum xkgawasa. Akxni xʼamakgolh alakatunu, tama kilhtamaku lakachilh xkgawasa Raquel pero nitlan kitaxtunilh xlakata nilh. Pero aktsu skgata ni nilh. Jacob wilinilh xtukuwani Benjamín.

Kalakapastakwi xtukuwanikan xkgalhkutiykan xkamanan Jacob xlakata anta likilhtsukunit xalanka kachikin Israel. Chuna putum kgatunu xalhuwa familia li Israel xlin xtukuwani kgalhkaw xlakgkgawasan Jacob chu chatiy xkamanan José. Isaac latamalhku akglhuwa kata akxni xlakachinkgonitta umakgolh lakgkgawasan, lu xlikana pi lu lipaxawalh xlakata lhuwa xnatanatni xkgalhiy. Pero naʼakxilhaw tuku akgspulalh xtanat Dina.

Génesis 29:32-35; 30:1-26; 35:16-19; 37:35.



Takgalhskinin

  • ¿Tuku xtukuwanikan kgalhchaxan xkamanan Jacob nema takgalhilh Lea xapulana xpuskat?
  • ¿Tuku xtukuwanikan chatiy xkamanan Jacob nema takgalhilh Zilpá, kskiti Lea?
  • ¿Tuku xtukuwanikan kgalhtiy xkamanan nema Jacob takgalhilh Bilhá, kskiti Raquel?
  • ¿Tuku xtukuwani kgalhtiy kamanan nema kgalhilh Raquel, pero tuku akgspulalh akxni lakachilh xaʼawatiya?
  • Chuna la masiyay dibujo, ¿niku kgalhlit kamanan kgalhilh Jacob, chu tuku xtukuwani kachikin nema malakatsukikgolh uma lakgkgawasan?

Amakgapitsi takgalhskinin

  • Kalikgalhtawakga Génesis 29:32-35 chu 30:1-26.

    Chuna la kinkamasiyaniyan xlakata xkgalhkutiykan xlakgkgawasan Jacob, ¿la xtlawakan akxni xkalaksaknikan xtukuwanikan laktsu kaman li hebreo xalamakgasa?

  • Kalikgalhtawakga Génesis 35:16-19 chu 37:35.

    Maski Biblia kaj wan xtukuwani Dina, ¿tuku likatsiyaw pi Jacob ni kaj chatum xtsumat kgalhilh? (Gén. 37:34, 35.)